FILITIAŊNDA hiŋ vɛlɛ le Isɔluɛitiiya chɔulabaa. Bɛnduaa Deevea a yaa cho Sɔɔl puaa nduaa chɔuwa tɛɛŋ. Mɛɛ mi Chɛɛse dimul paale pilɛ Deeve aa: ‘Chua nyɛdiaa ma yoo bɛndaa numnda. Nduyɛ kindiŋ ma sina te a cho pɛ kɛndɛ.’

Mɛɛ Deeve fuuluu o kampii sowɛiya, mbo nyaanuŋ chɔ chɔ naa chɔuwa le mbo kɔ tofa bɛndaa nduaa. Mɛɛ mi Koolaya, kuubanɔ Filitiaŋnda fula dɔɔ lahau le Isɔluɛitiiya mamɔɔ. Le palɛi 40 idii a ichɔl, lende ndoo tosa ni. Okoŋ, mbo deŋi choo choo kpeleŋ aa: ‘La hɛli waŋndo opilɛ nya tɛɛŋ le mbo huŋ sɔŋga a ya. Te o tiu ya ba pɛ mbo dii ya, ŋ cho simnɔŋ chiaa nyaa. Kɛ te o yɔŋ pɛ mi ya tiu ndu ba mi dii ndu, mɛɛ la cho simnɔŋ chiaa naa. Lelaŋ, la hɛli waŋndo le sɔŋgaa a ya.’

Mi Deeve nyuna sowɛiyaa Sɔɔlla atiŋ aa: ‘Wana dii pɛ Filitiaŋnɔɔ hoo nduyɛ mbo soli Isɔluɛitiiya o tɔɔ wɔɔŋndo hoo niŋ, yɛɛ wana koŋ sɔla yɛ?’

Mi sowɛiya haa o pilɛ mulul ndu aa: ‘Sɔɔl cho wana koŋ nyɛ sɔlaa ke o hɔbɛi, nduyɛ mbo ke ndu vɛlɛ chua ndɔɔ le nɔɔ.’

Kɛ Isɔluɛitiiya kpou wa a sioonde le po pimbiliŋndo hoo. O wanuŋ o vilɛi kpoloŋ bɛndoo pila, nduyɛ ndoo nɔ vɛlɛ sowɛinɔ cheleŋ o ndoo seelul ndu boo chɔuwo wo.

Mɛɛ mi sowɛiya apum kɔ dimul dɔɔ Sɔɔl maa Deeve yeema le sɔŋgaa a Koolaya. Kɛ mi Sɔɔl dimul Deeve aa: ‘A cho wɔ bɔɔ poombɔ pɔmbɔ, nduyɛ laŋunɔ koŋ chɔŋ a violuŋ ndɔɔ sowɛinɔɔ o cho ni. Lelaŋ a tiu ndu niŋ ba le.’ Mi Deeve muli aa: ‘I dii niŋ visi biyaa wa kɔndaŋ a saa finya nuu wo, vɛlɛa kpɔkuŋndo. Nduyɛ Filitiaŋnɔɔ hoo cho peelu yaandɔɔ ni. Jɛhowa cho ya mala.’ Mɛɛ mi Sɔɔl dimul ndu aa: ‘Kɔ, Jɛhowa cho wa a num latulu.’

Mi Deeve tual bɛɛ o pioo daŋgala mbo chɔuviaa pouta kpɔlɔkɛilaŋ la ŋuɛɛnu, mbo duau laŋ o bɔlɔ ndɔɔ niŋ. Okoŋ, mbo chua faanda ndɔɔ mbo kua o kuubanɔɔ hoo lo. Mɛɛ Koolaya che ndu, o laalaŋ te. Yiyaŋndɔɔ wani maa o cho wa bɛɛŋ bɛɛŋ le Deeve diyɔɔ.

Mbo lo loŋ mbo dimi aa: ‘Num huŋ komalla tuŋ, te I cho youva a visiaa dialuŋ numndoŋ ke ma de muŋ te.’ Kɛ mi Deeve dimi aa: ‘Num cho ya hinullo a muɛi faŋnde, vɛlɛa ballo, kɛ ya o diola Jɛhowalaŋ niŋ ya cho num kuello ni. O paale hauleŋ niŋ, Jɛhowa cho num ya malɔɔ o ba, nduyɛ mi kisu num ma del lɛŋ kpɔl.’

Okoŋ, mi Deeve chaŋ mbo sɔɔŋguu Koolaya o ibuŋ. Mɛɛ mbo soli pouwo o pilɛ o bɔlɔ ndɔɔ niŋ, mbo wou o faandaa niŋ. Mbo hiŋ ndu a mayoomu fikoo fikoo, mbo mal ndu waŋ. Mi pouwo kua sueeŋ mbo kɔ luɛi Koolaya o lebol hiɔlɔlɔ, mbo del lɛŋ wɔ, mbo wu pɛ! Mɛɛ Filitiaŋnda che maa kuubanɔ ndaa vi, mi nda kpou nyaanuŋ. Mi Isɔluɛitiiya bɛɛ nyaanuŋ nda kɔɔli, okoŋ ma yam chɔuwo.