ASINA pa puaa cho haa wa? Yɛɛ nda cho yɛ hoo tosaa? O chɔuwo nda cho kɔlaŋ ni. Chondei a cho haa lachi wa cho solioo ni. Kɛ naapum ma nyuna dɔɔ aa: Le yɛɛnɛ wanaa soliaa ŋchonduaa haa nɔ ŋmɔɔ le? Nduyɛ, le yɛɛnɛ a nɔ vɛlɛ labal le chɔulaba le? Ŋ tofaŋndɔ.

Chɛhosiafa wa masaa le kayii ŋiinde Isɔluɛi ni. O wa niŋ achal teleŋ masaa Ehaabi a Chɛsibɛl wa masaa le kaala tɔlaŋ kpeŋgii baluaŋnde o Isɔluɛi niŋndo. Kɛ masa kɛndɔɔ pila Chɛhosiafa wa ni. Esa finya ndɔ bɛɛ masa kɛndɔɔ o wa ni. Le hei, kɔl nyuloo wa le wɔsila siaama le wanaa wa o masale kayii ŋiinde niŋ ba touwo wa.

Kɛ mi nyɔɔ pum yɔŋnuŋ mi sioonde bii waŋnda. Paale pilɛ, mi waŋnda huŋ dimul Chɛhosiafa yooŋgoo aa: ‘Sowɛiya cho chɔnɔŋ kunda bɛndoo o lɛŋnde Moabileŋ niŋ a Amɔŋ, vɛlɛa pembii Sɛyaa ve, le num hunɔɔ delɔɔ choo.’ Mi Isɔluɛitiiyaa siaama kua Chulusalɛm le Jɛhowa nyunaa le malaa. Mɛɛ nda hiŋ o maaŋndo niŋ, mi Chɛhosiafa piɛi aa: ‘Kpokii Jɛhowa Mɛlɛka naa, ŋ sina pɛŋ nyɛ naŋ tosa wo le. Ŋ nɔ wana malaa cheleŋ o num kɔɔli le. Ŋ nɔla sowɛiyaa kaakuuwa haa chɔulaba le. Lelaŋ, num naŋ tiindaŋ le malaa ni.’

Mi Jɛhowa yaŋ nilaŋ o piɛile ndaleŋ, nduyɛ, mbo viam buɛi ndɔɔ mbo kɔ dimul nda aa: ‘O cho nya le nɔ le chieiyo le, kɛ Mɛlɛka. Nya sim tuŋ mila nua mɛɛ Jɛhowa cho nya kiindiaa yɛ.’

Diimandɔɔ pilɔɔ, mi Chɛhosiafa dimul waŋnda aa: ‘La nɔ tiindaŋndo kinɛi o Jɛhowa niŋ!’ Mbo simi wanaa soliaa ŋchonduaa sowɛiyaa nduaa lachi. Nduyɛ mɛɛ nda kua fau, lende nda soli chondoŋ o Jɛhowalo ni. Mɛɛ nda wa fuuloo le chieiyo, a sina nyɛ ndoo yɔŋnuŋndo? Mi Jɛhowa tosa mi puaa chɔuwaa yaamɔɔwaa hiŋ le nda chɔulabaa wa mululaŋ ndapila a chieiyo. Isɔluɛitiiya fuuluu wo, a komal niŋ sowɛiyaa yaamɔɔwaa ndaa kpou a vilɛi.

O cho taasioo le Chɛhosiafa tosa hoo le tiindaŋndo dɔuwɔɔ o Jɛhowa niŋ te? O wa taasi te naa bɛɛ tiindaŋ pɛ o Jɛhowa niŋ.