ASINA pa nyɛ chuaambɔɔ hoo cho dimio wo? O cho chuaa dimullo a Ilaisia okɔɔ, wana suaa le Jɛhowa wo. O cho ndu dimullo a sɔɔŋ kɔndɔfili Jɛhowa mala Ilaisia mbo tosa woŋ. Chuaa hoo sina a Jɛhowa okɔɔ le, kanifuule, o cho Isɔluɛinɔ le. Ŋ tofaŋndɔ mɛɛ chuaambɔɔ hoo looku hunɔɔ o chuaa hoo lo chiɛiniŋ yɛ.

Siiliaŋnɔɔ chuaa hoo cho ni. Nemaŋ cho pɔnɔ ndɔ ni, masa puaa chɔuwa le Siiliaŋnda. Siiliaŋnda bii chuaambɔ Isɔluɛinɔɔ hoo ni ma huŋ a ndu naa lanɔɔ Nemaŋ cha le mbo wa buɛi ndɔ.

Naa wɔɔŋndo pila Nemaŋ ndoo nɔ ni. A veelu naa hoo aa lɛlɔŋ. Naa hoo mbo tosa mi dialuŋ waŋndo kioli kioli. Mɛɛ chuaambɔɔ hoo cho niko lanɔɔ Nemaŋ dimullo aa: ‘I yeema mi masanɔ nuu kuɛ Isɔluɛi, naa Ilaisia cha. O cho ndu siŋgi a naa ŋlɛlɔɔ hoo.’ Mɛɛ mi chuaa hoo huŋ dimul Nemaŋ pɔnɔ ndɔ.

Nemaŋ ndoo yeema niŋ bɔɔ sioŋgɔɔ a naa hoo, lelaŋ mbo kɛɛsiaa le mbo kuɛ Isɔluɛi. Mɛɛ o fuuluu loŋ, mbo kua o chiɛi Ilaisia wo. Mi Ilaisia viam buɛi ndɔɔ le mbo kɔ dimul ndu maa o puluŋ o Pioo Chɔɔdaŋ niŋ haa bɛmbɔɔ le ŋɔmmɛu. Mi hei tɛɛmbuu Nemaŋ kɔllo tau. Okoŋ, mbo dimi aa: ‘Peelaŋ o yalo kɔɔli la naŋ mila hiau pee kɛ kɛ cho Isɔluɛi naŋ!’ Mɛɛ Nemaŋ chii dimi naa, mbo muliŋ kɔndaŋ.

Kɛ mi buɛiyaa nduaa opilɛ dimul ndu aa: ‘Fallo, te o yɔŋ pɛ mi Ilaisia vem num le tosaa nyɛ kendu wo, tosaa ŋ tosa ndu ni. Le sabu yɛɛnɛ a pulu numpila mɛɛ o dimul num yɛ le?’ Mɛɛ mi Nemaŋ yaŋ buɛi ndɔɔ nilaŋ. Okoŋ, mbo kua o Pioo Chɔɔdaŋ mbo mɛɛya o mɛŋndaŋ niŋ haa bɛmbɔɔ le ŋɔmmɛu. Mɛɛ o tosa lende, mi dialuŋ ndɔŋ siaŋgu kpɛlɛkɛ. Miŋ miiŋgu nyɛ kɛndɛi.

Mi Nemaŋ naŋ kɔl tau. Mɛɛ o miiŋgu o Ilaisia lo mbo dimul ndu aa: ‘I sina niko kpeekpei maa Mɛlɛka Isɔluɛitiiya ndu pilɛ kpe cho Mɛlɛka tonyaa o chieeŋndo choo kpou ni. Lelaŋ yandii, bii ke ya chuu num hoo wo.’ Kɛ mi Ilaisia muli aa: ‘Ɛ ɛ, I cho num nyɛ biyɔɔ o ba le.’ Ilaisia sina maa o wa suɛi wɔɔŋ le ndu te o yɔŋ pɛ mbo bii kio hoo, kanifuule Jɛhowa siŋgi Nemaŋ ni. Kɛ buɛi Ilaisia wo Kɛhasi ndoo yeema nyɔŋmuŋ le ndupila.

A sina nyɛ Kɛhasi ndoo tosa wo? Mɛɛ Nemaŋ kuɛŋnuŋ, mi Kɛhasi mal a kiltaŋ ndu kɔɔli, mɛɛ o bendal ndu mbo dimi aa: ‘Naa num cha Ilaisia vem ya ni aa num ke ndu nyɛm num aa ke ndu muŋndoŋ ŋtiŋ, le chaaŋaa nduaa koma huŋ num kɔɔli wa.’ Choolaŋ fuu Kɛhasi wa dimio ni. Kɛ Nemaŋ ndu sina maa lachoo le. Mbo ke Kɛhasi nyɛm muŋ ŋtiŋ.

Kɛhasi miiŋgoo dɔɔ o bɛɛ, mi Ilaisia sina sakpo nyɛ o tosa wo. Jɛhowa ndoo dimul ndu ni. Le hei, mi Ilaisia dimul Kɛhasi aa: ‘Le suɛi wɔɔŋii ŋ tosa hei ve, lɛlɛŋ wa Nɛmaŋndoŋ cho num miiŋgu choo.’ Nduyɛ tamala bɛɛ, mi iyɔŋnuŋ lende!

Yɛɛnɛ naŋ pɛɛku yɛ o suɛi hei niŋ kpou? O tasoo cho ni, ŋ nɔ miŋ wa maa chuaambɔɔ hoo. Nduyɛ, miŋ soo a Jɛhowa okɔɔ o wanaa cheleŋnda lo. Te ŋ tosa hei pɛ, suɛi kɛndɛi yɔŋnuŋ tau. O diiŋndɔɔ cho ni, ŋ waŋnuŋ wanaa heelaŋ mɛɛ Nemaŋ ndoo heeluŋ o tasela ndɔlaŋ yɛ le. Kɛ ŋ diikuŋ buɛiyaa Mɛlɛkaa. O ŋgaandɔɔ cho ni, ŋ nɔ miŋ dimi choolaŋ maa Kɛhasi le. Ŋ pɛɛku tau te ŋ wa pɛ nuaa o Baabuiyo niŋ.