TE A vi pɛ, nduyɛ ma miiŋgu vɛlɛ yoomu pila, vɛɛ kɔltaŋ la wa yɛ wanaa numnda? La wa bɔɔ nda a nyaale! Kɛ wana vi niŋndo miiŋgu lɛ pa yoomu? I yɔŋnuŋ niŋ pa paandu?

Tofawɔ fallo hoo naŋ, a chuaa, vɛlɛa poombɔ pɔmbɔɔ hoo. Ilaicha cho fallo hoo ni. Wana suaa le Mɛlɛka wo o cho ni. Chuaa hoo yɛ, pɔnɔ ndɔ ndoo vi niŋ. Salɛfaa chiee o wa ni. Nduyɛ, poombɔɔ ndɔɔ cho hoo ni. Paale pilɛ, mi poombɔɔ hoo naa. Kɛ mi naa hiuwaŋ ndu tei o mɛɛlulaŋ kpɔŋ mbo wu. Okoŋ, mi Ilaicha dimul chuaa aa: ‘Yɔŋgu ya poombɔɔ naŋ.’

Mɛɛ mi Ilaicha bii ndu poombɔ vilɛi koŋ o ba. Okoŋ, mbo hel a ndu o chiɛiyo amaluaŋ pɔ mbo kɔ yambu ndu o kpele. Mɛɛ mbo piɛi o Jɛhowalo aa: ‘Jɛhowa, tosa mi poombɔɔ hoo miiŋgu vɛlɛ yoomu.’ Mi poombɔɔ kandu bɛɛ yoomoo! Okoŋ mi Ilaicha chua ndu mbo tual a ndu o kala ndɔlo mbo dimul ndu aa: ‘Ache po numndo, o miiŋgu yoomu!’ Le saboo hoo kala ndɔ cho naa a kɔlkɛndɔɔ ni.

Ilaisia bɛɛ, wana sɔwɛ cheleŋ ndoo suaa le Jɛhowa wo o wa ni. Ndu ndoo mala Ilaicha ni. O boondii pum niŋ, mi Jɛhowa soliŋ Ilaisia kpeku le kaamaalaŋ tosaa. Paale pilɛ, mi Ilaisia kua Sunɛm chiee. Loŋ chua pum tosal ndu kɛndɛi ni tau. Mɛɛ nyɔɔ viou kpɛɛ, mi chuaa hoo vialu wana pɔnɔɔ.

Kɛ mɛɛ poombɔɔ hoo sul tiŋ kpasu, mbo kua idii pum o finya ndɔlo o chiɛi niŋ le ndu wallo malaa. Kɛ o lepilɛ niŋ kpe, mi poombɔɔ chaŋ choo choo kpeleŋ aa: ‘Kpokoo ya, bolleŋ lecho ya nɛiyo fɔ!’ Mɛɛ nda hel dɔɔ chiee a ndu, mbo wu. Yiyaŋndɔ mɛɛ kala ndɔ ndoo tambu kɔllɛ! Mbo kɔ veelu bɛɛ Ilaisia chɔ chɔ.

Mɛɛ Ilaisia hiŋ, mbo chua poombɔ vilɛi koŋ mbo luɛi a ndu o lumuiyo niŋ. Mbo piɛi o Jɛhowalo, okoŋ mbo hini ndu choo. Mi dialloŋ yɔŋnuŋ bɛɛ poombɔɔ lafuu, mɛɛ mi poombɔɔ kpisiŋa le ŋɔmmɛu. Yiyaŋndɔ mɛɛ kala ndɔ wa a nyaale yɛ mɛɛ o che vɛlɛ po ndɔɔ yoomu!

Wanaa bɔɔ bɔɔ sɔla niŋ hau piɔmndo. Hei tosa mi yungula ndalaŋ a chaaŋaa ndaa wa a kɔl tambɛiyo. Naŋ nɔ hau kpaaya le waŋ vilɛiya miŋgi yoomu le. Kɛ Jɛhowa ndu nɔ kpaaya koŋ. Ŋ cho hunɔɔ pɛɛku mɛɛ o miŋgi niŋ vɛlɛ waŋnda o miliɔŋndaŋ niŋ yoomu pila yɛ.