TOFAWƆ nyɛ cho yɔŋnɔŋndo naŋndo. Baa cho poonyiaa o chiɛiyo. Masaa Babilɔŋ veelu mialla o dunyɛi bɛnduei. O taalala ŋkooliilaŋ vɛlɛa kaniŋ humboŋ niŋ nda cho kolɔɔ ni. Nduyɛ wolɔɔlaŋ ndaŋ, o maaŋ Jɛhowaa niŋ Chulusalɛm nda kɔ chua laŋ teleŋ koŋ ni. Kɛ o lepilɛ niŋ kpe, mi ba wana pɔnɔɔ fula poonyiaa o chiɛiyo. Nda kpou sioonde bii nda.

Po mama Nɛbukanɛɛsaa Bɛsiasa cho ni. Ndu cho niŋ masaa le Babilɔŋ ni. Mɛɛ o che poonyiaa hoo o chiɛiyo, mbo veelu wanaa nduaa kɔlkaluaa kpede. Mbo dimul nda aa: ‘Wana o wana chɔm ya pɛ nyɛ poonyiaa hoo simndo, I cho ndu nyɛm siaama ke, nduyɛ mi siiŋguu ndu masa yaandɔɔ o masale nileŋ niŋ.’ Kɛ wanaa nduaa kɔlkaluaa haa kpou, opilɛ bɛɛ nɔla mbo chɔm ndu nyɛ poonyiaa hoo simndo le.

Mɛɛ mi kalaa masaa tuɛi wooluŋ wooluŋndo o chiɛi dia nyɛdiaa niŋ. Okoŋ mbo huŋ dimul po ndɔ masaa aa: ‘Yandii, siooŋii bii num te. Po pilɛ cho o masale numndeŋ niŋ, o nyina mɛlɛkaa ke taasioo le sɔɔŋ waa naa tɛɛsiaa woŋ. Diola ndɔlaŋ aa Daniɛl. Teleŋ Nɛbukanɛɛsa finya num mama wa masa wo, mbo siiŋguu ndu masaa le wanaa kɔlkaluaa o lɛŋndeŋ ndeŋ niŋ kpou. Viom waŋndo mbo kɔ veelul num ndu. O cho num hunɔɔ chɔm nyɛ poonyiaa hoo simndo.’

Hau pa mbo viam waŋndo mbo kɔ veelu Daniɛl. Mɛɛ Daniɛl hiŋ, mbo kɛɛ nyɛ masaa dimi le ndu kio wo. Okoŋ mbo dimul masaa aa: ‘Le heelɔŋ Nɛbukanɛɛsa finya num mama wo Jɛhowa faŋa ndu o masaleŋ choo ni. Nduyɛ mbo tuisi ndu nyɛpalaa choo.’

Mi Daniɛl dimul vɛlɛ Bɛsiasa aa: ‘Num Bɛsiasa, a sina kpɛsɛkɛɛ nyɛ yɔŋnuŋ a finya num mama wo, nduyɛ mi num bɛɛ tual ndu kɔɔli a heelɔŋndo. A hiŋ a taalala nda kɔ chua teleŋ koŋ o maaŋ Jɛhowaa niŋ Chulusalɛmndaŋ o dunyɛi numnde choo, mila wa kolɔɔ leniŋ. Nduyɛ, yɔŋi ŋ biiluu Mɛlɛka tonyaa, ma muliŋ piɔmnda sooloo.’ Le saboo hoo Mɛlɛka yɔŋ baa ni mbo poonyiaa diomndaŋ ndaŋ o chiɛiyo.

Mi Daniɛl dimi aa diomnda poonyiaŋndaŋ la cho laŋ ni: ‘MINI, MINI, TIKƐL a PASIŊ.’

‘MINI sim ni maa Mɛlɛka chii masale numndeŋ. TIKƐL sim ni maa Mɛlɛka nua num o nɛi o nɛi niŋ fee, o chi num wana kɛndɛ kposoŋ te. PASIŊ sim ni maa Mɛlɛka ke Miidiaŋnda a Paatiaŋnda masale numndeŋ.’

Boondii Daniɛl wa diomndaŋ ndaŋ tɛɛsiaa ve, Miidiaŋnda a Paatiaŋnda ndaa balu niŋ Babilɔŋ. Nduyɛ o nyumma maŋ niŋ kpeekpei nda bii masaa Bɛsiasa ni ma dii ndu. Lekɛndɛi mi nyɛ baa poonyiaa o chiɛiyo wo yɔŋnuŋ ichɔl koŋ. Kɛ yɛɛnɛ nɔ yɛ niko mbo yɔŋnuŋ a Isɔluɛitiiya? Ŋ nɔ le hunɔɔ pɛɛkoo a hei okɔɔ. Kɛ tuupa miŋ pɛɛku a ndi, ŋ tofaŋndɔ fɛŋ nyɛ yɔŋnuŋ a Daniɛl wo.