KPOKO, kpoko! Daniɛl cho o kpundɔɔ niŋ. A wou ndu o sooŋ kpɔkuŋnda niŋ. Kɛ kpɔkuŋnda cho ndu nyɛ o nyɛ yɔŋ te. A sina le sabu koŋ? Nɛɛnɛ wou yɛ Daniɛl o kpɔkuŋnda haa tɛɛŋ? Ŋ nuaŋnuŋndɔ.

Daliɔɔ cho niŋ masaa le Babilɔŋ ni. Ndoo hɛnaŋ bɔɔ a Daniɛl, kanifuule ndoo nɔ lakafa le, nduyɛ ndoo nɔ bɔɔ taasioo. Le hei, mi Daliɔɔ hɛli Daniɛl le mbo wa masaa chaaŋaa nduaa choo o masale ndɔleŋ niŋ. Mi hei tosa mi chaaŋaa nduaa kaŋ paŋala ndu Daniɛl. Le hei, ma kɛɛsiaa mɛɛ nda looku ma luei Daniɛl o kpundɔɔ niŋ yɛ.

Mɛɛ ma kɔ dimul Daliɔɔ aa: ‘Masaa, naa kpou ŋ chɛlaŋ le ma wou sawaa maa, le palɛi 30, wana o wana sooluu mɛlɛka cheleŋ te, mɛɛ num pilɛ kpe masaa. Wana o wana sooluu mɛlɛka cheleŋ pɛ, a wou wana koŋ o kpɔkuŋnda tɛɛŋ.’ Mi Daliɔɔ cha maa kɛɛsiaa kɛndɔɔ pila o cho ni, kanifuule ndoo sina maa le Daniɛl le nda yeema sawaa hoo wouwo le. Le hei mbo poonyiaa sawaa hoo. Nduyɛ o naamu ndaa niŋ, te sawaa poonyiaŋ niŋ pɛ, o siŋgaŋ lɛ le.

Laŋgbaa wɔɔŋnda haa sina maa Daniɛl pɛŋgi niŋ Jɛhowa piɛiyo le. Lelaŋ, mɛɛ Daniɛl tuei maa masaa chɛl sawaa hoo, mbo miiŋguŋ o chiɛi ndɔɔ mbo kɔ wa piɛileŋ maa paandu koni. A wa a nyaale tau, kanifuule tuu ndaa le Daniɛl diyɔɔ hiŋ yɔŋnɔŋ.

Mɛɛ masaa Daliɔɔ sina le sabu nda dɔu sawaa hoo wo, mbo kial suei le mɛɛ o chɛllɛ. Kɛ mɛɛ yɔŋaa ve lɛ le, kanifuule ndoo chii niŋ sawaa poonyiaa. Le hei, mbo dimul puaa le ma kɔ wou Daniɛl o sooŋ kpɔkuŋnda niŋ. Kɛ mi masaa dimul Daniɛl aa: ‘I nɔ laalaŋndo maa Mɛlɛka numndo cho num kiindiaa.’

Ichɔl koŋ Daliɔɔ nɔla mbo lɔl te a mɛɛ suɛi wa ndu palaa yɛ. Mɛɛ paaleŋ le sɛ, mbo nyaanuŋ o sooŋ kpɔkuŋnda sondoo le Daniɛl tofaa. Ndu ŋ cho koŋ naa chɔɔ amaluaŋ ni. Okoŋ, mbo veelu choo choo kpeleŋ aa: ‘Daniɛl, buɛi Mɛlɛka yoomaa, Mɛlɛka ŋ cho piɛiyo wo nɔla pa mbo kiindiaa num nɛ?’

Mi Daniɛl mulul ndu aa: ‘Mɛlɛka yɔŋ maalikɛinɔ ndɔɔ mbo kiindiaa kpɔkuŋnda sondolaŋ, a yɔŋ ya nyɛ o nyɛ le.’

Mɛɛ masaa tuei Daniɛl diomndo, mbo naŋ kɔl tau. Okoŋ mbo viam laŋgbaa nduaa ma kɔ soli Daniɛl o sooŋndo niŋ. Mɛɛ mbo tosa ma wou puaa wɔɔŋaa wa kaŋ kindiŋndo le Daniɛl diyɔɔ wa o kpɔkuŋnda tɛɛŋ. Mɛɛ nda wou nda, mbɔ kɛ num, a fuuluu pɛŋ lɛŋ te ma del kpɔkuŋnda o lasondo. Ma sɛɛsiaa nda paku paku. Paala ndalaŋ bɛɛ ma pesi wɔ wɔ.

Okoŋ kɔɔli, mi masaa Daliɔɔ poonyial wanaa cho o masale ndɔleŋ niŋnda kpede aa: ‘I dɔu sawaa maa wana o wana fee nɔ mbo ke Mɛlɛka Daniɛllo bɛɛleŋ. O tosa kaamaa bɛndoo mbo kiindiaa Daniɛl o kpɔkuŋnda tɛɛŋ, a di ndu le.’