MƐƐ Chiisu chii wanaa sumɛiyaa ŋiɔɔŋnda siŋgi, o viu bɛɛ le mbo huŋ o sɔndɔkɔlɔ pɔmbɔ pum Chulusalɛm ikɛi. Mbo dimul buɛiyaa nduaa a ŋiɔɔŋ aa: ‘Lakɔ o sɔndɔkɔlɔɔ nya lachi, te la fuuluu dɔɔ pɛ, la cho sofɛlɛ fɔŋndɔɔ komal o baa. La timbi ndu mi la chuu ya ndu.’

Mɛɛ nda hiŋ a sofɛlɛ fɔŋndɔɔ naa Chiisu cha, mbo chal lechoo le kɔlaŋ Chulusalɛm. Tiŋndo ndoo lo lɛ o bɔɔ le. Mɛɛ o fuuluu chiee lekɔɔ, mi faŋga bɛndoo fula le ndu demullo. Mi apum soli domala ndalaŋ ma pɛŋgɛlia o nɛi. Mi apum kili kili siɔɔla waulaŋ ma pɛŋgɛlia vɛlɛ laŋ o nɛi. A wa deŋio choo choo kpeleŋ aa: ‘Salaa cho masaa choo o hiŋ o diola Jɛhowalaŋ niŋndo.’

O sindɔɔ niŋ pa o Isɔluɛi niŋ, lende ndaa tosa ni. Te masa sɛnɛiyo sul pɛ, o chal o sofɛlɛ fɔŋndɔɔ choo o kuɛ Chulusalɛm le mi waŋnda sina maa ndu cho masa sɛnɛiyo ni. Keŋ Chiisu cho tosaa naa ni. Nduyɛ, waŋnda haa cho chɔmndo maa a yeema mi Chiisu wa masa nda. Kɛ o cho waŋnda fau le yeema a Chiisu le. Le sinaa maa o cho waŋnda fau le hɛnaŋ a ndu le, ŋ tofaŋndɔ nyɛ yɔŋnuŋndo mɛɛ o kuɛ o maaŋndo niŋ.

Mɛɛ Chiisu luɛi o maaŋndo niŋ, mbo siŋgi wanaa sumɛiya a wanaa bɛvɛiya. Mɛɛ mi chuaambuaa wa Chiisu saŋgalaa. Mi hei tosa mi suɛi nɛi wanaa soli salaa o Mɛlɛka lo wa tau. Okoŋ, ma nyuna Chiisu aa: ‘A cho pa tueiyɔɔ nyɛ chuaambuaa haa cho dimio wo?’

Mi Chiisu mulul nda aa: ‘I cho tueiyɔɔ.’ Mbo nyuna nda aa: ‘Baa le pilɛ bɛɛ la nuewɔ o Baabuiyo niŋ te? Mi diom Mɛlɛkaa dimi aa: “Num Mɛlɛka, a tosa mi chuaambuaa pɔmbuaa saŋgala num.”’ Okoŋ, mi chuaambuaa pɔmbuaa wa tuŋ hiouwɔɔ lachi a Chiisu saŋgalaa.

Ŋ yeema miŋ wa maa chuaambuaa pɔmbuaa kaŋ, lende le? Mi waŋnda apum yeema naa kuunaa le suɛi a masale Mɛlɛkaleŋ okɔɔ. Kɛ ŋ hiounuŋ lachi a waŋnda dimullo a nyɛm kɔndɔfili Chiisu cho hunɔɔ waŋnda tosalloŋ.

Teleŋ Chiisu wa o chieeŋndo choo wo, o ve wɔ boondii oo nɔ mbo kandu lemasa le wa keŋ te. Kɛ lɔɔ kuɛɛ boondei hei cho yɛ fuuluu? Buɛiyaa Chiisuaa yeema ma sina. A keŋ okɔɔ naŋ cho niŋ hunɔɔ pɛɛku ni.