CHIISU tuulu bɔɔ kɔl naŋ. Vɛ, lende le? A sina le nyɛ o tuulu kɔl naa wo? Kanifuule, puaa cho haa o maaŋ Mɛlɛkaa niŋ Chulusalɛmnda nɔ bɔɔ hɔlte ŋwolileŋ. A cho kindiŋndo le wanaa huŋ Mɛlɛka piɛiyo o maaŋndo niŋnda kanioŋ biyɔɔ o ba tau.

A cho pa chɔɔ nauwaa fɔŋnduaa, a saa a kangbuaa? Nda puaa haa pisi o maaŋndo hoo niŋ ni. A sina le sabu koŋ? Kanifuule, visiaa a youva Isɔluɛitiiya ndaa soliŋ kpeku ni le salaa solio o Mɛlɛka lo.

Mi sawa Mɛlɛkaa dimi maa te Isɔluɛitiinɔɔ ndoo tosa pɛ suɛi wɔɔŋnde, o nɔ mbo soli salaa naa Mɛlɛka cha. Kɛ o fula o sala hakio kɔɔli, mi Isɔluɛitiiya ndaa soli vɛlɛ salalaŋ le sabula cheleŋ. Kɛ kuɛɛnɛ Isɔluɛinɔɔ cho yɛ youva a visiaa sɔla le salaa solio o Mɛlɛka lo?

Apum ndaa manda visiaa a youva. Bahawɛi sala soliaa komal nda pɛ, a soliŋ kaŋ kpeku. Kɛ apum yɛ, ndaa nɔ ŋchɔlu le kɛlɛŋgaa ŋyou. Apum ve Chulusalɛm te. Lelaŋ ndaa nɔla hunɔɔ a chɔluaa ndaa o maaŋndo niŋ le salaa soli le. O maaŋndo hoo niŋ ndaa huŋ visiaa a youva piondɔɔ ni le salaa solio. Kɛ wanaa pisiaa haa ndaa kilul bɔɔ waŋnda kanioŋ. A wa bɔɔ waŋnda kafalaŋ tosallo. Nduyɛ, o faŋaŋ okoŋ kɔɔli, ndaa nɔ pɛŋ ma pisi o maaŋ Mɛlɛkaa niŋ te.

Nyɛ koŋ tosa naa ni mi Chiisu tuulu kɔl. Okoŋ, mi Chiisu nyiinduu tibiila wanaa wa kanioŋ siŋgaa wa, mbo saŋ kaniŋndaŋ falulu. Fulaa okoŋ kɔɔli, mbo toosiaa kpatooleŋ a yuei, mbo tuau visiaa kpede o maaŋndo niŋ. Mbo dimul wanaa wa kangbuaa pisioo wa aa: ‘La soli nyaa haa naŋ. La siiŋguu chiɛi finya nuu naa pisiaa le.’

Buɛiyaa Chiisuaa apum wa a ndu latulu o maaŋndo niŋ Chulusalɛm naŋ. Mi kɔndɔfillo bii nda tau a nyɛ Chiisu wa tosaa wo. Okoŋ, ma loonuŋ dɔɔ nyɛ dimiŋ o Baabuiyo niŋ a Po Mɛlɛkaa okɔɔ wo aa: ‘Kaala cho ndu o kɔl le chiɛi Mɛlɛkaa wo, cho ndu lomɔɔ maa leyiŋ.’

Teleŋ Chiisu wa Chulusalɛm naŋ le bɔŋaŋ loonaŋ a hiouwɔɔ choo wo biyɔɔ wo, mbo tosa kaamaalaŋ tau. Mɛɛ okoŋ kɔɔli, mbo faŋaŋ Chudiaa, mbo miiŋguŋ Kalili. Mɛɛ o wa miiŋgoo Kalili, mbo keeku o tanda Sameelia wo niŋ. Ŋ tofaŋndɔ nyɛ yɔŋnuŋ loŋndo.