KPOKO kpoko, suɛi kpundɛ pum laŋga yɔŋnuŋ. A laŋga dii Chɔŋ wana yiŋaa suŋ suŋ. Hɛloodiaa, lanɔɔ masa bɛndoo ndoo tul bɔɔ Chɔŋ yɛleŋ. Mbo keeku pɔnɔ ndɔ kɔɔli, okoŋ, mi pɔnɔ ndɔ tosa ma kialu Chɔŋ bolleŋ.

Mɛɛ Chiisu tuei a hei okɔɔ, mbo tambu kɔl tau. Okoŋ, mbo kuaŋnuŋ naa doŋ doŋnda ndu pilɛ kpe. Kɛ mi waŋnda tual ndu kɔɔli. Mɛɛ Chiisu che faŋga bɛndoo hoo, mi nyɛiye bii ndu tau le nda. Okoŋ mbo kandu suɛi naa nda cha a masale Mɛlɛkaleŋ okɔɔ. Nduyɛ, mbo siŋgi wanaa ndaa lanaa wa.

Mɛɛ paaleŋ le yɔŋguŋ, mi buɛiyaa nduaa huŋ naa ndu cha. Ma dimul ndu aa: ‘Masanɔɔ, teleŋndo cho niŋ o kuaŋnaŋ landaŋ. Nduyɛ, a che mɛɛ naŋ cho yondoo niŋ naŋ yɛ. Lelaŋ, mal waŋnda haa ma kɔ nuuviaa nyɛdiaa o sɔndɔkɔltaŋ ma pendu.’

Mi Chiisu mulul nda aa: ‘A kua inɛ le. La ke nda nyɛdiaa a dio.’ Mi Chiisu muliŋ o Filipi lo mbo nyuna ndu aa: ‘Kuɛɛ naŋ piandu yɛ nyɛdiaa le mi waŋnda haa kpede de?’

Mi Filipi mulul ndu aa: ‘Mɛɛ miŋ pisi nyɛsɔlaa o bana banɛi le nyɛdiaa piondɔɔ le mi nda kpou sɔla bɛɛ o pɔmpɔmbɔ.’ Okoŋ, mi Andulu dimi aa: ‘Poombɔ pilɛ cho naŋ o nɔ beediiyo o ba kpuŋkpaŋ ŋuɛɛnu a suuwa a ŋiɔɔŋ. Kɛ mi yɛɛ koŋ yɔŋ yɛ a faŋga kaakuu wo hoo.’

Mi Chiisu dimul buɛiyaa nduaa aa: ‘La dimul waŋnda ma chal o billo choo.’ Mi Chiisu bii beediiyo mbo mel Mɛlɛka balika, mbo yimi yimi ndu buŋgaŋ. Okoŋ, mi buɛiyaa nduaa chua beediiyo a suuwa ma piɔu ndu waŋnda kpede. A chɔm waŋlaanduaa a chuaambuaa le. Kɛ puaa de nyɛdiaa hoo wa kinɛi, a wa 5,000. Mi nda kpou dia ma pum cha. Mɛɛ buɛiyaa Chiisuaa chɔuviaa o waŋnda dema wo, kambɛilaŋ 12 nda dɔu ndu ni.

Mi Chiisu dimul buɛiyaa nduaa le ma luɛi o dɛndɔɔ niŋ ma taŋ pɔɔ pioo Kalili. O nyumma maŋ niŋ, mi hueiyii bɛnduɛi suŋgu hɔŋndo. Mi i hiiluu dɛndɔɔ yokpaŋ yokpaŋ. Mi sioonde bii buɛiyaa Chiisuaa tau. Mɛɛ o nyumma kalaŋ niŋ, ma cha waŋndo nda hunɔɔ lachi. Ma mɛli yeelaŋ kpeleŋ a sioonde. Kanifuule wana nda wa koŋ chɔɔ hunɔɔ nda lachi wo, a sina ndu le.

Mi Chiisu dimul nda aa: ‘Ya ni yoo, la yɔŋ isiooŋ te.’ Kɛ a koŋ kpou, ndaa laalaŋndɔ le. Mɛɛ mi Pitɛ lo loŋ mbo dimi aa: ‘Masanɔɔ, te num lekɛndɛi ni mɛɛ veelu ya mi hiŋ naa num cha o mɛŋndaŋ choo.’ Mi Chiisu veelu ndu aa: ‘Mɛɛ huŋ.’ Okoŋ, mi Pitɛ fula o dɛndɔɔ niŋ mbo kandu kɔlaŋ naa Chiisu cha o mɛŋndaŋ choo. Mɛɛ mi sioonde bii ndu tau. Okoŋ, mbo kandu mɛɛyaa o mɛŋndaŋ bɛŋgu. Kɛ mi Chiisu kiindiaa ndu.

Faŋaŋndo o hoo kɔɔli, mi Chiisu ke vɛlɛ waŋnda nyɛdiaa o waalaŋ niŋ. Kɛ o laŋ niŋ, a beediiyo kpuŋkpaŋ ŋɔmmɛu a Suuvaa pɔmbɔ o tosa hei ni. Nduyɛ, mi wana o wana pum vɛlɛ cha. Hei cho naa pɛɛkoo maa Chiisu buulaŋ bɔɔ a waŋndachieeya. Vɛ, lende le i cho le? Hei chɔm naa vɛlɛ maa te Chiisu, o Mɛlɛka kɛsi masa wo, fuuluu pɛ a masale ndɔleŋ o lɛŋndeŋ choo naŋ, ŋ buulaŋ niŋ le nyɛ o nyɛ le.