NUAWƆ chuaambɔɔ hoo naŋ. Wɔsilaŋ 12 o cho ni. Chiisu saa ndu hoo baa ni. Kala ndɔ a finya ndɔ sim nda haa ikɛi kpɛɛluŋ ni. A sina pa le nyɛ nda cho naa a nyaale wo? Ŋ tofaŋndɔ.

Finyaa chuaambɔɔ hoo wana bɛndoo pila o cho ni. Diola ndɔlaŋ aa Chaaliɔɔ. Paale pilɛ mɛɛ chuaambɔ ndɔɔ hoo del a naa, ma yambu ndu o kpele. Kɛ fonda bɛɛ o sɔla le. Naa hoo hiouwɔɔ tuŋ o wa lachi ni. Okoŋ mi Chaaliɔɔ nda laandɔ luɛi o buulaŋndo niŋ tau, kanifuule ma cha maa chua ndaa hoo kinda niŋ te. Nduyɛ, ndu pilɛ kpe nda velu chua ni. Mɛɛ mi Chaaliɔɔ kua Chiisu nuuviaa, kanifuule o tuei a kaamaala o cho tosaalaŋ okɔɔ.

Mɛɛ Chaaliɔɔ saaluŋ Chiisu, faŋga bɛndoo wa ndu o balaa silɔ. Kɛ mi Chaaliɔɔ kindiŋ mbo keeku faŋga bɛndu koŋ tɛɛŋ mbo kɔ del Chiisu o ŋpelu sakpo. Mbo dimul ndu aa: ‘Chua nuu cho a naa lakalu tei. Lelaŋ yandii, huŋ ma huŋ tosalla ndu mbo seŋgu.’ Mi Chiisu chɛl le kɔlaŋ a ndu latulu.

Mɛɛ nda wa kɔlaŋ o chiɛi Chaaliɔɔ wo, mi faŋga bɛndoo tual ndu kɔɔli, a wa tuŋ nyiidaŋndo. Mi Chiisu sim mbo nyuna aa: ‘Nɛɛnɛ pilaŋ yɛ ya?’ Mi Chiisu sinaŋ maa kpaayaa fula ndu o ŋdial. Nyɛ koŋ o sina ni maa waŋndo pilaŋ ndu. Kɛ nɛɛ ndoo pilaŋ yɛ ndu? Chua pum wa loŋ, le wɔsilaŋ 12 o wa a naa. Ndu huŋ pilaŋ Chiisu ni, nduyɛ mbo siaŋgu.

Mi hei nɛŋi Chaaliɔɔ kɔllo tau, kanifondole, o che mɛɛ icho suɛi tɛtɛlɛ Chiisu o hɔl le waŋndo siŋgioo yɛ. A lo suɛi loŋ mi wana veelaa huŋ dimul Chaaliɔɔ aa: ‘Yɛi lɛ Chiisu ikɔɔ le, chua numndo vi pɛ.’ Mɛɛ Chiisu tuei nyɛ poo dimi wo, mbo dimul Chaaliɔɔ aa: ‘Buulaŋ te, chua numndo cho miiŋgu yoomu.’

Mɛɛ Chiisu waa fuuluu o chiɛi Chaaliɔɔ wo, a komal waŋnda chaŋndo. Apum wa yeelaŋ mɛlio choo choo kpeleŋ. Kɛ mi Chiisu dimul nda aa: “La chaŋ te. O vi le. O luaŋ o cho ni.” Mɛɛ o dimi lende, ma saaŋ ndu mamɔɔ, kanifondole, a sina maa o vi.

Mi Chiisu chua buɛiyaa nduaa a yaa, finyaa chuaambɔɔ a kala ndɔ, ma luɛi naa chuaambɔɔ wa ihiniaa. Mbo saa chuaambɔɔ baa. Mbo dimul ndu aa: ‘Chuaa, chɔŋ.’ Mɛɛ mi chuaambɔɔ miiŋgu yoomu, a mɛɛ ŋ cho naa chɔɔ naŋ yɛ. Mbo chaŋ mbo kandu bɛɛ kɔlaŋ. Le sabu koŋ ŋ cha naa finya ndɔ a kala ndɔ nyaaloo ni.

O cho Chuaambɔɔ le cho wana tase Chiisu miŋgi yoomu le. Baabuiyo dimul naa a wana tase Chiisu miŋgi yoomu wo okɔɔ. Ndu cho po chua ndoo viikuu pɔnɔɔ wo ni. Neiŋ chiee o wa ichali ni. Okoŋ kɔɔli, mi Chiisu miŋgi vɛlɛ Lasalɔɔ yoomu. Yemaa Meele a Mata Lasalɔɔ wa ni. Hei cho naa chɔmndo maa, te wana Mɛlɛka kɛsi masa wo, Chiisu, hiŋ pɛ a masale ndɔleŋ o lɛŋndeŋ choo, o miŋgi niŋ wanaa bɔɔ bɔɔ vi wa yoomu. Vɛ, ŋ niŋ kɔl a hei le?