CHIISU chal pɛŋgioo o sooŋ mamɛŋndo ikɛi Sameelia. A boondii keŋ, buɛiyaa nduaa nda aa kuɛ nyɛdiaa piondɔɔ chiee. Chua Chiisu cho hoo suɛi o ndulo wo, mɛŋndaŋ o hiŋ kɔndɔɔ ni. Mi Chiisu dimul ndu aa: ‘Ke ya mɛŋndaŋ I kol.’

Kɔndɔfillo bii chuaa hoo tau. A sina le nyɛ Kɔndɔfillo bii ndu wo? Kanifuule Chuunɔɔ Chiisu cho ni. Chuaa ndu yɛ, Sameeliaanɔɔ o cho ni. Nduyɛ, Chuuwaa ka ka hɛnaŋ a Sameeliaŋnda le. Suukaŋndo bɛɛ a suukaŋ a nda le. Kɛ Chiisu kaala wana o wana fee. Okoŋ, mi Chiisu dimul chuaa hoo aa: ‘Te num oo sina wana cho num hoo mɛŋndaŋ piɛiyo wo pɛ, naa num oo nyuna ya, mi yaa ke num mɛŋma tosa mi wana wa yoomu kpeekpeiyaŋ.’

Mi chuaa dimi aa: ‘Fallo, a nɔ baawa nanaa mamɛŋ te, nduyɛ sooŋndo yiŋgila bɔɔ. Mi kuɛɛ ŋ fula yɛ a mɛŋma tosa maŋ mi wana wa yoomu kpeekpeiyaŋ?’

Mi Chiisu mulul ndu aa: ‘Mɛŋma yɔŋaŋ maŋ maŋ, wana kol maŋ bɛɛ bololaŋ la nɔla mila vesa vɛlɛ num. Kɛ mɛŋma ya I ke wana waŋ, te waŋndo kol maŋ pɛ, ma tosa mbo wa achal lefafɛɛŋ.’

Mi chuaa dimul ndu aa: ‘Fallo, mɛɛ ke ya mɛŋndaŋ maŋ. Okoŋ bolola vesa lɛ ya le. Nduyɛ, I hiŋ lɛ o sooŋndo hoo le mɛŋma kɔndɔɔ le.’

Chuaa ndoo cha ko bɛɛ aa a mɛŋma kolaŋ okɔɔ Chiisu wa suɛi ni. Kɛ Chiisu wa suɛi a tonya cho a Mɛlɛka okɔɔ wo, vɛlɛa masale ndɔleŋ. Tonyaa hoo cho machuaa maa mɛŋma yɔŋgu yoomoo waŋ. Tonyaa hoo ke waŋndo yoomu fafɛɛŋndo.

Mi Chiisu dimul chuaa aa: ‘Kɔ veelu pɔnɔ num mila hiŋ.’

Mi chuaa mulul ndu aa: ‘I nɔ pɔnɔ le.’

Mi Chiisu dimul ndu aa: ‘Tonya ŋ dimi ni. Kɛ piaanduaa a ŋuɛɛnu ŋ keeku niŋ o ba ni. Nduyɛ, po nya cho suŋ suŋ nya ndu wo, o cho pɔnɔ num te.’

Mi kɔndɔfillo bii chuaa, kanifuule, nyɛ o nyɛ Chiisu dimi tonya o cho ni. Vɛɛ Chiisu looku yɛ muŋ kpou sina? Chiisu sina muŋ, kanifuule wana Mɛlɛka chua buŋgɛi maa o cho viomɔɔ wo o cho ni. Nduyɛ, Mɛlɛka chɔm ndu sɔɔŋ muŋ ni. A teleŋ koŋ kinɛi, mi buɛiyaa Chiisuaa miiŋgu naa ndu cha. Mi kɔndɔfillo bii nda tau le mɛɛ nda komal ndu suɛi o chua sameeliaanɔɔ lo yɛ.

Yɛɛ naŋ pɛɛku yɛ o hei niŋ kpou? Hei chɔm naa maa Chiisu wa wana kɛndɛ o kaaye kpou lo. Naa bɛɛ ŋ nɔ miŋ wa wanaa waa lende. Ŋ nɔ miŋ tul kaale cheleŋ yɛleŋ te. Chiisu yeema mi waŋnda kpou pɛɛku tonya yaa nda o yoomu fafɛɛŋndo wo. Naa bɛɛ mɛɛ miŋ mala waŋnda ma pɛɛku tonyaa hoo.