NUAWƆ poombɔ pɔmbɔɔ suɛi o falla haa lo. Falla haa pɛɛku waŋnda sawala Mɛlɛkalaŋ o maaŋ Mɛlɛkaa niŋ Chulusalɛm ni. Chiisu cho poombɔɔ hoo ni. O cho niŋ kpasu. Wɔsilaŋ 12 o cho niŋ ni.

Kɔndɔfillo bii wanaa pɛɛkaa lasawaa haa tau. Le yɛɛ? Kanifuule Chiisu sina a Mɛlɛka okɔɔ tau, vɛlɛa sɔɔŋ poonyiaŋ o Baabuiyo niŋndoŋ. Kɛ le yɛɛ Meele nda Choosɛ cho yɛ naŋ te? Kuɛ nda kuɛ yɛ? Ŋ yaasiaŋndɔ.

Wɔsi o wɔsi bɔŋaŋ loonaŋndo a hiouwɔɔ choowo oo fuuluu pɛ, mi Choosɛ ndoo hiŋ Chulusalɛm a yuŋgu ndɔɔ le ndu biyɔɔ. Chɔŋ Naasaluɛi kɔ Chulusalɛm, tiŋndo pila ndoo bandu ni. Wana o wana ndoo nɔ nyɛm nyaanaŋndoŋ muŋ waalio le. Wanaa bɔɔ bɔɔ a ŋpelu ndaa kua ni. Le fuuloo Chulusalɛm, naapum palɛi iyaa ndaa chii o nɛi tɛɛŋ ni.

Yuŋgu Choosɛɔ ndoo kui niŋ tau. Ndoo nɔ niŋ vɛlɛ chuauwaa cheleŋ a o velu Chiisu kɔɔli wa, puaa a waŋlaanduaa. Nduyɛ, haa kpou o wa nda hɔlteŋ choo. Wɔsio yɛ, mɛɛ bɔŋaŋ loonaŋndo a hiouwɔɔ choowo chuu, mi Choosɛ nda Meele a chuauwaa ndaa biyaŋ miiŋgoo Naasaluɛi. Yiyaŋ ndaa wa ni maa Chiisu cho wanaa nda wa kɔlaŋ nda tɛɛŋ. Mɛɛ nda kuɛ le paaleŋ kpɛŋ, a chi ndu le. Ma nuuviaa ndu wanayaŋ ndaŋ tɛɛŋ a chaaŋaa nduaa, kɛ a seeluŋ ndu le. Okoŋ, ma miiŋgu ndu nuuviaa Chulusalɛm.

O mɛɛlulaŋ kpɔŋ, ma huŋ saaluŋ ndu o maaŋndo niŋ. O wa nda wanaa pɛɛku waŋnda sawala Mɛlɛkalaŋ nda. O cho nda nilaŋ yaŋɔɔ nduyɛ mbo nyuuniaa nda. Kɔndɔfillo bii nda kpede a mɛɛ Chiisu nɔ kɔlkaloo yɛ. Mɛɛ mi Meele kala ndɔ nyuna ndu aa: ‘Vɛ naa i vaa naa tosallo po nuu? Ya ni, finya num ni, ŋ cho num nuuviaa. Nduyɛ, ŋ cho o kɔl landɛi bɛndoo niŋ le num.’

Kɛ mi Chiisu mulul ndu aa: ‘Ɔɔ le sabu nya nuuviaa ya wo? La sina maa I nɔ le waa o finya nuu lo chiɛiniŋ te?’

Chiisu yeema bɔɔ waa naa o pɛɛku a Mɛlɛka okɔɔ wa. Vɛ, o bɛnda mi naa bɛɛ nɔ yeemɛi waa lende le? O ndalo Naasaluɛi, lɔɔ ndoo hiu ndu le kɔlaŋ Mɛlɛka piɛiyo o bɔŋaŋndaŋ te. Nduyɛ ndoo kuɛ pɛ, challe kpɛ mbo yaŋ nilaŋ. Le saboo hoo, mbo pɛɛku sɔɔŋ tau o Baabuiyo niŋ. O naŋ bɔɔ te ŋ tol pɛ tamasi Chiisoo kɔɔli.