BALƆƆ Chiisu wa o lɛŋndeŋ choo kpou wo, o wa keiyo wanaa lanaa siŋgioo. Mi tɔɔ tiu silɔ a kaamaala o wa laŋ tosaa laŋ o sɔndɔkɔltaŋ vɛlɛa chieeŋ bɛnduŋ wa o tanda koŋ niŋndoŋ. Mi waŋnda huŋ a wanaa bɛvɛiya, wanaa sumɛiya, bobuaa a naala cheleŋndaŋ naa Chiisu cha. Nduyɛ mi Chiisu siŋgi nda kpede.

Chɔŋ a boondii Chiisu sɔla yiŋɔɔ ve, ndoo hiou niŋ wɔsilaŋ la yaa. Mi Chiisu dimul buɛiyaa nduaa maa o cho lakɔ Chulusalɛm, loŋ nda cho ndu diyɔɔ ni. Kɛ te palɛi hiou pɛ iyaa, Mɛlɛka cho ndu miŋgi yoomu. Kɛ teleŋ o wa wɔ yoomu wo, Chiisu wa wɔ tuŋ hiouwɔɔ lachi a waŋnda siŋgioo.

Paale pilɛ, Chiisu wa pɛɛkoo o paale pɛŋgiaale Chuuva choo. O paaleŋ ndeŋ choo yɛ, Chuuva tosa balaa o bala le. Chua ŋ cha hoo naŋndo wa bɔɔ a naa. Le wɔsioŋ 18 o wa o tundɛi. Ndoo nɔla simndaŋ sakpo le. Mɛɛ mi Chiisu handu ndu balaŋ choo okoŋ mbo kandu simndaŋ sakpo. Mɛɛ mbo siaŋgu fɔ.

Le hei, mi simlachiaa lepiɛiya le Chuuva duaunuŋ tumbe tau. Mi o pilɛ dimi aa: ‘Palɛi ŋɔmpum icho ni le miŋ tosa wallo. O palɛi keŋ choo nya nɔ ni mila hiŋ le nya siŋgioo, o cho o paale naale pɛŋgiaaleŋ choo le.’

Mi Chiisu mulul nda aa: ‘La cho wanaa wɔɔŋ bɛndu. La timbi sofɛliaa nyaa o paale naale pɛŋgiaaleŋ choo, nduyɛ mila kuɛ a nda o peelo ma kɔ kol. Baa chua bala fondo wa niŋ hoo a naa le wɔsilaŋ 18 wo ya kɛɛ siŋgi o paale naale pɛŋgiaaleŋ choo ni?’ Mɛɛ Chiisu muli naa, mi siɔmbulaŋ la bii wanaa wɔɔŋnda haa.

Okoŋ kɔɔli, mi Chiisu nda buɛiyaa nduaa mal le kɔlaŋ Chulusalɛm. Mɛɛ nda hiou dɔɔ Chɛliko chiee chobe, mi wanaa sumɛiya a ŋiɔɔŋ tuɛi maa Chiisu cho hiouwɔɔ. Okoŋ, ma deŋi choo choo kpeleŋ aa: ‘Chiisu, mala naa fɔ.’

Mi Chiisu veelu puaa sumɛiya haa, mɛɛ mbo nyuna nda aa: ‘O yɛɛ nya hɛnaŋ yɛ mi tosal nya?’ Ma mulul ndu aa: ‘Masanɔɔ, ŋ hɛnaŋ num ma tosa mi ŋ che.’ Mi Chiisu pilaŋ nda hɔltaŋ. O lepilɛ niŋ kpe, ma cha walaŋ. A sina le nyɛ Chiisu tosa kaamaalaŋ ndaŋ kpou wo? Kanifuule, o kaala waŋndachieeya, nduyɛ, o yeema nda ma dɔu laalaŋndo o ndu niŋ. Hei ke naa tiindaŋndo maa te Chiisu, o Mɛlɛka kɛsi masa wo hiŋ pɛ a masale ndɔleŋ o chieeŋndo choo, wana o wana neelɛ niŋ te.