ASINA pa chɛlɛkpɛ nda bii hoo wo? Chiisu cho hoo ni. A laŋga violu ndu suŋ suŋ naa mandaa ŋchɔluaa. Meele cho ndu yambɔɔ naa nda dou chɔluaa nyɛdiaa wa. Kɛ le yɛɛ Meele nda Choosɛ cho yɛ nda chɔluaa haa latulu naŋ? Nduyɛ o cho fondɛi vialaa chɛlɛkpɛ le cho hei le. Lende le i cho le?

Lende kpeekpei icho ni. Kɛ ŋ nuaŋnuŋndɔ le sabu nda cho naŋndo. Masa Luomaŋnda Siisa Ɔkɔstɔɔ ndoo dɔu sawaa ni maa wana o wana fee miiŋgu o chiee nda velu ndu wo ma kɔ poonyiaa ndu diolaŋ. Choosɛ yɛ, Bɛtilihɛm nda velu ndu ni. Kɛ mɛɛ Choosɛ nda Meele fuuluu Bɛtilihɛm, fondaŋ nda yiya mialla wo wa o piaa cha a waŋnda chieeya. Mɛɛ okoŋ nda hiŋ naa mandaa ŋchɔluaa haa ni. Nduyɛ, o paale leŋ choo kpeekpei Meele velu Chiisu ni. Kɛ chɛlɛkpɔɔ choŋnuŋ kɛndiaa, a mɛɛ ŋ cho naa chɔɔ yɛ.

A cho pa chɔɔ wanaa mandaa lasaa hunɔɔ le Chiisu chɔɔ? A wa saa ndaa ikɛi o fondaŋ nda manda chɔluaa wo ichɔl koŋ. O le pilɛ niŋ kpe, mi paŋgeloo balu nda silɔ a diondɔɔ. Kiilanɔ Mɛlɛkaa ndoo hiŋ ni. Mi sioonde bii wanaa mandaa lasaa haa tau tau. Kɛ mi kiilanɔ Mɛlɛkaa dimul nda aa: ‘La yɔŋ isiooŋ te. I chuu nya yooŋgu kɛndɔɔ. Salamanɔɔ Chiisu veluŋ o paale hauleŋ choo Bɛtilihɛm. O piŋi niŋ waŋndachieeya. La cho ndu komal o mɔɔsiaa o kolalaŋ niŋ ma yambu ndu naa nda dou chɔluaa nyɛdiaa wa.’ Hau pa, mi Kiilaa Mɛlɛkaa cheleŋ chaŋ choo choo ma wa Mɛlɛka saŋgalaa. O viu bɛɛ le mi wanaa mandaa lasaa bɛɛ huŋ chɔ chɔ o fondaŋ mandaa ŋchɔloo hoo ma komal Chiisu.

A sina le sabu Chiisu cho wana teŋgeŋndo? A sina pa kpeekpei wana o cho wo? Loonuŋ maa ŋ soo niŋ a Po tase Mɛlɛkaa hoo okɔɔ. O bundɛi tasei o yauwo hoo niŋ naŋ saaluŋ keŋ ni. Ndu mala Jɛhowa nyɔŋ muŋ choo choo, a muŋ lɛŋ naŋ toosiaa ni. Wana koŋ kpeekpei cho Chiisu ni.

Mi Jɛhowa chua yoomu Po ndɔɔ hoo choo choo, mbo wou ndu Meele o dembe. Okoŋ, mi chɛlɛkpɔɔ hoo kandu ndu hindɔɔ o dembe, mɛɛ mɛɛ chɛlɛkpiaa cheleŋ a hindu naa kaalaa ndaa o ladembe yɛ koni. Kɛ chɛlɛkpɔɔ hoo ndu, Po Mɛlɛkaa o cho ni. Okoŋ, mi Chiisu vialuŋ niko Bɛtilihɛm naa mandaa ŋchɔluaa haa. Komaa che niko, le saboo hoo kiilaa Mɛlɛkaa wa a nyaale ni le waŋnda dimullo maa Chiisu veluŋ?