ACHO pa chɔɔ luei diandɛi poo cho keŋ suei yulɔɔ ve? Mɛɛ nda faŋaŋ dɔɔ Chulusalɛm mi i fula vɛlɛ. Ba paaleŋ le chaŋndo puaa haa chɛŋ ni. Nduyɛ, a looŋ okɔɔ nda pɛɛku ni. A laalaŋ maa luei hei cho nda yɔɔ o wana sɔwɛ pumndo.

Kɛ mɛɛ nda fuuluu dɔɔ Chulusalɛm, ma nyuna waŋnda aa: ‘Kuɛɛnɛ chɛlɛkpɛ nda velu hoo wo cho yɛ, o cho wa masa Chuuwa wo?’ Isɔluɛitiiya nda veelu vɛlɛ ni aa “Chuuwa.” Mi puaa haa dimi aa: ‘Mɛɛ naŋ wa ba paaleŋ le chaŋndo, miŋ cha luei nduɛi, nduyɛ ŋ hiŋ le miŋ piɛi ndu.’

Mɛɛ Hɛlɔɔ, o va masaa Chulusalɛmndo tuei a hei okɔɔ, mbo tambu kɔl tau. O yeema mi wana cheleŋ hɛlu fonda ndɔɔ le. Okoŋ, mbo chuuŋgiaa masaa wanaa soliaa salaa. Mbo nyuna nda aa: ‘Kuɛɛnɛ i cho yɛ i dimiaŋ maa wana Mɛlɛka chuel buŋgɛi le waa masa wo nɔ yɛ le violɔŋndo?’ Ma lo loŋ ma mulul ndu aa: ‘Baabuiyo dimi maa Bɛtilihɛm chiee.’

Mɛɛ mi Hɛlɔɔ veelu puaa chɛŋ kaŋ ba paaleŋ le chaŋndo wa, mbo dimul nda aa: ‘La kɔ. Te la kuɛ pɛ, la kɔ nuuviaa nyɛ kɛndɛ kɛndɛ. Te o yɔŋ pɛ mila saaluŋ ndu, la tosa a sabu mi I sina. Ya bɛɛ I yeema mi kɔ yil ndu.’ Kɛ diyɔɔ kpeekpei Hɛlɔɔ ndoo yeema chɛlɛkpɔɔ hoo ni, te oo saaluŋ ndu pɛ.

Mi luei sim nda lachi sanaa le kɔlaŋ Bɛtilihɛm. Mi i kɔ sim o fondaŋ chɛlɛkpɔɔ hoo wa wo kpeekpei. Mɛɛ nda fuuluu o chiɛi o wa wo, ma luɛi. Ma komal Meele nda Chiisu. Okoŋ kɔɔli, ma soli nyɛm nda hiŋ le Chiisu kiowoŋ o bɔlɔla ndalaŋ niŋ ma ke ndu. Kɛ mi Jɛhowa dimul nda o lɔmasɔlaŋ niŋ maa a miiŋgu lɛ o Hɛlɔɔ lo le. Mɛɛ nda wa miiŋgɔŋndo, ma keekuŋ a nɛi cheleŋ pɔ ma kuaŋnuŋ o lɛŋnde ndaleŋ niŋ.

Mɛɛ Hɛlɔɔ sina maa puaa haa miiŋguŋ o lɛŋnde ndaleŋ niŋ, mbo duaunuŋ tumbe tau. Okoŋ kɔɔli, mbo viam waŋnda maa a diu puaambuaa pɔmbuaa kpou Bɛtilihɛm. Chɔŋ a chɛlɛkpiaa nda velu sɛnɛiya, mbo kua lende a chɛlɛkpiaa cho niŋ wɔsilaŋ latiɔɔŋ nda. Kɛ tuupa mi hei yɔŋnuŋ, mi Jɛhowa dimul Choosɛ o lɔmasɔlaŋ niŋ le mbo kuɛ Ichipi. Mɛɛ mi Choosɛ kuaŋnuŋ loŋ a yuŋgu ndɔɔ. Mɛɛ nda tuei maa Hɛlɔɔ vi, mi Choosɛ chua Meele a Chiisu ma miiŋgu o ndalo Naasaluɛi. Loŋ Chiisu sul niŋ ni.

Nɛɛnɛ kpeekpei tosa yɛ mi luei hei diandu? Loonuŋ maa mɛɛ puaa haa che luei hei, Chulusalɛm fɛŋ i yɛɛ nda. Setana ndoo yeema po Mɛlɛkaa hoo diyɔɔ ni. Nduyɛ, o sina maa masaa Hɛlɔɔ cho kindiŋ le ndu diyɔɔ. Lelaŋ, Setana kpeekpei tosa ni mi luei hei diandu diondɔɔ.