CHIISU cho hoo ni o pembii Ɔlifi ve choo. Buɛiyaa nduaa cho ndu haa ikɛi ni. Diola ndalaŋ aa: Andulu, Pitɛ, Chemisi a Chɔŋ. Maaŋ Mɛlɛkaa Chulusalɛm ŋ cha koŋ nda naa ni.

Chɔŋ a teleŋ Chiisu hel Chulusalɛm o sofɛlɛ fɔŋndɔɔ choo wo, palɛi iŋiiŋ i hiou niŋ ni. O paale Nɔŋgɔwaleŋ choo, mi Chiisu keleŋa lakɔ o maaŋndo niŋ. O maaŋ koŋ niŋ, mi wanaa soli salaa o Mɛlɛka lo wa kindiŋ le Chiisu biyɔɔ ma dii ndu. Kɛ ma wo faŋgaa, kanifuule wanaa siaama ndaa hɛnaŋ a Chiisu.

Okoŋ, mi Chiisu dimul simlachiaa lepiɛiya aa: ‘Nya kɛuwa haa, nduyɛ chuauwaa kɛuwa nya cho ni.’ Mbo hiau lachi a nda dimullo maa Mɛlɛka cho nda nyɛpalaa tuisi choo le sɔɔŋ wɔɔŋ nda tosa woŋ. Mɛɛ Chiisu faŋ o maaŋndo niŋ, mbo huŋ o pembii Ɔlifi ve hei choo. Okoŋ, mi buɛiyaa nduaa hiɔɔluaa haa kandu ndu nyuuniaa. A sina nyɛ nda wa ndu nyuuniaa wo?

A cho ndu nyunaa a nyɛm cho hunɔɔ yɔŋnɔŋ o siɔdii lachioo niŋ ndoŋ okɔɔ. A sina maa Chiisu cho hunɔɔ dɛnɛwɔɔŋndo chii o lɛŋndeŋ choo. Kɛ a yeema ma sina lɔɔ hei cho yɔŋnɔŋndo. Lɔɔ kuɛɛ Chiisu cho yɛ vɛlɛ hunɔɔ mbo kandu masaleŋ?

Chiisu sina maa te o miiŋguŋ pɛ choo choo, wanaa tol ndu kɔɔli o lɛŋndeŋ ndeŋ choo wa tiu niŋ ba ma che ndu loŋ te. Lelaŋ, mbo dimul buɛiyaa nduaa nyɛm cho wa yɔŋnɔŋndo o lɛŋndeŋ choo woŋ te o wa pɛ o masale ndɔleŋ niŋ choo choo. Nyɛm kuɛɛ Chiisu dimi yɛ maa ŋ cho wa yɔŋnɔŋndo?

Mi Chiisu dimi maa chɔulaŋ la cho wa tau, naalaŋ la kui niŋ bɔɔ, yiaŋ ma wa niŋ bɔɔ, sawala tɛɛmbaalaŋ vɛlɛa lɛŋnde nyiiyaaleŋ. Mi Chiisu dimi vɛlɛ maa yooŋgu kɛndɔɔ a masale Mɛlɛkaleŋ okɔɔ cho wa dimiŋndo ba o ba fee o chieeŋndo choo. Ŋ cho pa hau nyɔŋ muŋ chɔɔ yɔŋnɔŋndo nɛ? Lende, ŋ cho yɔŋnɔŋndo. Hei ke naa tiindaŋndo maa Chiisu cho niŋ masaa choo choo. O cho suŋ hunɔɔ dɛnɛwɔɔŋndo chii o lɛŋndeŋ choo.