PAALE pilɛ mi Chiisu dimul poo maa o nɔ mbo kaala chaaŋ ndɔ wanachioo. Mi poo nyuna Chiisu aa: ‘O nɛɛnɛ cho yɛ chaaŋ nuu?’ Mi Chiisu sina nyɛ poo hoo yiyaŋndo sakpo. Poo hoo ndoo yiyaŋ ko maa wanaa nda cho kaale pilɛ a kaŋnde pilɛ wa kinɛi cho chaaŋaa nduaa ni. Ŋ nuaŋnuŋndɔ niko nyɛ Chiisu dimul ndu wo.

Lepum a bundɔŋ Chiisu ndoo pɛɛku waŋnda ni. Nduyɛ, keŋ o hiŋ niko tosaa ni. Mbo dimi bundɛi a Chuunɔɔ vɛlɛa a Sameeliaŋnɔɔ okɔɔ. Ŋ pɛɛku niŋ maa Chuuwaa ka ka ndaa hɛnaŋ a Sameeliaŋnda le. Bundɛi Chiisu dimi ve cho niko hei ni.

Paale pilɛ, mi Chuunɔɔ pum keeku a nɛi ipembu pum le kɔlaŋ Chɛliko chiee. Kɛ mi viiya kei ndu delɔɔ choo o nɛi. Nyɛ o nyɛ oo nɔ, ma poondiaa ndu o ba. Okoŋ, ma luaa ndu lɔɔ pila, ma mɛi ndu tendu piɔm.

Okoŋ kɔɔli, mi wana soliaa salaa pum wa keekoo o nɛi koŋ. Chuunɔɔ o wa ni. Kɛ mɛɛ o komal po nda lɔɔ hoo wo ihini o nɛi, yɛɛnɛ o tosa yɛ? Mbo keekuŋ o daŋgala mbo kuaŋnuŋ. Okoŋ kɔɔli, mi po pilɛ bɛɛ huŋ a nɛi koŋ. Livainɔɔ o wa ni. Kɛ mi ndoo sim pa le po nda lɔɔ hoo wo malaa? Sako bɛɛ. Ndu bɛɛ sim te. A cha bɛɛ wana soliaa salaa nda Livainɔɔ kɔndaŋ o nɛi tɛnda pɔ.

Kɛ nuawɔ wana cho hoo naŋ latulu a poo hoo wo. Sameeliaŋnɔɔ o cho ni. O cho Chuunɔ nda lɔɔ hoo wo malaa. O cho ndu koowaŋ dovio o pauvii nda booluu ndu ve. Mɛɛ o tosa lende, mbo chua ndu, mbo kua a ndu inɛ le ma chiɔu ndu.

Mɛɛ Chiisu chii bundɛi hei dimi, mbo nyuna po ndoo nyuna ndu wo aa: ‘O wanaa yaa wa haa tɛɛŋ kinɛi, o nɛɛnɛ cho yɛ chaaŋ o po nda lɔɔ hoo wo? Baa wana soliaa salaa, Livainɔɔ ɔɔ Sameeliaŋnɔɔ?’

Mi poo mulul ndu aa: ‘Po Sameeliaŋnɔɔ. Kanifuule, ndu tuinuŋ po nda lɔɔ koŋndo inyɛɛ ni.’

Mi Chiisu dimul ndu aa: ‘Tonya ŋ dimi ni. Mɛɛ num bɛɛ kɔ bii acheleŋnda lende.’

Vɛ, a kaala mɛɛ Chiisu pɛɛku yɛ le? Te o wa pɛ miŋ yaŋ Chiisu nilaŋ nduyɛ miŋ tol nyɛ o dimul naa o Baabuiyo niŋndo kɔɔli, ŋ pɛɛku nyɔŋ siaama.