NUAWƆ suɛi wɔɔŋ yɔŋnuŋ naŋ nde. A dii Chiisu pɛ. A landu ndu o yɔmndo choo. A baŋ ndu lɔndimɛiyoŋ o balaŋ a o peloŋ peŋ peŋ. Le yɛɛ nda tosa yɛ i waa naa a Chiisu?

Kanifuule, waŋnda apum ndaa tul bɔɔ Chiisu yɛleŋ. A sina wanaa cho kaŋnda? Waŋndo o pilɛ o waŋnda haa tɛɛŋ cho Setana nyina wɔɔŋndo ni. Loonuŋ maa Setana tosa ni mi Adama nda Ifi kɛɛ Jɛhowa diomndo tueiyɔɔ. Ndu ko tosa ni mi waŋnda haa tosal Chiisu iwɔɔŋ waa naa.

Tuupa ma huŋ baŋ ndu o yɔmndo hoo choo, yaamɔɔwaa nduaa tosal ndu fɛŋ sɔɔŋ wɔɔŋ cheleŋ. Yiyaŋndɔ mɛɛ nda kɔ bii ndu o kpeloo Kɛsɛmani yɛ. Nɛɛ waa wa yɛ yaamɔɔwaa kɔ bii ndu kaŋ nda? Simlachiaa lepiɛiya kpeekpei wa yaamɔɔwaa kaŋ ni. Mɛɛ nda kɔ bii ndu, yɛɛ ndoo yɔŋnuŋ yɛ? Ŋ nuaŋnuŋndɔ.

Mɛɛ simlachiaa lepiɛiya bii Chiisu, mi buɛiyaa nduaa kpou mal ndu ma nyaanuŋ. Ma mɛi Chiisu ndu pilɛ kpe yaamɔɔwaa nduaa o ba. Le mɛɛ sioonde ndii bii nda yɛ nda tosa hei ni. Kɛ, Pitɛ nda Chɔŋ ndaa kue landaŋ te. Ma tual waŋnda kɔɔli le sinaa nyɛ cho yɔŋnuŋ a Chiisu wo.

Mi wanaa soliaa salaa o Mɛlɛka lo le Chuuwa kua a Chiisu naa Anas cha. Anas hoo bɛɛ wa paandu masa wanaa soliaa salaa. Kɛ faŋgaa hoo viu loŋ te. Ma huŋ vɛlɛ a Chiisu o Kayafaa lo. Kayafaa wa masa wanaa soliaa salaa teleŋ koŋ ni. Mi simlachiaa lepiɛiya chuuŋgiaŋ o Kayafaa lo bɛɛ tau.

O Kayafaa lo naŋ nda kandu Chiisu kɔɔsaa ni. Ma huŋ a seiya le seile lachoowaleŋ Chiisu timbullo. Mi simlachiaa lepiɛiyaa chuuŋgiaŋ kaŋ loŋ nda kpou dimi aa: ‘Chiisu nɔ mbo sɔla piɔmndo.’ Okoŋ ma tufu ndu lɔluaŋ o hɔl. Ma kandu ndu lɔɔ a bɔtalaŋ.

Teleŋ koŋ hueiye wa misisi. Mi waŋnda kiisuu yiŋndeŋ o bɛɛ le haŋgɔɔ. Teleŋ sɔɔŋ muŋ wa yɔŋnɔŋndo wo, Pitɛ wa haŋgɔɔ latulu nda ndaa. Mi chuaambɔ tosa wallo chiɛiniŋ loŋ ndo nua Pitɛ chiŋ mbo dimi aa: ‘Poo hoo waa wa Chiisu kɔɔli ni.’

Mi Pitɛ muli aa: ‘Sako bɛɛ, I ve ndu kɔɔli le.’

Bɛmbɔɔ leyaa waŋ waŋnda dimi ni maa Pitɛ wa Chiisu kɔɔli. Kɛ teleŋ o teleŋ nda dimi pɛ, o viinuŋ pɛɛ pɛɛ. Mɛɛ Pitɛ viinuŋ Chiisu viinɔŋ yaa ndɔɔ, mi Chiisu muliŋ mbo nua ndu. Mi Pitɛ kial suei le choola o dimilaŋ ndaŋ. Mɛɛ mbo fula waŋnda tɛɛŋ mbo kɔ chaŋ chaŋndo pila.

A yɛŋnde helaaleŋ o Chimɛiyo choo, mi wanaa soliaa salaa o Mɛlɛka lo le Chuuwa, kua a Chiisu o toŋgo nda bɛndu kialaa ŋyamaa niŋ. Loŋ nda kɔ kɛɛsiaa ni le nyɛ nda cho Chiisu tosallo. Okoŋ ma kua a ndu o Pɔŋtiɔɔ Paile lo. Paile wa masa ibuŋgaa le tanda Chudiaa wo teleŋ koŋ ni.

Mi wanaa soliaa salaa o Mɛlɛka lo le Chuuwa dimul Paile aa: ‘Poo hoo niŋ te, o nɔ mbo sɔla piɔmndo.’ Mɛɛ Paile chii Chiisu nyuuniaa, mbo dimul nda aa: ‘I chi suɛi wɔɔŋ o suɛi wɔɔŋ poo hoo tosa le.’ Okoŋ, mi Paile yɔŋ nda naa Hɛlɔɔ Aŋtipaa cha. Hɛlɔɔ Aŋtipaa yɛ, ndu wa masa bɛndoo le lɛŋnde Kalilileŋ teleŋ koŋ ni. Kɛ Chulusalɛm o wa ichali ni. Hɛlɔɔ bɛɛ chi nyɛ o nyɛ wɔɔŋ Chiisu tosa le. Okoŋ, mi ndu bɛɛ miŋgi nda vɛlɛ pila naa Paile cha.

Mɛɛ nda hiŋ, mi Paile yeema le Chiisu malɔɔ. Kɛ mi yaamɔɔwaa Chiisuaa dimi maa o mal Baluabaa, kɛ o mal Chiisu le. Baluabaa yɛ, viinɔ o wa ni. O chiɛi manyumndo niŋ ndaa dɔu ndu teleŋ koŋ ni. Mɛɛ paaleŋ le kendu, mi Paile soli Chiisu o bɛɛ. Mbo dimul nda aa: ‘La che masa nyaa.’ Mi wanaa soliaa salaa o Mɛlɛka lo le Chuuwa deŋi choo choo kpeleŋ aa: ‘Dii ndu. Dii ndu.’ Mɛɛ mi Paile mal Baluabaa. Okoŋ, mbo mal nda Chiisu o ba le ma kɔ dii ndu.

A teleŋ paale nyumbaŋ ndeŋ kinɛi o Chimɛiyo choo, ma kɔ baŋ Chiisu o yɔmndo choo. Naa nda baŋ Chiisu wa, viiya wa a baŋaa latulu a ndu. Hoo wa o baŋaa o ba kɛndɔɔ choo, mi o pilɔɔ ndu wa o ba miallo choo. Mi ndu wa tɛɛŋ. A chi nda o fotueiyo niŋ naŋ te. Tuupa mi Chiisu wu, mi viyaa nda baŋ kaŋ latulu a ndu wa o pilɛ dimul ndu aa: ‘Loonuŋ a ya Chiisu lɔɔ ŋ cho hunɔɔ wa masa wo.’ Mi Chiisu mulul ndu aa: ‘Mi dimul num hau, a cho wa a ya latulu o Kpele hɛnɛkiɔɔ niŋ.’

Tiindaŋ sɔwɛɔ pila cho hoo ni. A sina kpele hɛnɛkɛ Chiisu wa hoo dimio wo? Kuɛɛ kpele hɛnɛkɛ tase Mɛlɛka ndoo toosiaa wo wa yɛ? O chieeŋndo hoo choo o wa ni. Te Chiisu, wana Mɛlɛka kɛsi masa o choo choo niŋndo hiŋ pɛ a masale ndɔleŋ o chieeŋndo choo, o cho hunɔɔ vɛlɛ poo hoo miŋgi yoomu pila mbo wa achal o chieeŋ sɛnɛiyo niŋ. Ŋ nɔ miŋ wa a kɔl kɛndɛ le hei.