NUAWƆ maalikɛinɔɔ dio chiɛi manyumndo kumbio. Buɛiyaa Chiisuaa o cho haa solio o chiɛi manyumndo niŋ ni. Le yɛɛ nda dɔu yɛ nda o chiɛi manyumndo niŋ? Ŋ nuaŋnuŋndɔ.

Chɔŋ a teleŋ Mɛlɛka ke buɛiyaa Chiisuaa nyina ndɔ diandaa wo, boondii biŋgi koni hiouwɔ ni. Nyɛ yɔŋnuŋ okoŋ kɔɔli wo cho hoo ni: O wa paale pilɛ, a paale chalaaleŋ, mi Pitɛ nda Chɔŋ wa kɔlaŋ o maaŋndo niŋ Chulusalɛm. Loŋ nda komal po bɛvɛiyo ichali o dio ni. Poo hoo yɛ, chɔŋ a lɔɔ nda velu ndu wo, o wa o bɛvɛiyo. Lepaa o lepaa, waŋnda chuaa poo hoo ma kɛsi ndu o dio hoo le wanaa wa luɛiyɔɔ o maaŋndo niŋnda kanioŋ piɛiyo. Mɛɛ o che Pitɛ nda Chɔŋ, mbo nyɔɔlu nda le ma ke ndu nyɛ. Yɛɛnɛ Pitɛ nda Chɔŋ cho yɛ niko tosa?

Mɛɛ ma sim ma wa po bala fondoo hoo tofaa. Mi Pitɛ lo okoŋ mbo dimul ndu aa: ‘I nɔ ikani o ikani le, kɛ I cho num nyɛ ya nɔ wo ke. O diola Chiisu laŋ niŋ, chɔŋ ma kuɛ.’ Mbo saa ndu ba kɛndɔɔ. O le pilɛ niŋ kpe, mbo chaŋ nya mbo sim. Okoŋ, mbo kandu balɔŋndo.’ Mɛɛ waŋnda che hei, mi kɔndɔfillo bii nda tau le suɛi kaamɛi yɔŋnuŋ hei ve.

Mi Pitɛ dimi aa: ‘O kpaaya Mɛlɛkaa niŋ, o soli Chiisu o sɛiyo niŋ mbo miŋgi ndu yoomu wo naŋ tosa kaamaa hoo ni.’ Mɛɛ Pitɛ nda Chɔŋ wa suɛi, mi simlachiaa lepiɛiya apum huŋ ndoŋ. Mi suɛi wa nda nɛiyo tau, kanifuule Pitɛ nda Chɔŋ cho waŋnda dimullo maa Mɛlɛka miŋgi Chiisu yoomu. Lelaŋ, ma saaliaa nda kpau kpau. Ma kɔ dɔu nda o chiɛi manyumndo niŋ.

Diimandɔɔ pilɔɔ, mi simlachiaa lepiɛiya haa bii bɔŋaŋ bɛndoo. Pitɛ ni, Chɔŋ ni vɛlɛa po nda siŋgi koŋndo, ma huŋ a nda o bɔŋaŋndo hoo. Mi simlachiaa lepiɛiya haa nyuna Pitɛ nda Chɔŋ aa: ‘O kpaaya nɛɛnɛ niŋ nya tosa yɛ kaamaa hoo?

Mi Pitɛ mulul nda maa o kpaaya Mɛlɛkaa niŋ o miŋgi Chiisu yoomu wo nda tosa hei ni. Wanaa soliaa salaa o Mɛlɛka lo sina nyɛ nda nɔ ma tosa wo le. Kanifuule a nɔ mɛɛ nda sɛɛŋgiaa nyɛ yɔŋnuŋndo le. Okoŋ, ma sila nda o kala kala maa a dimul lɛ wana o wana a Chiisu okɔɔ le. Mɛɛ ma mal nda ma kuaŋnuŋ.

Lepaa o lepaa, buɛiyaa Chiisuaa wa suɛi a Chiisu okɔɔ nduyɛ ma siŋgi wanaa wa a naalaŋnda. Mi tɔɔ tiu silɔ a kaamaala nda wa laŋ tosaa laŋ. Wanaa wa o chieeŋ muŋ balu Chulusalɛmndoŋ, ma huŋ a wanaa ndaa lanaa wa le mi buɛiyaa Chiisuaa siŋgi nda. Mi hei tosa mi simlachiaa lepiɛiya duaŋ tumbe tau. Okoŋ, ma bii nda vɛlɛ ma kɔ dɔu nda o chiɛi manyumndo niŋ. Kɛ a viu loŋ tau le.

Mɛɛ nyumndaŋ ma tol, mi maalikɛinɔɔ huŋ soli nda o chiɛi manyumndo niŋ a mɛɛ ŋ cho chɔɔ naa yɛ. Mi maalikɛinɔɔ dimul nda aa: ‘La kɔ sim o chiɛi Chuuwa soli salaa wo mila hiou lachi a suɛi o waŋnda lo.’ Mɛɛ paaleŋ le sɛ diimandɔɔ, mi simlachiaa lepiɛiya viam puaa o chiɛi manyumndo le ma kɔ huŋ a nda. Kɛ a komal wana le. Nyɔɔ viouwɔɔ kpɛɛ, ma komal nda waŋnda pɛɛkoo o maaŋ Mɛlɛkaa niŋ. Okoŋ, ma huŋ a nda o toŋgo nda bɛndu dimiaa ŋsɔɔ niŋ.

Mi simlachiaa lepiɛiya dimul nda aa: ‘Ŋ dou nya sawaa o kala kala maa la pɛɛku lɛ waŋnda a Chiisu okɔɔ le. Kɛ Chulusalɛm pɛ cha a pɛɛku la nyalaŋ.’ Okoŋ, mi buɛiyaa Chiisuaa mulul nda aa: ‘Nyɛ Mɛlɛka dimul naa wo, ndu naŋ nɔ ni miŋ tosa, o cho nyɛ waŋnda chieeya dimi wo le.’ Chɔŋ a boondii keŋ mbo kua kɛ, a wa tuŋ hiouwɔɔ lachi a “yooŋgu kɛndɔɔ” dimio. Vɛ, hei cho tamasi kɛndɛ le miŋ tuula le?