MƐƐ Pitɛ nda Chɔŋ faŋaŋ o sɛi nda chɔ Chiisu wo, mi Meele lo loŋ ndu pilɛ kpeele. Mɛɛ okoŋ mbo kandu chaŋndo. Mi Meele tunduŋ mbo nua o sɛi buuloo niŋ a mɛɛ naŋ che o fotuei koŋ niŋ kɔɔli yɛ ko ni. Mɛɛ o nua leniŋ, mbo cha maalikɛiya nda ŋiɔɔŋ. Ma nyuna ndu aa: ‘Chaŋ yɛɛnɛ ŋ cho yɛ?’

Mi Meele muli aa: ‘Masanɔ nuu nda chua ni, nduyɛ I sina ba nda hiou a ndu le.’ Mɛɛ mi Meele muliŋ mbo cha poo isisi. Mi poo nyuna ndu aa: ‘O nɛɛnɛ ŋ cho yɛ nuuviaa?’

Meele wa ko kɔl maa wana tosa wallo o kpele koŋ niŋndo ni. Okoŋ, mbo dimul ndu aa: ‘Fallo, te num chua dialuŋ ndɔŋ ni, mɛɛ chɔm ya naa ŋ hivi muŋ nda.’ Kɛ o kpeekpei niŋ, Chiisu wa poo hoo ni. Dialuŋ ndoo nɔ woŋ tosa ni Meele sina ndu le. Kɛ mɛɛ o veelu diola ndɔlaŋ, mi Meele sina maa Chiisu ni. Mɛɛ mi Meele nyaanuŋ mbo kɔ dimul buɛiyaa Chiisuaa aa: ‘I che Masanɔɔ.’

Mɛɛ nyɔɔ viou kpɛɛ o paale pilɛleleŋ choo kpe, mi puaa laalaŋnda apum nda ŋiɔɔŋ wa kɔlaŋ o sɔndɔkɔlɔɔ pum diolaŋ Ɛmayɔɔ. A lo kɔlaŋ mi poo pum tual nda kɔɔli. A wa a kɔl tambɛiyo le mɛɛ nda dii Chiisu yɛ. Kɛ mɛɛ nda wa kɔlaŋ latulu, mi poo hoo wa nda tɛɛsiallo sɔɔŋ tau o Baabuiyo niŋ. Ma naŋ kɔl tau. Mɛɛ nda fuuluu ma wa nyɛdiaa dio, mi puaa haa sina niko maa Chiisu cho poo hoo ni. Okoŋ, mi Chiisu lo nda o hɔl pɛ. Ma miiŋgu chɔ chɔ Chulusalɛm le ma kɔ dimul buɛiyaa nduaa a ndu okɔɔ.

Nda cho malɔɔ le miiŋgoo Chulusalɛm, mi Chiisu fula Pitɛ o hɔl. Mɛɛ buɛiyaa tuaa tuei a ndi okɔɔ, ma naŋ kɔl tau. Okoŋ, mi puaa laalaŋaa ŋiɔɔŋnda haa fuuluu niko Chulusalɛm ma komal buɛiyaa nduaa loŋ. Mi nda bɛɛ dimul nda a mɛɛ Chiisu fula nda o hɔl o nɛi yɛ. Mɛɛ nda wa konaa dɔunɔŋndo, a sina pa suɛi kaamɛi ndii yɔŋnuŋnde?

Nuawɔ fotueiyo hoo. Chiisu fula nda o hɔl chiɛiniŋ mi che bɛɛ naa dio cho o kindaa. Buɛiyaa nduaa cho a kɔl kɛndɛ tau. Paale kɔl kɛndɛ leŋ pila le cho leŋ ni. A nɔla ma chɔm mɛɛ kpɛ Chiisu fula niŋ buɛiyaa nduaa o hɔl yɛ? Bɛmbɔɔ le ŋuɛɛnu pa ŋ chɔm ni?

Teleŋ Chiisu wa buɛiya a piliaa fulaa o hɔllo, Tɔmɔsi ve latulu a nda le. Mɛɛ mi buɛiyaa Chiisu fula o hɔlla dimul ndu aa: ‘Ŋ che Masanɔɔ.’ Kɛ mi Tɔmɔsi dimi maa mɛɛ mi ndupila che Chiisu pɛɛŋ malaŋ o laalaŋ. Mɛɛ palɛi hiou iŋɔmaa, mi buɛiyaa Chiisuaa chuuŋgiaŋ vɛlɛ naapilɛ chiɛiniŋ. Tɔmɔsi wa niŋ a nda latulu. O le pilɛ niŋ kpe, mi Chiisu fula nda o hɔl chiɛiniŋ. Okoŋ, mi Tɔmɔsi laalaŋ niko.