ASINA pa po del hoo lɛŋndo? Sɔɔl cho hoo ni. Loonuŋ maa ndu wa domala puaa dii Tiiviŋnda lehɔl ni. Nuawɔ paŋgele diandaa hoo. O yɛɛnɛ cho yɛ yɔŋnɔŋndo?

Mɛɛ nda chii Tiiviŋ diyɔɔ, mi Sɔɔl chua chilaŋ le wanaa laalaŋaa Chiisuaa pɛlɛleŋ le nda nyɛpalaa tuisio choo. O wa kɔlaŋ nda nuuviaa chiɛiyo a chiɛiyo. Wana o wana o che pɛ, o bii ndu kpau o dɔu ndu o chiɛi manyumndo niŋ. Mi buɛiyaa Chiisuaa a ka ka sɔɔndiaŋ o chieeŋ cheleŋndoŋ niŋ. Nduyɛ chieeŋ nda kuɛ woŋ, ma kandu “yooŋgu kɛndɔɔ” dimio. Kɛ mi Sɔɔl kua vɛlɛ o chieeŋ muŋ niŋ nda nuuviaa. O cho niko nɛi tɛɛŋ le kɔlaŋ Damasikɔɔ. Kɛ mɛɛ o wa kɔlaŋ, mi suɛi kaamɛi pum yɔŋnuŋ.

O lepilɛ niŋ kpe, mi paŋgele diandaa chaŋ o choo choo niŋ mbo tiu Sɔɔl choo silɔ. Mɛɛ mbo del lɛŋ, a mɛɛ naŋ cho naa chɔɔ yɛ koni. Okoŋ, mi diomndo suaa aa: ‘Sɔɔl, Sɔɔl, vɛ ma wa ya nyɛpalaa tuisio choo?’ Mi puaa wa a Sɔɔl latulu wa cha paŋgeloo hoo, nduyɛ ma tuɛi vɛlɛ diomndo. Kɛ a bii nyɛ nda tueiyo bila le.

Mi Sɔɔl nyuna aa: ‘Num nɛɛnɛ Masanɔɔ?’

Mi diomndo mulul ndu aa: ‘Ya Chiisu ni, wana ŋ cho nyɛpalaa tuisioo choo wo.’ Chiisu dimi hei fuule, kani, te Sɔɔl tuisi pɛ buɛiyaa nduaa nyɛpalaa choo, mɛɛ ndu o tuisi koŋ choo ni.

Mi Sɔɔl nyuna aa: ‘O yɛɛnɛ ya tosa yɛ Masanɔɔ?’

Mi Chiisu mulul ndu aa: ‘Chɔŋ ma kuɛ Damasikɔɔ. Loŋ nda cho num dimul nyɛ ŋ nɔ le tosaa wo ni.’ Mɛɛ Sɔɔl chɛŋ mbo kumbi hɔltaŋ, oo chi nyɛ o nyɛ le. Mi puaa nda wa kɔlaŋ latulu wa saa ndu baa, ma kua a ndu Damasikɔɔ chiee.

Mi Chiisu suaa o buɛiyaa nduaa lo o pilɛ Damasikɔɔ aa: ‘Ananaaya, chɔŋ ma kuɛ o nɛi nda veelu aa nɛi Sakpoo wo. A kuɛ pɛ o chiɛi Chudaa, a nyuna le po nda veelu aa Sɔɔllo. I hɛli ndu le mbo wa buɛi ni.’

Mi Ananaaya diikuŋ mbo kua. Mɛɛ o komal Sɔɔl, mbo handu ndu balaŋ choo. Mɛɛ mbo dimi aa: ‘Masanɔɔ vem ya ni le mi tosa ma che vɛlɛ, nduyɛ, ma sɔla nyina diandaa Mɛlɛkaa.’ O lepilɛ niŋ kpe, mi nyɛlaŋ lapum la fula ndu o lahɔl maa lakɛkɛl. Mɛɛ la deli, mbo kandu vɛlɛ chɔɔ.

Mi Chiisu soliŋ Sɔɔl kpeku le yooŋgu kɛndɔɔ dimio o kaala siaama lo. Mbo sɔla veelɔŋndo aa kiilanɔɔ Pɔɔl. Ŋ cho hunɔɔ pɛɛku a Pɔɔl okɔɔ tau. Kɛ tuupa miŋ pɛɛku a ndu okɔɔ, ŋ tofaŋndɔ fɛŋ nyɛ Mɛlɛka vem Pitɛ le tosaa wo.