BUƐIYAA Chiisuaa cho haa kpou ni. A diikuŋ ndu ma wa chumndo Chulusalɛm. Mɛɛ nda wa chumndo loŋ, mi bɔɔluu bɛndoo pia cha o chiɛi nda wa wo niŋ. Wanaa tuei pɛ aa hueiyii bɛnduei cho hɔŋndo ni. Nyɔɔ chal wana o wana fee o lebol maa leyiŋ. A cho nda pa chɔɔ nyɔɔ o lebol maa leyiŋ? Yɛɛnɛ o sim yɛ?

Kaamaa ni. Chiisu miiŋguŋ choo choo naa Finya ndɔ cha. Nduyɛ, finya ndɔ ke buɛiyaa nduaa nyina ndɔ diandaa hoo ni. A sina nyɛ nyina diandaa hoo mala nda ma tosa wo? O mala nda mi nda kpou kandu suɛi o sɔɔŋ maŋgalaŋ yɛ yɔŋ niŋ.

Wanaa bɔɔ bɔɔ Chulusalɛm ma tuɛi bɔɔluu wa hoo maa ihueiyo. Okoŋ, ma huŋ le ma che nyɛ cho yɔŋnɔŋndo wo. Isɔluɛitiiya ndaa nɔ dunyɛi pum ma veelu ndi aa Pɛntikɔsi. Mi waŋnda apum fula o kaala cheleŋndaŋ niŋ ma huŋ o dunyɛi hei. Ma tuɛi buɛiyaa Chiisuaa suɛi o sɔɔŋ ndaŋ maŋgalaŋ niŋ a sɔɔŋ kɔndɔfili Mɛlɛka tosa woŋ.

Mi wanaa yilaa haa wa dimio aa: ‘Kalili waŋnda haa fula ni.’ Okoŋ, ma nyuna aa: ‘Kɛ vɛ mi nda kpede wa suɛi o sɔɔŋ maŋgalaŋ yɛ yɛ naŋ dimi o lɛŋii nɛi niŋnde?’

Mi Pitɛ sim mbo wa nda tɛɛsiallo. Mbo dimul waŋnda haa a mɛɛ nda dii Chiisu yɛ, nduyɛ a mɛɛ Mɛlɛka soli ndu o sɛiyo niŋ yɛ. Mi Pitɛ hiau lachi a nda tɛɛsiallo aa: ‘Chiisu cho niŋ choo choo ichali o ba kɛndɛ Mɛlɛkaa choo. Nduyɛ, o sabu ndɔɔ niŋ Mɛlɛka ke naa nyina ndɔ diandaa ni. Le sabu koŋ nya che ni, nduyɛ, mi la tuɛi kaamaa Mɛlɛkaa hoo.’

Mɛɛ Pitɛ chii sɔɔŋ muŋ dimi kpede, mi wanaa bɔɔ bɔɔ bii mɔnɛi le nyɛ nda tosal Chiisu wo. Okoŋ, ma nyuna Pitɛ aa: ‘Yɛɛ naŋ nɔ yɛ niko miŋ tosa?’ Mi Pitɛ mulul nda aa: ‘La nɔ mila mal yɔŋnda nyala wɔɔŋndaŋ, nduyɛ mila sɔla yiŋɔɔ.’ O paleleŋ choo kpeekpei, waŋnda 3,000 sɔla yiŋɔɔ ni ma simnuŋ buɛiya le Chiisu.