NUAWƆ se dɛndɔɔ hoo o kpundɔɔ niŋ. O cho yomi yomio a buŋgaŋ. A cho pa chɔɔ wanaa deli kaŋ o mɛŋndaŋ niŋ nda? Apum cho niŋ helɔɔ o kɔŋgɔ. Pɔɔl cho hoo nda ni. Ŋ nuaŋnuŋndɔ nyɛ wa nda yɔŋnɔŋndo wo.

Loonuŋ maa le wɔsioŋ ŋmuuŋ Pɔɔl wa o chiɛi manyumndo niŋ Sisaliaa. Okoŋ, ma wou ndu nda wanaa cheleŋaa wa o chiɛi manyumndo niŋnda o dɛndɔɔ niŋ le kɔlaŋ Luom. Mɛɛ nda kei o lɛŋnde ibuŋgaleŋ Kileti, mi hueiyii bɛnduei suŋgu hɔŋndo. Mi i huaŋ hɔŋndo pila. Nduyɛ, a nɔla dɛndɔɔ bolleŋ simi le. Paaleŋ bɛɛ ndaa chi ipala le kɛlɛŋgaa mi ndaa che looŋ ichɔl. Mɛɛ hueiye lambaŋ hɔŋndo, wanaa wa o dɛndɔɔ niŋnda kpede, ndaa nɔ lɛ tiindaŋ kindaa le.

Okoŋ, mi Pɔɔl sim mbo dimul wanaa wa o dɛndɔɔ niŋnda aa: ‘Wana pilɛ bɛɛ cho wu le. Dɛndɔɔ koni cho tambu ni. Chɔchɔl, mi maalikɛinɔ Mɛlɛkaa huŋ naa ya cha mbo dimulla aa: “Siooŋii bii num te Pɔɔl. A cho isisi masa bɛndoo o hɔl Luom ndu cho yɛ Siisa ni. Mɛlɛka cho num kiindiaa nya wanaa nya cho kɔlaŋ latulu o dɛndɔɔ niŋnda.”’

O wa niŋ malɔ 14 ichɔllo pum, a ditɛɛŋndo, chɔŋ a teleŋ hueiyii bɛnduei kanduŋndo, mi wanaa kua a dɛndɔɔ wa sina maa mɛŋndaŋ ma yiŋgila lɛ lapi le. Nduyɛ, o nyumndaŋ niŋ nda wa ni. Sioonde wa nda yɔŋi nda kɔ kunduŋ o pouwo. Okoŋ, ma tuisi nyɛm simi dɛndɔɔ woŋ o peelo. Diimandɔɔ pilɔɔ, ma cha kɔŋgɔɔ. Mɛɛ ma kindiŋ le ma kuɛ a dɛndɔɔ o kɔŋgɔ nda che koŋndo.

Mɛɛ nda kandu fuuloo o kɔŋgɔɔ ikɛi, mi dɛndɔɔ kunduŋ o siooŋii kundɛi mbo sim. Mɛɛ mi hueiye kandu ndu koŋɔɔ wɔɔŋ wɔɔŋndo, mi dɛndɔɔ kandu yomi yomio buŋgaŋ. Mi sowɛinɔ wa nda bolleŋ ndo dimi aa: ‘Nya chaa saanaa wa kinɛi, la del fɛŋ a saanaa mi la taŋ. Mbo dimul a tuaa aa nya taŋ o nyɛm dɛndɛ yomi woŋ choo.’ Lende kpeekpei nda tosa ni. Waŋnda 276 wa o dɛndɔɔ hoo niŋ ni. Mɛɛ nda tosa lende, wana o wana yɔŋnuŋ nyɛ le. Mi nda kpou kinda a mɛɛ maalikɛinɔ Mɛlɛkaa dimul Pɔɔl yɛ koni.

O Lɛŋnde ibuŋgaleŋ Malta sɔɔŋ muŋ yɔŋnuŋ ni. Wanaa wa loŋnda ndaa nɔ bɔɔ kɛndɛi. Ma tosal wanaa wa haa o dɛndɔɔ hoo niŋ nda kɛndɛi tau. Mɛɛ boondii wɔɔŋii keŋ ihiou, ma wou Pɔɔl o dɛndɛ cheleŋ niŋ ma kua a ndu Luom.