TAA wanaandɔ, yɛɛ cho yɛ hoo yɔŋnɔŋndo naŋ? Baa yɔŋulɔŋndo poombɔ hini hoo lɛŋndo yɔŋuluŋ ni? Nuawɔ se waŋnda fulaa chiɛiniŋ. Pɔɔl cho loŋ. Timotii bɛɛ cho loŋ. Baa o wundɛiyo poombɔɔ hoo fula ni mbo del?

Lende kpeekpei i yɔŋnuŋ ni. Hei yɔŋnuŋ teleŋ Pɔɔl wa suɛi o wanaa laalaŋnda lo Towaa wo. Idiiyo, Pɔɔl ndoo nɔ le luɛiyɔɔ o dɛndɔɔ niŋ mi ndoo kuɛŋnuŋ. Nduyɛ, te o kuɛ pɛ, a yala niŋ chiikaŋ te. Lelaŋ, mbo lo suɛi o ndalo tei mi ditɛɛŋndo tɛnda.

Poombɔ del hoo wo diolaŋ aa Yutikɔɔ. Yutikɔɔ ndu wa ichali o wundɛiyo teleŋ Pɔɔl wa suɛiyo. O lo ichali loŋ mi luaŋ ma hialu ndu. Mɛɛ mbo fula o wundɛi koŋ fɛɛ mbo huŋ del lɛŋ kpɔl. Chiɛiyo hoo yɛ chiɛi choo choo o cho ni. Ndoo nɔ helɔɔ leyaa. Nyɛ koŋ ŋ cha naa waŋnda buulaŋ bɛndoo ni. Mɛɛ nda huŋ chua ndu lɛŋ, o wa niŋ o vilɛiyo.

Mɛɛ Pɔɔl che maa poombɔɔ hoo vi, mbo tunduŋ ndu choo, okoŋ, mbo kɔmaŋ ndu. Mbo dimul waŋnda aa: ‘La buulaŋ te, o cho yoomu.’ Nduyɛ mi poombɔɔ hoo miiŋgu yoomu. Nuawɔ se kaamaa Pɔɔl tosa wo. Mi faŋga bɛndoo hoo naŋ kɔl tau le hei.

Mi nda kpede miiŋgu vɛlɛ o chiɛi choo choo amaluaŋ. Ma dia nyɛdiaa. Mɛɛ nda chii nyɛdiaa dio, Pɔɔl lo niŋ suɛi tei mi paaleŋ le sia. Kɛ Yutikɔɔ miiŋgu lɛ o malɔ le. Mɛɛ paaleŋ le sɛ, mi Pɔɔl nda Timotii a wanaa nda cho kɔlaŋ latulu wa luɛi o dɛndɔɔ niŋ. A sina naa nda cho kɔlaŋ nda?

Pɔɔl ndoo chii niŋ balɔɔ yaandɔɔ yooŋgu kɛndɔɔ dimi. O ndulo chiee o wa niŋ kɔndaŋ ni. Mɛɛ o wa miiŋgɔŋndo, mbo kei Ɛfisɔɔ ndupilɛ kpeele. O tosa loŋ wɔsioŋ ŋgaa. Balɔɔ yaandɔɔ hoo o hiou viouwɔɔ a o diiŋndɔɔ.

Mɛɛ o mal Towaa, mi dɛndɔɔ kei isisi Miletɔɔ waali. Ɛfisɔɔ ndoo bendu a Miletɔɔ le. Okoŋ, mi Pɔɔl yɔŋ yooŋgoo o bɛnduaa kundaa lo Ɛfisɔɔ le ma komal ndu Miletɔɔ hali kpeŋ mbo suukaŋ a nda suukaŋ mɛɛlaa. Mɛɛ dɛndɔɔ hiŋ niŋ le kɔndaŋ, mi bɛnduaa kundaa haa tambu kɔl tau le mɛɛ Pɔɔl hiŋ nda mɛiyo yɛ.

Mɛɛ mi dɛndɔɔ huŋ vɛlɛ Sisaliaa pila. Filipi o bɛŋgu choo Pɔɔl wa Sisaliaa ni. Sisaliaa naŋ Akabɔɔ wana ndoo suaa le Mɛlɛka wo sila Pɔɔl ni. Mbo dimul ndu maa te o kuɛ pɛ Chulusalɛm, a cho ndu dɔuwɔɔ o chiɛi manyumndo niŋ. Nduyɛ lende kpeekpei i yɔŋnuŋ ni. Mɛɛ Pɔɔl chii wɔsioŋ ŋmuuŋ o chiɛi manyumndo niŋ Sisaliaa, ma yɔŋ ndu Luom le mi masa bɛndu Luomaŋnda kɔ kɔɔsa ndu. Mɛɛ nda wa kɔlaŋ Luom, ŋ nuaŋnuŋndɔ nyɛ kei nda yɔŋnɔŋndo.