TIIVIŊ baŋ hoo wulaŋ lɛŋ ni. Buɛi laalaŋ Chiisoo o cho ni. Kɛ nuawɔ nyɛ nda cho ndu tosallo wo. Puaa haa cho ndu vii viiyo a poutaŋ. Le yɛɛ nda tul lɛ Tiiviŋ yɛle waa naa? Nduyɛ, le yɛɛ nda cho yɛ ndu suɛi wɔɔŋ waa naa tosallo? Ŋ nuaŋnuŋndɔ.

Mi Mɛlɛka ke Tiiviŋ kpaayaa le sɔɔŋ kɔndɔfilloŋ a kaamaalaŋ tosaa. Puaa haa yeema ma che hei le. Lelaŋ, ma biyaŋ sɛɛŋgiaŋndo a Tiiviŋ le mɛɛ o cho waŋnda tonyaa pɛɛkoo yɛ. Kɛ mi Mɛlɛka ke Tiiviŋ taasioo mbo chɔɔmuu pɛɛkula ndala lachoowalaŋ. Mi hei tosa mi puaa haa tuulu kɔl tau. Mɛɛ ma del ndu choo. Okoŋ, ma veelu waŋnda le ndu seile lakafaleŋ timbullo.

Mi masa wanaa soliaa salaa o Mɛlɛka lo nyuna Tiiviŋ aa: ‘Tonya sɔɔŋ muŋ kpou cho ni?’ Mi Tiiviŋ mulul ndu o Baabuiyo niŋ. O mɛɛlulaŋ kpɔŋ, mbo chɔm a mɛɛ puaa wɔɔŋnda haa tul wanaa suaa le Jɛhowaa leyɛ yɛ. Mi Tiiviŋ hiau lachi a dimio aa: ‘Mɛɛ waŋnda haa wa yɛ koni nya bɛɛ cho ni. Mi la dii Chiisu, Po Mɛlɛkaa. Nduyɛ, la diikuŋ sawala Mɛlɛkalaŋ te.’

Mi hei tosa mi simlachiaa lepiɛiya tuulu kɔl tau. Ma tuulu kɔl ŋama ŋama a suɛi nɛiyaŋnde. Kɛ mi Tiiviŋ heelu hɔlla choo choo mbo dimi aa: ‘La nuawɔ, I che Chiisu isisi o ba kɛndɛ Mɛlɛkaa choo o choo choo niŋ.’ Mɛɛ nda tuei hei, ma wounuŋ sooŋ o lani. Ma kɔ del ndu choo mɛɛ nda cho kpede. Ma kua a ndu sasɔɔ kuu ma faŋa ndu chiee.

Mɛɛ nda hiŋ a ndu, ma soli domala ndalaŋ. Okoŋ, ma ke po chua piaandoo hoo diolaŋ aa Sɔɔl, le mbo biilul nda pɔɔ. A cho pa Sɔɔl chɔɔ isisi? Mɛɛ mi puaa apum kandu Tiiviŋ vii viiyo a poutaŋ. O keŋ niŋ, mi Tiiviŋ baŋ wulaŋ lɛŋ a mɛɛ ŋ cho naa chɔɔ yɛ koni. Okoŋ, mi Tiiviŋ piɛi o Mɛlɛka lo aa: ‘Jɛhowa, tuisi nda nyɛpalaa choo le suɛi wɔɔŋ nda cho hei tosaa ve le.’ Mɛɛ Tiiviŋ chii hei dimi, mbo malnuŋ kɔl. Tiiviŋ sina maa, simlachiaa lepiɛiya hiou puaa apum kɔɔli ni le i waa naa tosaa.

Te waŋndo tosal num pɛ suɛi wɔɔŋnde, kindiŋndo num bɛɛ cho ni le ma miŋgul ndu, baa dimio ŋ cho ni maa Mɛlɛka tuisi ndu nyɛpalaa choo? O cho lende le Tiiviŋ tosa le. Nduyɛ, Chiisu bɛɛ tosa lende le. Mi che bɛɛ naa mi waŋnda tul nda yɛleŋ, a wa wanaa kɛndɛ o nda lo mɛɛ nda cho kpede. Ŋ kindiŋ miŋ tuula tamasi ndaa.