ATIU pa ba ma chɔm nyɛ chuaambɔ pɔmbɔɔ hoo a chaaŋaa nduaa cho nuaa leniŋndo? O yauwo hoo niŋ kpeekpei nda cho nuaa ni. Yau Ni Bundɔŋ Baabuiyo. A cho nuaa o bundɛi num bɛɛ cho hei nuaa leniŋnde. Ndi cho ni, “Yɛɛ Naŋ Tosa Yɛ Miŋ Wa Achal Lefafɛɛŋ?”

Te ŋ yeema pɛ le miŋ wa achal lefafɛɛŋ, nyɛ tasoo cho ni, ŋ nɔ miŋ sina a Jɛhowa okɔɔ vɛlɛa Po ndɔɔ Chiisu Kiliti. Ndi chuaambɔɔ hoo a chaaŋaa nduaa cho tosaa naa ni. Mi Baabuiyo dimi aa: ‘Nɛi yoomu fafɛɛŋndo cho hoo ni. Pɛɛkoo a Mɛlɛka tonyaa okɔɔ ndupilɛ kpe, vɛlɛa wana o vem o lɛŋndeŋ choo naŋndo, Chiisu Kiliti.’

Vɛɛ naŋ pɛɛku yɛ a Jɛhowa okɔɔ vɛlɛa Po ndɔɔ? O tasoo cho ni, nuaa o Yau Ni Bundɔŋ Baabuiyo hoo niŋ, chɔŋ o kandɔŋndo mbo huŋ bii o mɛɛlulaŋ. O dimul naa sɔɔŋ bɔɔ bɔɔ a Jɛhowa okɔɔ vɛlɛa Chiisu. Vɛ, lende le? Nduyɛ, o chɔm naa vɛlɛ sɔɔŋ bɔɔ bɔɔ a nyɛm nda tosa niŋndoŋ okɔɔ vɛlɛa nyɛm nda nɔ le hunɔɔ tosaa o chilaŋ niŋndoŋ. Kɛ ŋ nɔ sɔɔŋ cheleŋ tau le tosaa mbo hiau nuaa o yauwo hoo niŋ.

A cho pa chɔɔ yau cho hoo o kɛsiaa lɛŋndo? Baabuiyo ni. Nuuviaa waŋndo mbo nuel num naa bundɔŋ muŋ fula o Baabuiyo niŋnda. Baabuiyo chɔm naa mɛɛ naŋ looku miŋ piɛi Jɛhowa o nɛi sakpoo choo yɛ. Nduyɛ, keŋ tosa ni miŋ sɔla yoomu fafɛɛŋndo. Lelaŋ, o wa kaa naa le miŋ wa Baabuiyo pɛɛkoo lɔɔ lɔɔ.

Kɛ pɛɛkoo kinɛi a Jɛhowa okɔɔ vɛlɛa Chiisu Kiliti cho letuu le naa le. O yɔŋ bɛɛ miŋ pɛɛku o hɔbɛi a nda okɔɔ, ŋ sɔla yoomu fafɛɛŋndo lelaŋ te. A sina nyɛ yeemaŋ vɛlɛ wo?

Ŋ nɔ miŋ dɔu nyɛ naŋ pɛɛku wo o wali niŋ. A loonuŋ Chuda Isikaliɔɔ? Buɛiyaa 12 Chiisu Kilitiaa opilɛ o wa ni. Chuda ndoo sina tau a Jɛhowa okɔɔ vɛlɛa Chiisu. Kɛ yɛɛ ndoo yɔŋnuŋ yɛ a ndu? Mɛɛ nyɔɔ viou kpɛɛ, mbo luɛi hɔlteŋ. Okoŋ, mbo pisi Chiisu yaamɔɔwaa nduaa o ba le kaniŋ humboŋ 30. Lelaŋ, Chuda sɔla niŋ yoomu fafɛɛŋ te.

A loonuŋ pa Kɛhasi? Ŋ pɛɛku niŋ a ndu okɔɔ o Bundɛi 69 niŋ. Mi ndoo yeema le sɔlaa nyɛlaŋ a kaniŋ cho le nduloŋ. Okoŋ, mbo dimi choolaŋ le nyɔŋ muŋ sɔlaa. Le hei, mi Jɛhowa tuisi ndu nyɛpalaa choo. Nduyɛ naa bɛɛ te ŋ bii sawala ndɔlaŋ te, mbo tuisi naa nyɛpalaa choo.

Kɛ wanaa kɛndiaa cho tau a ndaa piɛi Jɛhowa o laalaŋndo choo wa. Ŋ yeema miŋ wa maa nda, lende le? Samiɔŋ cho tamasi kɛndɔɔ opilɛ o naŋ tual kɔɔli wo. Loonuŋ maa ŋ pɛɛku niŋ a ndu okɔɔ o Bundɛi 55 niŋ. Wɔsilaŋ la hiɔɔlu ɔɔ la ŋuɛɛnu kpe o wa ni mbo kandu Jɛhowa piɛiyo o maaŋ ndɔɔ niŋ. Lelaŋ mɛɛ mɛɛ ŋ wa o pɔmbɔ, koŋ chɔm naa maa a cho wɔ bɔɔ o lende le Jɛhowa piɛi le.

Kɛ wana kpeekpei naa kpou nɔ miŋ tuula wo cho Chiisu Kiliti ni. A mɛɛ naŋ pɛɛku o Bundɛi 87 ve niŋ yɛ, Chiisu wa suɛi o maaŋndo niŋ naa waŋnda cha a finya ndɔ okɔɔ, ma che bɛɛ o wa o pɔmbɔ. Lelaŋ ŋ tuulaŋ tamasi ndɔɔ. La ŋ dimuluŋ wana o wana fee naŋ tiu ba a Jɛhowa Mɛlɛka okɔɔ vɛlɛa Po ndɔɔ, Chiisu Kiliti. Te o yɔŋ pɛ miŋ tosa sɔɔŋ muŋ kpou, mɛɛ ŋ tiu niŋ ba miŋ wa o kpele hɛnɛkɛ sɛnɛi Mɛlɛkaa niŋ o lɛŋndeŋ choo.