1. Velaŋ kuɛɛ cho yɛ Kilisiɔŋnda o wɔsiŋ kɛmɛ tasoŋ niŋ tɛɛŋ a Seiyaa Chɛhowaa hau?

 MA DIMI yooŋgu kɛndɔɔ a dialuŋfulaa. Nduyɛ mi kɔlta ndalaŋ la nyindu nda le nɛi chɔmaa, a mala nyina diandaa wa nda kioo wo chɛlɔɔ. Simultaŋ la kuuna nda yooŋgu kɛndɔɔ dimioo le. Nduyɛ mi Mɛlɛka duau nda sala tau. Mi Sɔɔŋ muŋ kpou yɔŋnuŋ Kilisiɔŋnda o wɔsiŋ kɛmɛ tasoŋ niŋ, mɛɛ ŋ cho hau Seiyaa Chɛhowaa yɔŋnɔŋndo yɛ.

2, 3. Sɔɔŋ sɔvɛŋ kuɛɛ cho yɛ o yau Walta Kiilaa niŋ?

² A tonya, a sɔla kɔl dɛɛniaa tau o yau Walta Kiilaa niŋ, o cho o piaa cha a sɔɔŋ kindi tiindaŋ naa woŋ! Yauwo hoo cho bɔɔ teŋgeŋ a la cheleŋ o Baabuiyo niŋ, kanifuule yauwo hoo koni Chɛhowa tosa a sabu ni ma poonyiaa ndu a sɔɔŋ kiilaa tosa o wɔsiŋ kɛmɛ tasoŋ niŋndo okɔɔ, mɛɛ Chiisu kuɛŋ o choo choo niŋ.

³ Yau Walta Kiilaa chɔm diola waŋnda 95, nduyɛ ma fula o lɛŋii yɛ yɛi 32 niŋ, chieeŋ bɛndoŋ 54, a lɛŋii ibuŋgɛi 9. Yau sɔviɔɔ hoo soo a wanaa waŋnda chue a sɔvɛ le wa, wanaa yoŋgaa cho o piɛiyii lachoowɛi niŋnda, masaa heelaŋnda, a wanaa ndaa tusi waŋnda nyɛpalaa choo wa okɔɔ. I hiou kpou ve, o soo a puaapiliaa a ndepiliaa naa o wɔsiŋ kɛmɛ tasoŋ niŋ okɔɔ. Mi simultaŋ la komal nda tau o yoomula ndalaŋ niŋ. Kɛ a koŋ kpou, ma hiau lachi a yooŋgu kɛndɔɔ dimioo a dialuŋfulaa.

4. Vɛɛ naŋ cho yɛ nyɛpilɛ a kiilanɔɔ Pɔɔl, Tabita, a Kilisiɔŋaa laalaŋaa cheleŋ o wɔsiŋ kɛmɛ tasoŋ niŋ?

⁴ O cho niŋ le wɔsilaŋ 2,000 chɔŋ a teleŋ Kilisiɔŋnda o wɔsiŋ kɛmɛ tasoŋ niŋ, mbo huŋ bii a hau. Kilisiɔŋnda haa atiŋ cho yɛ ni, Tabita wana ndoo tosal waŋnda sɔɔŋ kɛndɔŋ ndo, Banabaa wana ndoo nɔ kaalaa a kɛndɛiyo, Lidiaa wana ikɛndɔɔ, Stiiviŋ wana kɔl simulaa, Luku wana chiɔuwaa, a kiilaa dialuŋfulaa haa, Pitɛ nda Pɔɔl. Mi che bɛɛ a wa o wɔsiŋ kɛmɛ tasoŋ niŋ, kɛ ŋ cho nyɛpilɛ naa ndaa o nɛi teŋgeŋndo choo. Le yɛɛ naŋ dimi yɛ lende? Kanifuule wali nda tosa wo, ndu koni naa bɛɛ cho tosaa ni. Ndu cho yɛ waŋnda siiŋguuwo buɛiya ni. (Maa. 28:​19, 20) Bɛɛleŋ pila i cho ni le mɛɛ naŋ sɔla dikeŋnaŋndo le ndu tosaa yɛ!

5. Kuɛɛ buɛiyaa Chiisuaa o wɔsiŋ kɛmɛ tasoŋ niŋ ndaa kandu yɛ yooŋgu kɛndɔɔ dimioo?

 ⁵ Yiyaŋndɔ a wali Chiisu ndoo dimul buɛiyaa nduaa le tosaa wo okɔɔ. Mbo dimul nda aa: “La cho kpaayaa sɔla te nyina diandaa tol nya choo pɛ. Nduyɛ la cho seileŋ timbi a ya okɔɔ o Chulusalɛm niŋ, Chudiaa a Sameeliaa, a ba o ba fee o chieeŋndo choo.” (Walta. 1:​8) I tasei, mi nyina diandaa ke buɛiyaa Chiisuaa kpaayaa le seileŋ timbioo “Chulusalɛm.” (Walta. 1:​1–8:​3) I diiŋ nduɛi, o nɛi chɔmaa nyina diandaa bɛŋgu, ma timbi seileŋ o “Chudiaa a Sameeliaa” niŋ. (Walta. 8:​4–13:​3) Nduyɛ i yaa nduɛi, ma kandu niko yooŋgu kɛndɔɔ dimioo “ba o ba fee o chieeŋndo choo.”—Walta. 13:​4–28:​31.

6, 7. Nyɛm kuɛɛ naŋ nɔ hau le yooŋgu kɛndɔɔ dimioo, ŋ buɛiyaa Chiisuaa o wɔsiŋ kɛmɛ tasoŋ niŋ ndaa nɔ le woŋ?

⁶ Kilisiɔŋaa laalaŋnda o wɔsiŋ kɛmɛ tasoŋ niŋ ndaa nɔ Baabuiyo kpou o ba le yooŋgu kɛndɔɔ dimioo le. Yau Maatiu wo ndoo chuu wɔ poonyiaŋ te haaa a wɔsi 41 o faŋaŋ Chiisu wo kɔɔli. Yaula Pɔɔl laŋ latiŋ la wa la poonyiaŋ tuupa mi yau Walta Kiilaa chuu poonyiaŋ a wɔsi 61 o faŋaŋ Chiisu wo kɔɔli. Kɛ Kilisiɔŋnda o wɔsiŋ kɛmɛ tasoŋ niŋ o kɛ kɛ ndoo nɔ wɔ Baabuiyo kpou, ɔɔ yaula tɔlnuŋ o Baabuiyo choo laŋ le wanaa chɔm yeemɛiya mello le. Tuupa mi Kilisiɔŋaa Chuuwa simnuŋ buɛiyaa Chiisuaa, mi ndaa veelul nda diomndaŋ o yaula maHibuluilaŋ niŋ o chiɛi Chuuwa ndaa piɛi Mɛlɛka wo niŋ. (2 Kɔliŋ. 3:​14-16) Kɛ le mi Kilisiɔŋaa ndaa veelu haa diomndaŋ o yaula maHibuluilaŋ niŋnda ndaa simnuŋ sukuwaa pɛɛkaa Baabui kɛndɛ, mɛɛ mi ndaa loonuŋ bolii Baabuiye ipum.

⁷ Hau, naa a bɔɔbɔɔ nɔ Baabuiyo kpou o ba, nduyɛ a yaula tɔlnuŋ o Baabuiyo choo laŋ tau. Ŋ cho waŋnda siiŋguuwo buɛiya sanaa a yooŋgu kɛndɛ naŋ dimul nda wo hiouwɔɔ lɛŋnde 240, a o sɔɔŋ maŋgalaa bɔɔbɔɔ niŋ.

8, 9. (a) Yɛɛ nyina diandaa mala yɛ buɛiyaa Chiisuaa le ma tosa? (b) Yɛɛ Dialii Kuumbaŋ Choo Ve cho yɛ hau solioo sanaa a mala nyina diandaa?

⁸ Mɛɛ Chiisu wa buɛiyaa nduaa dimullo le yooŋgu kɛndɔɔ dimioo, mbo dimul nda aa: “La cho kpaayaa sɔla te nyina diandaa tol nya choo pɛ.” O nɛi chɔmaa nyina diandaa bɛŋgu, mi buɛiyaa Chiisuaa dimi yooŋgu kɛndɔɔ ba o ba fee o chieeŋndo choo. A mala nyina diandaa, mi kiilanɔɔ Pitɛ a Pɔɔl siŋgi wanaa lanaa wa, ma tuau nyinaa wɔɔŋnda waŋnda kɔɔli, nduyɛ ma miŋgi wanaa vi wa yoomu! Kɛ, ma sɔla kpaayaa nyina diandaa o ba le sabu sɔvɛ cheleŋ. Mbo mala kiilaa a buɛiyaa cheleŋ le waŋnda kɔl kalu kpeekpeiyo kioo o yɔŋgu yoomu fafɛɛŋndo wo.—Chɔŋ 17:​3.

 ⁹ O paale Pɛŋtikɔɔsileŋ choo wɔsi 33 o faŋaŋ Chiisu wo kɔɔli, mi buɛiyaa Chiisuaa kandu “sɔɔŋ maŋgalaŋ yɛ yiɔɔŋ dimioo mɛɛ nyina diandaa ke nda kpaayaa le muŋ dimioo yɛ.” (Walta. 2:​1-4, 11) Kaama yɔŋnuŋ hau le sɔɔŋ maŋgalaŋ cheleŋ dimioo le. Kɛ a mala nyina Mɛlɛkaa, Dialii Kuumbaŋ Choo Ve cho yaula tɔlnuŋ o Baabuiyo choolaŋ solioo o sɔɔŋ maŋgalaŋ bɔɔbɔɔ niŋ. Le tamaseliiyo, ipaŋgu o ipaŋgu, ma soliŋ Bandu Mɛŋgɛlaa a Tiondoo! o miiliɔŋndaŋ niŋ. Tɛɛŋgii nɛi jw.org nɔ yaulaŋ tɔlnuŋ o Baabuiyo choo laŋ a vidueilaŋ o sɔɔŋ maŋgalaŋ niŋ hiouwɔɔ 1,000. Muŋ kpou mala naa ni le ‘sɔɔŋ kɔndɔfiliŋ cho a Mɛlɛka okɔɔ woŋ dimioo’ o lekaa o lekaa, waŋnda suu woo suu, a o isɔɔ o isɔɔ maŋgalaa niŋ.—Sɔɔŋ. 7:​9.

10. Chɔŋ a wɔsi 1989, yɛɛ tosaŋ yɛ niŋ le Baabuiyo hivioo?

¹⁰ Chɔŋ a wɔsi 1989, Dialii Kuumbaŋ Choo Ve handu kɔllo le New World Translation of the Holy Scriptures solioo o sɔɔŋ maŋgalaŋ bɔɔbɔɔ niŋ. A hivi niŋ Baabuiyo hoo o sɔɔŋ maŋgalaŋ niŋ hiouwɔɔ 200, nduyɛ a soli niŋ ndu o miiliɔŋndaŋ niŋ. Nduyɛ a nɔ vɛlɛ le la bɔɔbɔɔ solioo. Sɔɔŋ muŋ kpou cho yɔŋnɔŋndo sanaa a mala Mɛlɛkaa, vɛlɛ a nyina ndɔ diandaa.

11. Yɛɛ Seiyaa Chɛhowaa tosa yɛ niŋ le yaula tɔlnuŋ o Baabuiyo choo laŋ hivioo?

¹¹ Puaapiliaa a ndepiliaa o waalaŋ niŋ fulaa o lɛŋnde hiouwɔɔ 150 niŋ yɔŋguŋ niŋ le wali hivioo hoo tosaa. Hei nɔ mi i bii naa kɔndɔfili kposoŋ te kanifuule, kɔɔna kɛ kɛ cho o chieeŋndo choo mi nyina diandaa wa ndu nɛi chɔmaa kioo le yooŋgu kɛndɔɔ dimioo ba o ba fee o chieeŋndo choo a Chɛhowa okɔɔ, nduyɛ a Masale Mɛsayanɔ kilaŋ niŋ o choo choo niŋndeŋ te!—Walta. 28:​23.

12. Vɛɛ Pɔɔl a Kilisiɔŋaa cheleŋnda tosa yɛ wali dimiaa yooŋgu kɛndɔɔ?

¹² Mɛɛ Pɔɔl dimul Chuuwa a wana ve ŋChuu le wa yooŋgu kɛndɔɔ Aŋtiɔɔ o Pisidiaa niŋ, “mi wanaa ndaa nɔ yeemɛi le chɛlɔɔ tonya yɔŋgu yoomu fafɛɛŋndo wo wa simnuŋ wanaa laalaŋnda.” (Walta. 13:​48) A mɛɛ Luku mɛɛlu yau Walta Kiilaa poonyiaa yɛ, Pɔɔl “wa nda yooŋgu kɛndɔɔ dimullo a Masale Mɛlɛkaleŋ okɔɔ, . . . siooŋii ve ndu le hei tosaa le, nduyɛ wana o wana kuuna ndu le.” (Walta. 28:​31) Kuɛɛ Pɔɔl wa yɛ yooŋgu kɛndɔɔ hoo dimioo? O Luom niŋ, chiee bɛndu bɛndoo le lɛŋnde lee nɔ kpaaya chieeŋndo o ba a teleŋ koŋ ndo! O yɔŋ bɛɛ maa sɔɔŋ ndaa yɔŋgu ni, ɔɔ nɛila cheleŋ ndaa soliŋ kpeku ni, mi buɛiyaa Chiisuaa dimi yooŋgu kɛndɔɔ sanaa a mala nyina diandaa, nduyɛ a nɛi chɔmaa ndoo yɔŋgu wo.

13. Le yɛɛ naŋ nɔ yɛ miŋ piɛi te a tusi naa pɛ nyɛpalaa choo?

¹³ Mɛɛ simultaŋ la komal buɛiyaa Chiisuaa o wɔsiŋ kɛmɛ tasoŋ niŋ,  ma nyɔɔlu Chɛhowa le mbo ke nda kɔl simulaa. Yɛɛ wa yɛ fulamakɔɔlioo? Ma sɔla nyina diandaa a kpaayaa le hiouwɔɔ lachi a yooŋgu Mɛlɛkaa dimioo a kɔl simulaa. (Walta. 4:​18-31) Mi naa bɛɛ piɛi le taasioo, nduyɛ a yoomuaŋ le hiouwɔɔ lachi a yooŋgu kɛndɔɔ dimioo o yɔŋ bɛɛ mi simultaŋ la komal naa. (Chemi. 1:​2-8) Le mɛɛ Mɛlɛka dɔu naa sala, nduyɛ mi nyina ndɔ diandaa wa naa malaa yɛ, naŋ cho hiouwɔɔ lachi a yooŋgu kɛndɛ leMasaa dimioo ni. Nyɛ o nyɛ kuuna naa yooŋgu kɛndɔɔ dimioo le, o yɔŋ bɛɛ miŋ wa o simulta kala kalaŋ bɛŋgu. Te a tusi naa pɛ nyɛpalaa choo, ŋ nɔ miŋ piɛi le mala nyina diandaa, taasioo, vɛlɛ a kɔl simulaa le yooŋgu kɛndɔɔ dimioo.—Luku 11:​13.

14, 15. (a) Yɛɛ yɔŋnuŋ yɛ mɛɛ nda ‘tusi Kilisiɔŋnda nyɛpalaa choo o piɔm Stiiviŋ ndo kɔɔli’? (b) O teleŋ naa hoo niŋ, vɛɛ wanaa bɔɔbɔɔ looku yɛ yooŋgu kɛndɔɔ tueiyɔɔ o Saibiiliaa niŋ?

¹⁴ Mi Stiiviŋ dimi fɛŋ yooŋgu kɛndɔɔ tuupa mi yaamɔɔwaa nduaa dii ndu. (Walta. 6:​5; 7:​54-60) A teleŋ “nyɛpalaa bɛndoo” del o wɔsiŋ kɛmɛ tasoŋ niŋndo, mi buɛiyaa Chiisuaa saŋnuŋ Chudiaa a o Sameeliaa niŋ kpou, mɛɛ kiilaa ma lo Chulusalɛm. Kɛ hei kuuna wali dimiaa yooŋgu kɛndɔɔ tosaŋndo le. Mi Filipi kua o chiee bɛndu pum o Sameeliaa niŋ, “okoŋ mbo kandu waŋnda yooŋgu kɛndɔɔ dimullo a Kiliti okɔɔ.” Nduyɛ mbo sɔla fulamakɔɔlila kɛndɛlaŋ tau. (Walta. 8:​1-8, 14, 15, 25) Le handɔɔ lechoo, mi Baabuiyo dimi aa: “Mi wanaa laalaŋaa nda tusi nyɛpalaa choo o piɔm Stiiviŋ ndo kɔɔli wa saŋnuŋ, ma kua haaa Foniisiaa, Saipulɔɔ, a Aŋtiɔɔ. Kɛ Chuuwa kinɛi nda wa suɛi Mɛlɛkɛi dimullo ni. Mi wanaa laalaŋnda apum fula Saipulɔɔ a Sailuini, ma huŋ Aŋtiɔɔ. Okoŋ ma kandu wanaa dimi Kilikiiye wa yooŋgu kɛndɔɔ dimullo a Masanɔɔ Chiisu okɔɔ.” (Walta. 11:​19, 20) Okoŋ, mi nyɛpalaa nda tusi Kilisiɔŋnda choo wo tosa mi yooŋgu kɛndɔɔ tiu silɔ.

¹⁵ O teleŋ naa hoo niŋ bɛɛ, mi nyɛpilɔɔ hoo kpe yɔŋnuŋ o Lɔɔsiaa niŋ a lɛŋii balu ndu ve. Taama taama a wɔsi 1950, ma kua a Seiyaa Chɛhowaa o waalaŋ niŋ o biyɔɔ niŋ Saibiiliaa. Le mɛɛ ndaa sɛŋi nda o fondaŋnda yɛ yɛlaŋ yɛ, mi keŋ tosa mi yooŋgu kɛndɔɔ tiu o lɛŋnde leŋ niŋ kpou. Seiyaa Chɛhowaa bɔɔbɔɔ ndaa tiu niŋ ba le nyɛsɔlaa sɔlaa le kɔlaŋ o tiŋ vilɛi waa lende niŋ, naapum le mɛɛliilaŋ 6,000 le yooŋgu kɛndɔɔ dimioo le! Kɛ mi masaa waa pila kua a nda o lɛŋii keŋ niŋ le yooŋgu kɛndɔɔ dimioo. Mi puaapilɛnɔ pilɛ dimi aa: “Mi masaa waa mala mi waŋnda o waalaŋ niŋ tuɛi yooŋgu kɛndɔɔ o Saibiiliaa niŋ.”

16, 17. Sɔɔŋ kuɛɛ cho yɛ o yau Walta Kiilaa niŋ ŋ chɔm maa mi Chɛhowa duau wali dimiaa yooŋgu kɛndɔɔ sala wo?

¹⁶ Sala Chɛhowaa wa Kilisiɔŋnda choo o wɔsiŋ kɛmɛ tasoŋ niŋ. Mi Pɔɔl a wanaa cheleŋnda tual nduyɛ ma pɔɔliaa kulii yooŋgu kɛndɔɔ  waŋnda o lakɔl. “Kɛ Mɛlɛka tosa ni mbo hindu.” (1 Kɔliŋ. 3:​5, 6) Konala cho o yau Walta Kiilaa niŋndaŋ chɔm maa hei cho tonya kanifuule, mi Chɛhowa duau wali dimiaa yooŋgu kɛndɔɔ sala. Le tamaseliiyo, “mi diom Mɛlɛkaa hiau lachi a pɛŋgɛlaŋndo. Mi buɛiya chɔɔlu kui tau tau o Chulusalɛm niŋ.” (Walta. 6:​7) Mɛɛ wali dimiaa yooŋgu kɛndɔɔ pɛŋgɛlaŋ, “mi kunda wanaa laalaŋnda Chudiaa, Kalili, a Sameeliaa kpou sɔla tiŋ kɔl nyuloo. Mi tiindaŋ ndaa chɔɔlu kalu poŋ. Nduyɛ le mɛɛ ndaa nɔ siooŋii Chɛhowa ve, mi nyina diandaa wa nda kɔltaŋ dɛɛniaa yɛ, ma hiau lachi a kuiyo.”—Walta. 9:​31.

¹⁷ Mi buɛiyaa Chiisuaa ndaa nɔ kɔl simulaa wa, dimul Chuuwa a wanaa ndaa dimi Kilikiiye wa yooŋgu kɛndɔɔ Aŋtiɔɔ o Siiliaa niŋ. Mi Baabuiyo dimi aa: “Ba Chɛhowa wo wa nda choo, nduyɛ mi wanaa bɔɔbɔɔ simnuŋ wanaa laalaŋnda, ma tual Masanɔɔ kɔɔli.” (Walta. 11:​21) Mi Baabuiyo suaa a hiouwɔɔ lachi cheleŋ ndoo tosaŋ vɛlɛ wo okɔɔ aa: “Mi diom Chɛhowa wo hiau lachi a pɛŋgɛlaŋndo. Nduyɛ mi wanaa bɔɔbɔɔ simnuŋ wanaa laalaŋnda.” (Walta. 12:​24) Le mɛɛ Pɔɔl, a wanaa cheleŋ dimi yooŋgu kɛndɔɔ kekelee wanaa ve ŋChuu le wa tɛɛŋ yɛ, “a kpaaya Chɛhowa wo, mi diom ndɔɔ hiau lachi a pɛŋgɛlaŋndo ba o ba fee, nduyɛ mbo chɔɔlu kpaayaa sɔla.”—Walta. 19:​20.

18, 19. (a) Vɛɛ naŋ looku yɛ sina maa “ba Chɛhowa wo” cho naa choo? (b) Chɔmndɔ tamaseliiyo o chɔm maa mi Chɛhowa mala wanaa nduaa wo.

¹⁸ Hau bɛɛ, i cho kpendekele maa “ba Chɛhowa wo” cho naa choo. Le saboo hoo kpeekpei wanaa bɔɔbɔɔ cho simnɔŋndo wanaa laalaŋnda ni, nduyɛ ma wa yoomula ndalaŋ yɔŋgoo o Chɛhowa lo le yiŋɔɔ sɔlaa. Le handɔɔ lechoo, le mɛɛ Mɛlɛka cho naa salaa dɔwɔɔ, nduyɛ mbo wa naa malaa yɛ tosa ni miŋ biunuŋ simulta kala kalalaŋ lapum, nduyɛ miŋ sɔla batiuwaa le wali dimiaa yooŋgu kɛndɔɔ tosaa maa Pɔɔl a Kilisiɔŋaa cheleŋ o wɔsiŋ kɛmɛ tasoŋ niŋ. (Walta. 14:​19-21) Chɛhowa cho hiouwɔɔ lachi a naa malaa lɔɔlɔɔ. “Ba ndɔ cho le fɛɛŋ a fɛɛŋndo” cho wa naa choo teleŋ o teleŋ o simultaŋ bɛŋgu. (Ditɔnɔ. 33:​27) Ŋ nɔ miŋ kɛsiŋ o kɔl maa, le mɛɛ Chɛhowa yeema loo o diola ndɔlaŋ choo yɛ, fɛɛŋ a fɛɛŋ o mel niŋ wanaa nduaa le.—1 Saam. 12:​22; Sam 94:​14.

¹⁹ Le tamaseliiyo, le mɛɛ Ŋgɔɔ Halɔɔ Abɛt hiou lachi a yooŋgu kɛndɔɔ dimioo yɛ, mi Naasi yɔŋ ndu o dɔɔŋgɔ nda tusi waŋnda kotaa choo o Sɔkisɛŋhausɛŋ niŋndo o lɛŋnde Chamani leŋ niŋ a teleŋ Chɔu Chieeŋ Diiŋ Ndɔɔ. A Bukuloo wɔsi 1942, mi polisiiya kua o chiɛi laa ndɔ wa wo niŋ, ma kuaŋnuŋ a chuaambɔ ndɔ pɔmbɔɔ, nduyɛ ma bii Elisa pila. Ma kua a ndu o dɔɔŋgɔla yɛ yɛlaŋ niŋ. Mi yema Abɛt dimi aa: “Wɔsila ya chii o dɔɔŋgɔla nda tusi waŋnda kotaa choo o Chamani niŋndaŋ la pɛɛku ya suɛi sɔvɛ sɔvɛi. Ndi cho ni, mi nyina diandaa Chɛhowaa luei num yoomuaŋ tau te a wa pɛ o simul kala kalaa bɛŋgu! Tuupa ma bii ya, mi veelu diomndaŋ o yau ndepilɛnɔ pum niŋ. Mbo dimi maa, mi nyina  diandaa Chɛhowaa mala num ma yɔŋnuŋ bɛɛŋ te a wa pɛ o simul kala kalaa bɛŋgu. Mi yiyaŋ o tasela ndɔ maa suɛi o wa tiŋ kuundiaa ni. Kɛ mɛɛ simullo komalla, mi sina maa nyɛ ndoo dimi wo wa tonya. Mi i yɔŋnuŋ mɛɛ o dimi yɛ. Mi i wa ikala le ndi laalaŋndo te simullo komallɔ muŋ te. Kɛ mi hei yɔŋnuŋ ya kpeekpei.”

20. Yɛɛ Pɔɔl ndoo tosa yɛ mɛɛ o wa o biyɔɔ niŋ, nduyɛ vɛɛ hei dɛɛniaa yɛ puaapiliaa a ndepiliaa naa hau kɔltaŋ?

²⁰ Mi yau Walta Kiilaa mɛɛlu isɔɔ maa Pɔɔl “wa nda yooŋgu kɛndɔɔ dimullo a Masale Mɛlɛkaleŋ okɔɔ” a dialuŋfulaa. (Walta. 28:​31) Le mɛɛ o wa o biyɔɔ niŋ yɛ, ndoo sɔla fonda le yooŋgu kɛndɔɔ dimioo chiɛiyo a chiɛiyo o Luom niŋ te. Kɛ a koŋ kpou, mbo hiau lachi a yooŋgu kɛndɔɔ dimioo o wanaa ndaa huŋ ndu yilɔɔ wa lo. Hau bɛɛ, puaapiliaa a ndepiliaa naa kaalaa apum tiuba ma fula o bɛɛ le, naapum le yuwɛi ɔɔ naala yɛ yɛla cheleŋ. Kɛ, kaala nda nɔ le Mɛlɛka, vɛlɛ a yooŋgu kɛndɔɔ dimioo wo cho wɔ o kala poŋ. Miŋ piɛi le nda, nduyɛ miŋ nyuna finya naa kaalaa cho o choo choo niŋndo le mbo mala nda ma sɔla wanaa nɔ yeemɛi le pɛɛkoo a ndu okɔɔ wa, vɛlɛ a tuula kɛndɛla o nɔ le naa laŋ.

21. Le yɛɛ naŋ nɔ yɛ miŋ dimi yooŋgu kɛndɔɔ choŋ choŋ?

²¹ Mi naa a bɔɔbɔɔ yɔŋguŋ le yooŋgu kɛndɔɔ dimioo chiɛiyo a chiɛiyo, a le nɛila cheleŋ soliŋndo kpeku le waŋnda siiŋguuwo buɛiya. Maa naa kpou hiou lachi a tosaa o naŋ tiuba wo le foofo naŋ nɔ maa wanaa dimiaa yooŋgu kɛndiaa wa peeloo sanaa a yooŋgu kɛndɔɔ dimioo “ba o ba fee o chieeŋndo choo.” Wallo hoo nɔ mbo tosaŋ choŋ choŋ kanifuule, “tamasi” chɔm maa Chiisu cho miiŋgu nanuŋ ndo cho niŋ kpendekele. (Maa. 24:​3-14) Lelaŋ ŋ nɔ miŋ soliŋ teleŋ naa kpeku a taasi. Suŋ suŋ, ŋ nɔ le “tosaa tau o wali Masanɔɔ niŋ.”—1 Kɔliŋ. 15:​58.

22. Mɛɛ naŋ cho paale Chɛhowaleŋ chumndo yɛ, yɛɛ naŋ nɔ yɛ miŋ kɛɛsiaŋ o kɔl le tosaa?

²² Mɛɛ naŋ cho chumndo ‘paale kpundɛle Chɛhowaleŋ yɛ,’ maa ŋ hiounuŋ lachi a yooŋgu kɛndɔɔ dimioo a dialuŋfulaa. (Chowɛɛ 2:​31) Ŋ cho waŋnda saalɔŋ maa waŋnda Bɛluiya, a ndaa chɛl suɛi Mɛlɛkɛi a kɔl ndaa kpou wa. (Walta. 17:​10, 11) Maa ŋ hiounuŋ lachi a yooŋgu kɛndɔɔ dimioo haaa mi Chɛhowa dimul naa aa: “Nuwali tau. A cho bɔɔ buɛi kɛndɛ nduyɛ ma wa sakpo!” (Maa. 25:​23) Te ŋ hiou pɛ lachi a o naŋ tiuba wo tosaa le waŋnda siiŋguuwo buɛiya suŋ suŋ, nduyɛ a lo lechoo wo chɔmndo o Chɛhowa lo, ŋ cho hunɔɔ nyaale dɔunɔŋ le fɛɛŋ a fɛɛŋ le mɛɛ naŋ sɔla dikeŋnaŋndo le ‘waŋnda dimullo a Masale Mɛlɛkaleŋ’ okɔɔ yɛ!