Yau Dialii Kuumbaŋ Choo Ve Poonyiaa Wo
“La fuuluu niŋ boondii nya bɛɛ nɔ mi la pɛɛku ŋwaŋ nde.” (Hibu. 5:12) Yiyaŋ! Chɛhowa, wana pɛɛkaa bɛndoo le Chieeŋndo, dimul naa le miŋ pɛɛku waŋnda a ndu okɔɔ! Wali o wali naŋ sɔla pɛ le waŋnda pɛɛkoo a Chɛhowa okɔɔ, o wa o yuŋgoo niŋ, o kundaa niŋ, a o wali pollo niŋ, di sɔviɔɔ pila keŋnuŋ naa koŋ ni. Nduyɛ, kalaŋ lusulɛiyo pila o cho vɛlɛ ni. Vɛɛ naŋ looku yɛ ba tiu?
Mulioo cho o nyɛ Pɔɔl poonyial Timoti wo niŋ. Mbo poonyial ndu aa, “Hiou lachi a wanaa laalaŋnda diomnda Mɛlɛkalaŋ tombolal lo o Yau Mɛlɛkaa niŋ, a suɛi Mɛlɛkɛi dimioo, a nda ndi pɛɛkoo.” Mi Pɔɔl dimi vɛlɛ aa, “Te a tosa lende pɛ, mɛɛ a cho num pila piŋi a wanaa cho num nilaŋ yaŋɔɔ wa.” (1 Timo. 4:13, 16) A nɔ yooŋgu piŋi waŋnda wo le nda dimullo. Lelaŋ, o cho bɔɔ suɛi sɔvɛ le ma hiou lachi a pɛɛkoo le diomndaŋ veeloo a waŋnda pɛɛkoo. Yauwo hoo toosiaŋ le num malaa ma tosa hei. Nuawɔ sɔɔŋ ŋ pum o yauwo hoo niŋ:
Bolle Baabuileŋ le cho o peele kɛ kɛ fee choo. Naapum le cho sawa mandaa Baabui le buŋgɛi ŋ cho wallo choo ve, te koŋ te, taamaseliiyo a mɛɛ ŋ duau buŋgɛi keŋ o wali niŋ yɛ
Chɛhowa cho ‘Wana Pɛɛkaa’ Bɛndoo ni. (Aisaya 30:20) Yauwo hoo cho num mala le ma chɔɔlu numpila chiɛɛŋa nyɛkɛndɛi le diomndaŋ veeloo a waŋnda pɛɛkoo, kɛ, fɛɛŋ bɛɛ puɛɛnuŋ te maa Chɛhowa nɔ yooŋgoo hoo ni, nduyɛ maa ndu veelu waŋnda le waa buɛiyaa ndɔ ni. (Chɔŋ 6:44) Le hei, piɛi teleŋ o teleŋ le nyina ndɔ diandaa. Soliŋ Diom Mɛlɛkaa kpeku teleŋ o teleŋ. Tosa mi Chɛhowa sɔla tɔɔ, kɛ tosa mi waŋnda ke num tɔɔ le. Kindi kindiŋ o nɛi o nɛi niŋ mi wanaa cho num nilaŋ yaŋɔɔ wa nɔ kaalaa le Chɛhowa.
Chɛhowa veelu num le ma pɛɛku waŋnda yooŋgu sɔvɛ hiou kpou wo. Ŋ nɔ tiindaŋndo maa a cho batiuwaa sɔla te o yɔŋ pɛ ma tiindaŋ o “kpaaya Mɛlɛka o ke” numndo niŋ.—1 Pitɛ 4:11.
Puaapiliaa nyaa pɛɛkaa,
Dialii Kuumbaŋ Choo Seiyaa Chɛhowaa