Wanaa bɔɔbɔɔ pɛŋgi niŋ hau kɔlaŋ o fondaŋ nda lepiɛilaŋ kanifuule, a sɔla nɛi chɔmaa sɔwɛ le kɛlɛŋgaa niŋ te kɔl dɛɛniaa. Le yɛɛ o bɛnda yɛ niko ma kuɛ o bɔŋaŋnda leKilisiɔŋndaŋ Seiyaa Chɛhowaa? Yɛɛ ŋ cho yɛ lakɔ chɔ loŋ?

A cha kaalaa a kɔl nyuloo wanaa ŋ cho komalla tɛɛŋ. O wɔsila kɛmɛ tasoo niŋ, mi Kilisiɔŋnda ndaa chuuŋgiaŋ naapilɛ o kundalaŋ niŋ. Le yɛɛ ndaa tosa yɛ hei? Le pɛɛkoo a Mɛlɛka okɔɔ, Baabuiyo yaasiaa, vɛlɛa dɛɛniaŋndo vellaa velle. (Hibuluiya 10:24, 25) Te a chuuŋgiaŋ pɛ, nda kpou sinaŋ maa a cho puaapiliaa ndaa laalaŋnda tɛɛŋ. (Tɛsaloniaŋ Diiŋ Ndɔɔ 1:3; Chɔŋ Ŋgaa Ndɔɔ 14) Tamasi pilɛ koŋ kpe naa bɛɛ cho hau tolɔɔ kɔɔli ni nduyɛ miŋ wa nyaaloo sɔlaa.

A sɔla tɔnɔɔ te o yɔŋ pɛ ma wou nyɛ ŋ cho pɛɛkoo wo o wali niŋ. O sindɔɔ niŋ a mɛɛ Baabuiyo dimi yɛ, wana lanɔ ni, wana pɔnɔ ni, vɛlɛ a chuaambuaa kpou, mi ndaa chuuŋgiaŋ naapilɛ. Naa bɛɛ te ŋ chuuŋgiaŋ hau pɛ, wana Mɛlɛka yulu iso wo sim naa lachi okoŋ, o yaasial naa nyɛ cho o poonyiaa o Baabuiyo niŋndo. Te ŋ tuei pɛ, ŋ kindiŋ le dɔuwɔɔ nyɛ naŋ tueiyo o wali niŋ. (Ditɔnɔmii 31:12; Nɛhimaya 8:8) Mi wanaa cho ichali wa bɛɛ sɔla di kenaŋndo le ma muli nyunalaŋ. Ma chɛŋ vɛlɛ ma soli chondoŋ le tiindaŋ nda nɔ o Mɛlɛka niŋndo.—Hibuluiya 10:23.

Te a kuɛ pɛ, mi laalaŋ num nɔ o Mɛlɛka niŋndo chɔɔlu kalu poŋ. Teleŋ kiilanɔɔ Pɔɔl wa achallo, mbo dimul kunda pilɛ aa: ‘Yeemɛi cho ya kpeekpei le nya chɔɔ le halikpeŋ mi I tosa mi la sɔla nyɛm nyina Mɛlɛkaa o ke wana laalaŋndo woŋ le mi la sɔla kpaayaa. O cho yɛ ko nya le, kɛ nya ni a ya, mi ŋ maaliaŋ vellaa velle.’ (Luomaŋnda 1:11, 12) Chuuŋgiaŋndo lɔɔlɔɔ naa chaaŋaa naa wanaa laalaŋnda kindi laalaŋ naa nduyɛ miŋ nɔ kaa leKilisiɔŋndo

Lelaŋ, a yandii a cho o veelaa le kɔlaŋ o bɔŋaŋ Seiyaa Chɛhowaa o lɔɔ hoo hunɔɔ mi numpila kɔ chɔ a lehɔl pɛɛŋ. Te o yɔŋ pɛ ma kuɛ, waŋnda cho num demul ma dimul num maa a chaa hunɔɔ. Ŋ bii wana nyɛ o ba le.

• Tamasi kuɛɛ chuuŋgiaŋnda naalaŋ la cho yɛ tolɔɔ kɔɔli?

• Tɔnɔ kuɛɛ naŋ sɔla yɛ te ŋ wa pɛ kɔlaŋ o bɔŋaŋndaŋ leKilisiɔŋndaŋ?