O bɔŋaŋnda Kilisiɔŋaa tasiaa niŋ, mi ndaa soli chondoŋ, ma piɛi vɛlɛ a nuaa o Baabuiyo niŋ. Te a nua pɛ, a muliŋ a suukaŋ o nyɛ nda nua wo choo. (Kɔliŋtiaŋ Tasoo 14:26) Nyɛ pilɛ koŋ kpe naa bɛɛ tosa hau o bɔŋaŋnda naalaŋ ni.

O Baabuiyo niŋ naŋ sɔla pɛɛkoo ni, nduyɛ mi nyɛ naŋ pɛɛku wo piiliaŋ naa. O lɔɔ mɛɛlulaŋ, mi kunda o kunda chuuŋgiaŋ naapilɛ le Suɛi luŋnde tueiyɔɔ. A yɔŋgu suɛi hei le chemchemndaŋ 30. Te a wa pɛ suɛi hei yɔŋgoo, Baabuiyo nda soliŋ kpeku ni le miŋ sina mɛɛ naŋ bii yoomu naa yɛ, nduyɛ a mɛɛ o piiliaŋ palɛi nɛi yɛ. Naa kpede ma dimul naa le miŋ nua o Baabuila naalaŋ niŋ. Te suɛi hei chuu pɛ yɔŋgu, ŋ nɔ vɛlɛ Pɛɛku “Bandu Mɛŋgɛlaa” le hawɛiyo opilɛ. O pɛɛkoo hoo niŋ, wanaa challa bɛɛ nɔ dioo le ma heelu balaŋ le nyunalaŋ mulioo o yau naŋ wa hoo pɛɛkoo wo niŋ. Pɛɛkoo hoo mala naa miŋ wou nyɛ Baabuiyo dimi wo o wali niŋ. O kundalaŋ niŋ hiouwɔɔ 110,000 o chieeŋndo niŋ, yau pilɔɔ hoo kpe naŋ pɛɛku ni.

Ŋ sɔla malaa le miŋ chɔɔlu kɔlkaloo sɔla le miŋ pɛɛku acheleŋnda. O lɔɔ tɛɛŋ, miŋ chuuŋgiaŋ le pɛɛku Yoomu Naa leKilisiɔŋndo a Wali Pollo. O yau Bɔŋaŋ Yoomu leKilisiɔŋndo a Wali Pollo sɔɔŋ naŋ pɛɛku woŋ fula ni. Ŋ sɔla yauwo hoo ipaŋgu o ipaŋgu. Pɛɛkoo hoo nɔ pɛltaŋ sala yaa. Pɛl tasoo nɔ diolaŋ aa: Nyɛm Tɔɔmaŋ o Diom Mɛlɛkaa Niŋ. O pɛllo hoo niŋ, kundaa tiuba ma sina nyɛ cho o bolii Baabui cho le nuaa o lɔɔ koŋ niŋnde pɛŋgu. Pɛl diiŋ ndɔɔ nɔ diolaŋ ni aa: Yɔŋguŋ o Wali Pollo Niŋ. O pɛllo hoo niŋ, ŋ cha tuu­laa mɛɛ naŋ looku miŋ suukaŋ a waŋnda a Baabuiyo okɔɔ yɛ. Wana yɔŋgu silaa wo tofa nyɛkɛndɛi teleŋ tuulaa cho wa ­tosaŋndo wo, le mbo ke naa sila mala naa miŋ tosa hiouwɔɔ lachioo wo. (Timoti ­Tasoo 4:13) Pɛl mɛɛlaa nɔ diolaŋ ni aa: Ŋ Waŋnuŋ Maa ŋKilisiɔŋ. O pɛllo hoo niŋ, ŋ pɛɛku mɛɛ naŋ nɔla miŋ tol silala Baabuiyo kɔɔli lɔɔlɔɔ o yoomu naa niŋ yɛ. Pɛllo hoo nɔ nyunalaŋ a mulilaŋ le naa malaa miŋ bii Baabuiyo bila nyɛkɛndɛi.

Te o yɔŋ pɛ ma kuɛ o bɔŋaŋnda naalaŋ, a cho hɛnaŋ tau a pɛɛku Baabui suu ŋ cho komal loŋndo.​—Chɔŋ 6:45.

• Yɛɛ ŋ nɔ yɛ o kɔl le kɔlaŋ tueiyɔɔ o bɔŋaŋnda Seiyaa Chɛhowaa?

• Bɔŋaŋnda naŋ nɔ o lɔɔ bɛŋgulaŋ kinɛi, o kuɛɛ ŋ yeema yɛ le kɔlaŋ?