Wana o wana chua chilaŋ o kɔɔna Seiyaa Chɛhowaa niŋ, ŋ sala ndu le. Mɛɛ kunda leKilisiɔŋndo kanduŋ o sindɔɔ niŋ, ma hɛli wanaa bɛnda le chilaŋ chuaa wa, halikpeŋ ma “manda kunda wanaa laalaŋaa Mɛlɛkaa.” (Walta Wanaa Chiisuaa 20:28) Bɛnduaa kendu o Mɛlɛka piɛiyo niŋnda manda kunda wanaa laalaŋaa Mɛlɛkaa ni. ‘O wa mɛɛ nda baŋ wana isɔɔ le, kɛ a kɔllo kpou. Nduyɛ, o wa le nyɛ sɔlaa le.’ (Pitɛ Tasoo 5:1-3) Baala yɛɛ kpeekpei nda tosa yɛ o kundaa niŋ le wanaa laalaŋaa Mɛlɛkaa?

A buulaŋ le naa, nduyɛ a manda yoomula naalaŋ. Bɛnduaa kundaa mala kunda wanaa laalaŋnda le ma wa o kala poŋ o chaŋyɛi niŋ a Mɛlɛka. A sina maa Mɛlɛka ke nda baalaa hoo le tosaa ni. Lelaŋ, a kindila kunda wanaa laalaŋaa Mɛlɛkaa le. Kɛ, a wou balaŋ le ma wa a kɔlta kɛndɛ vellaa velle. (Kɔliŋtiaŋ Diiŋ Ndɔɔ 1:24) Mɛɛ wana mandaa lasaa manda naa saa nduaa yɛ, lende koni bɛnduaa kundaa nɔ ni ma sina wana o wana o kunda leKilisiɔŋndo niŋ.​—Pulɔwaa 27:23.

Nda pɛɛku naa ni le hɛnaŋ Mɛlɛkaa tosaa. O lɔɔ o lɔɔ bɛŋgu, Bɛnduaa kundaa sim bɔŋaŋnda leKilisiɔŋdaŋ lachi ni le naa pɛɛkoo. Hei mala ni mi laalaŋ naa kendu poŋ. (Walta Wanaa Chiisuaa 15:32) Nda koni sim vɛlɛ baala dimiaa yooŋgu Mɛlɛkaa lachi ni. Ŋ wa pɛ pilichioo vellaa velle, a mala naa miŋ chaa yooŋgu kɛndɔɔ dimi.

A ke naa pilɛŋ pilɛŋnda kɔl dɛɛniaa. Bɛnduaa kundaa huŋ vɛlɛ o la naalo bɛɛ, te koŋ te, o Toŋgo leMasaa niŋ. Le yɛɛ? Le miŋ wa o kala o chaŋyɛi niŋ naa Mɛlɛka waa, vɛlɛ a naa kɔllo dɛɛniaa o diom Mɛlɛkaa niŋ.—Chemisi 5:14, 15.

O fulawɔ o baala nda tosa o kundaa niŋndo kɔɔli, apum nɔ vɛlɛ baalala ndapila laŋ le tosaa. Nduyɛ, kalaŋnda yuŋgula ndalaŋ la cho nda vɛlɛ choo. Teleŋndo yeemaŋ ni le muŋ kpou tosaa. Lelaŋ, ŋ nɔ miŋ ke puaapiliaa cho haa wali kala kalaa tosaa wo bɛɛleŋ.—Tɛsaloniaŋ Tasoo 5:12, 13.

• Yɛɛ Bɛnduaa kundaa tosa yɛ o kunda leKilisiɔŋndo niŋ?

• Naa pilɛŋ pilɛŋaa cho o kunda leKilisiɔŋndo niŋnda, o nɛila kuɛɛ niŋ bɛnduaa kundaa mala yɛ naa?