BUŊGƐI 2
Le yɛɛ Naŋ Sɔla yɛ Veelɔŋndo aa Seiyaa Chɛhowaa?
Nuuwa
Ebilaham nda Sela
Muuse
Chiisu Kiliti
Wanaa bɔɔbɔɔ yiyaŋ maa kaŋnde sɛnɛileŋ le nɔ diolaŋ ni aa Seiyaa Chɛhowaa. O sindɔɔ niŋ pa, buɛiyaa Mɛlɛka tonyaa wa a veelaŋ a “seiya.” Wɔsilaŋ 2,700 la hiou niŋ ni. (Aisaya 43:10-12) Tuupa mbo huŋ bii a wɔsii 1931, ŋ wa a veelaŋ aa Sukuwaa Baabuiya. Kɛ le yɛɛ naŋ sɔla yɛ niŋ veelɔŋndo aa Seiyaa Chɛhowaa?
Diolaŋ ndaŋ la chɔm Mɛlɛka naa kpendekele ni. Mɛɛ yaula Baabuiyo kandu poonyiaŋndo sindɛ, diola Mɛlɛkalaŋ, laŋ la cho yɛ Chɛhowa ni, la wa la poonyiaŋ o waalaŋ niŋ. O Baabuila bɔɔbɔɔ waŋnda hivi laŋ niŋ, ma faŋa diolaŋ ndaŋ. Okoŋ, ma miŋgi wou Masanɔɔ te koŋ te Mɛlɛka. Mɛɛ Mɛlɛka tonyaa chɔɔmuŋ ndupila o Muuse lo, mbo chɔm ndu diola ndɔla kpeekpei laŋ maa ndu cho Chɛhowa ni. Mbo dimul ndu aa: “Diola nilaŋ la cho laŋ ni lefafɛɛŋ.” (Ɛsɔdɔɔ 3:15, NW) Diolaŋ ndaŋ la chɔm teŋgeŋndo ndu tɛɛŋ a mɛlɛkaa lachoowaa ni. Lelaŋ, ŋ lɔɔŋ ibuŋ le mi diola diandaa la Mɛlɛkalaŋ la wa naa choo.
Diolaŋ ndaŋ la chɔm baala suu naŋ tosa wo ni. Wanaa timbi sindɛ seileŋ le laalaŋ ndaa dɔu o Chɛhowa niŋndo cho tau o lepula. Ebɛl cho wana tasoo ni. O waŋnuŋ sakpo o Mɛlɛka lo. O wɔsiŋ kɛmɛla bɔɔbɔɔ la hiou laŋ niŋ, mi Nuuwa, Ebilaham, Sela, Muuse, Deeve, a acheleŋnda sɔɔŋguu ‘seiyaa faŋga bɛnduaa’ haa ikɛi. (Hibuluiya 11:4–12:1) Mɛɛ mɛɛ waŋndo kua naa seileŋ timbioo o lemasa le wana nda nyiinduu choolaŋ choo wo yɛ, lende ko naa bɛɛ cho a bɛɛndiaŋ le waŋnda dimullo tonya cho a Mɛlɛka okɔɔ wo ni.
Chiisu naŋ cho tuulaa ni le diolaŋ ndaŋ kpekoo soliŋndo. Baabuiyo veelu Chiisu aa “wana dimi tonya Mɛlɛkaa o wana nɔla ma tiindaŋ ndo.” (Sɔɔŋ Chɔɔmaŋndoŋ 3:14) Mi Chiisu pila bɛɛ dimi maa ‘o tosa mi waŋnda sina diola Mɛlɛkalaŋ kpendekele.’ Nduyɛ, mbo hiau lachi a ‘seileŋ timbioo a tonya’ cho a Mɛlɛka okɔɔ wo. (Chɔŋ 17:26; 18:37, NW) Lelaŋ, diola Chɛhowalaŋ la nɔ mila wa buɛiyaa kpeekpeiyaa Chiisuaa choo, nduyɛ, ma tosa mi waŋnda sina laŋ. Hei Seiyaa Chɛhowaa cho kindiŋndo le tosaa ni.
-
Le yɛɛ Sukuwaa Baabuiya chua yɛ diolaŋ aa Seiyaa Chɛhowaa?
-
A boondii kuɛ Chɛhowa kandu yɛ seiya sɔlaa o lɛŋndeŋ choo?
-
Nɛɛ cho yɛ Sei hiou seiya kpou wo le Chɛhowa?
