BUŊGƐI 13
Nɛɛ Cho yɛ Kɔɔfanɔɔ?
Kanada
Yooŋgu kɛndɔɔ dimioo
Pɛɛku Baabuiyo
Pɛɛkɔŋ ipilayaa
Diomndo hoo “kɔɔfanɔɔ” sim ni maa: Wana sim dɛnɛlaŋ lachi, okoŋ, mi acheleŋ tol ndu kɔɔli wo. Kɔɔfanɔɔ Chiisu bɛɛ wa ni kanifuule, ndu fɛŋ Mɛlɛka vem o chieeŋndo choo le waŋnda yooŋgu kɛndɛ ke nda yoomoo wo dimullo. (Maatiu 20:28) O hau niŋ, wanaa tol ndu kɔɔli kpeekpeiya cho ndu tuulaa a mɛɛ nda cho teleŋ ndaa soliŋndo kpeku le ‘waŋnda siiŋgoo buɛiyaa ndɔ yɛ.’ (Maatiu 28:19, 20) Le hei tosaa, apum luɛi hau o wali lekɔɔfaa niŋ.
Wana dimi yooŋgu kɛndɛ Mɛlɛkaa lɔɔlɔɔ wo cho kɔɔfanɔɔ ni. Seiyaa Chɛhowaa kpou, wanaa dimiaa yooŋgu kɛndɛ Mɛlɛkaa nda cho ni. A koŋ kpou ni, apum kɛɛsiaa o yoomu ndaa niŋ le yooŋgu kɛndɛ Mɛlɛkaa dimioo maa kɔɔfaa lɔɔlɔɔ. A dimi yooŋgoo hoo le hawɛilaŋ 70 o paŋgei niŋ. Le hei tosaa, mi apum mal wali dia nda teleŋndo o ba tau wo, okoŋ, ma chua wali ke nda teleŋndo tau le yooŋgu kɛndɔɔ dimioo wo. Apum yɛ, a cho a hɛliaŋ le kɔlaŋ o fondaŋ waŋnda nɔ yeemɛi tau le yooŋgu kɛndɔɔ tueiyɔɔ wo. A veelu nda aa kɔɔfaa teŋgeŋnda. Ipaŋgu o ipaŋgu, hawɛilaŋ 130 waŋnda haa tosa o baala dimiaa yooŋgu Mɛlɛkaa hoo niŋ ni. Kɔɔfaa haa nɔ kɔl hiniaa a nyɛ o nyɛ nda nɔ. A nɔ vɛlɛ tiindaŋndo maa Chɛhowa cho nda ke nyɛ o nyɛ nda hau ba le ndu. (Maatiu 6:31-33; Timoti Tasoo 6:6-8) Wanaa nɔla kɔɔfale lɔɔlɔɔ leŋ tosa le wa, te a tiu ba pɛ, a tosa kɔɔfale malalaŋndeŋ. Kɔɔfaa malalaŋnda dimi yooŋgu Mɛlɛkaa ipaŋgu o ipaŋgu le hawɛilaŋ 50 te koŋ te 30.
Maa Chiisu, ŋ sina hau maa waŋnda chieeya cho o nyumndaŋ niŋ kpiŋgbi kanifuule a nɔ kɔlkalu a Mɛlɛka okɔɔ le. (Maki 6:34) Nduyɛ, ŋ nɔ kɔlkalu Mɛlɛkaa, o naŋ mala nda ma sina suŋ suŋndo. Kɔlkaloo hoo ke nda tiindaŋndo le chilaŋ. Kaalaa le waŋnda chieeya nyindu kɔɔfanɔɔ le mbo soliŋ teleŋ ndɔɔ kpeku. Mbo soliŋ vɛlɛ yomuma nduaŋ kpeku, halikpeŋ mbo mala acheleŋnda le ma sina a yooŋgu kɛndɛ Mɛlɛkaa okɔɔ. (Maatiu 22:39; Tɛsaloniaŋ Tasoo 2:8) Tɔnɔ yɛɛ kɔɔfaa haa sɔla yɛ? Tɔnɔɔ opilɛ cho ni, mi laalaŋ ndaa o Mɛlɛka niŋ kendu poŋ. A sɔɔŋguu Mɛlɛka ikɛi kpɛɛluŋ o chaŋyɛi niŋ, nduyɛ, ma naŋ vɛlɛ kɔl tau.—Walta Wanaa Chiisuaa 20:35.
-
Vɛɛ num tɛɛsiaa yɛ kɔɔfanɔɔ?
-
Yɛɛ nyindu yɛ waŋndo le kɔɔfale lɔɔlɔɔ leŋ tosaa?
