O wɔsila bɔɔbɔɔ la hiou laŋ niŋ, Seiyaa Chɛhowaa toosiaa niŋ Baabuilaŋ suulaŋ yɛ yɛ, ma soliŋ ndaŋ kpeku, nduyɛ ma piɔu vɛlɛ laŋ. Kɛ miŋ huŋ sina maa o bɛnda miŋ hivi Baabuiyo a ba naa. Hoo mala mi waŋnda sina ‘tonya cho a Mɛlɛka okɔɔ wo,’ ndu cho yɛ hɛnaŋ ndɔɔ ni le wana o wana fee. (Timoti Tasoo 2:3, 4) Le hei, o wɔsi 1950 niŋ, miŋ soli New World Translation a buŋgaŋ. Diom o diom feŋaŋ o Baabuiyo hoo hivioo niŋ te, kɛlɛŋgaa mi biondɔŋ yɔŋnuŋ. O cho o hiviaŋ o sɔɔŋ maŋgalaŋ niŋ hiouwɔɔ 130.

Baabui cho tɛtɛlɛ le biyɔɔ bila wo ndoo yeemaŋ. Teleŋndaŋ lapum, mi suɛi maŋgalɛi siŋgaŋ. Nduyɛ diomnda ndaa hivi laŋ ndaŋ lapum, la soli tonyaa kpendekele le. Lapum yɛ, la kendu bɔɔ bila biyɔɔ. O fula okoŋ kɔɔli, ma saaluŋ vɛlɛ yaula Baabui poonyiaŋ sindɛlaŋ. Yaulaŋ ndaŋ la nɔ biondɔŋ te. Nyɛ poonyiaŋ leniŋndo bɛɛ, sɔŋgɔ nyɛ pilɛ kpe a la tasela poonyiaŋndaŋ. Laŋ la mala nda ni ma bii Hibuluiye, Alamakiiye, vɛlɛ a Kilikiiye o Baabuiyo niŋ bila.

Baabui hiviaa ndoo yeemaŋ, o chɛlaŋ a diom Mɛlɛkaa kpeekpeiyo. (Saamiɛɛ Diiŋ Ndɔɔ 23:2) O New World Translation niŋ, miŋ miŋgi diola Mɛlɛkalaŋ poonyiaa leniŋ pila. Laŋ la cho yɛ Chɛhowa ni. O yaula Baabuila nda poonyiaa sindɛlaŋ niŋ, diolaŋ ndaŋ la wa la poonyiaa leniŋ le 7,000 a mɛɛ ŋ cho naa chɔɔ amatou yɛ. (Sam 83:18, NW) Yɛɛ wa yɛ fula makɔɔlioo le yaasiaa hoo? Baabui hiviŋ hoo wo naŋ bɔɔ nuaa leniŋ, nduyɛ o chɔm tuula Mɛlɛkalaŋ ­kpendekele. Te o yɔŋ pɛ ma nɔ New World Translation o suɛi maŋgalɛi numnde niŋ, kɛlɛŋgaa ma nɔ bɛɛ le, ŋ cho num dɛɛniaa le ma wa nuaa o Diom Chɛhowaa niŋ lɔɔ lɔɔ.—Chɔɔsuaa 1:8; Sam 1:2, 3.

• Le yɛɛ naŋ kɛɛsiaa yɛ le Baabuiyo hivioo a ba naa?

• Yɛɛ wana yeema hɛnaŋ Mɛlɛkaa tosaa wo nɔ yɛ mbo watosaa lɔɔlɔɔ?