Te kpundɔɔ del pɛ, mi Seiyaa Chɛhowaa chuuŋgiaa malaa chɔ chɔ le kɔlaŋ puaapiliaa ndaa yɔŋgoo. Mala naŋ yɔŋgu hoo wo chɔm ni maa ŋ nɔ kaala kpeekpeiyo le opilɛ a o cheleŋndo. (Chɔŋ 13:34, 35; Chɔŋ Tasoo 3:17, 18) O nɛila kuɛɛ choo naŋ mala yɛ?

Ŋ chuuŋgiaa nyɛsɔlaa. Mɛɛ yima wɔɔŋ wɔɔŋndaŋ ma del o lɛŋnde Chudiaaleŋ niŋ sindɛ, mi Kilisiɔŋaa tasiaa Aŋtiɔɔ chuuŋgiaa nyɛsɔlaa ma yɔŋ puaapiliaa ndaa laalaŋaa wa o lɛŋnde Chudiaaleŋ niŋnda. (Walta Wanaa Chiisuaa 11:27-30) Hau bɛɛ, te ŋ tuei pɛ maa nyɛpalaa cho chaaŋaa naa wanaa laalaŋnda choo o lɛŋnde ipum niŋ, miŋ yɔŋgu ­nyɛsɔlaa. Ŋ tosa hei a mɛɛ naŋ yɔŋgu tooloo o kunda naa ­leKilisiɔŋndo niŋ yɛ. Nyɛsɔlaa hoo nda soliŋ kpeku ni le wanaa cho o nyɛkindilaa koŋ bɛŋgu wa malaa.—Kɔliŋtiaŋ Diiŋ Ndɔɔ 8:13-15.

Ŋ sɔɔŋguu vɛlɛ balaŋ le malaa. Te bɛnduaa kundaa wa pɛ o fondaŋ nyɛpalaa hoo yɔŋnuŋndo hɔlndɔ, ma kindiŋ le sinaa te Sei Chɛhowaa o kɛ kɛ fee cho pɛ o kɛndiaa niŋ. Mɛɛ kunda kɔɔna sɔɔŋ le waŋnda malaa wo tiu ba mbo kɛɛsiaa le mbo yɔŋgu nyɛdiaa, mɛŋma kolaa ma kɛndiaŋ, nyɛ chuɛyaŋndo, naa lɔlaa, vɛlɛ a koowaŋ. Mi Seiyaa Chɛhowaa bɔɔ bɔɔ chaa wali taŋgulaa wa bɛɛ soliŋ sala le kɔlaŋ chiɛila tambulaŋ miŋgioo taŋgullo vɛlɛ a Toŋgola leMasalaŋ. Diompilɔɔ cho naa tɛɛŋ o kɔɔnaa hoo niŋ. Nduyɛ, wali naŋ tosa diompilɛ wo ke naa kɔlkaloo. Hei kpou nyindu naa ni le malaa yɔŋgoo o teleŋ kpundɔɔ niŋ. Mi che bɛɛ naa maa “chaaŋaa naa wanaa laalaŋnda” fɛŋ naŋ mala, kɛ naapum miŋ mala vɛlɛ wanaa cheleŋ, o yɔŋ bɛɛ aa o piɛile cheleŋ niŋ nda cho ni.—Kaleesiaŋnda 6:10.

soliŋ vɛlɛ Baabuiyo kpeku le waŋnda kɔltaŋ dɛɛniaa. Wanaa cho o kpundɔɔ niŋnda yeema bɔɔ kɔl dɛɛniaa. A boondei hei kinɛi o bɛnda ni miŋ sɔla yoomuaŋ Chɛhowa o ba, ‘Mɛlɛka nyɔɔlu naa kɔltaŋndo.’ (Kɔliŋtiaŋ Diiŋ Ndɔɔ 1:3, 4) Miŋ chɔm wanaa kɔlta tambɛiya haa o Baabuiyo niŋ nyɛ Mɛlɛka dimi le hunɔɔ tosaa o chilaŋ niŋndo. Ŋ ke nda vɛlɛ tiindaŋndo maa Masale Mɛlɛkaleŋ le cho hunɔɔ kpundɛlaŋ, nyɛpalaa vɛlɛ a nyɛ nɛiyaa kpou chii suŋ.—Sɔɔŋ Chɔɔmaŋndoŋ 21:4..

• Le yɛɛ Seiyaa Chɛhowaa yɔŋgu yɛ malaa chɔ chɔ teleŋ kpundɔɔ?

• Vɛɛ naŋ soliŋ yɛ Baabuiyo kpeku le wanaa kpundɔɔ kei choo wa kɔltaŋ dɛɛniaa?