Tuupa mi Chiisu wu, mbo dimul buɛiyaa nduaa aa: “Nduyɛ, okoŋ kɔɔli, waŋnda cho yooŋgu kɛndɔɔ hoo dimi a masale Mɛlɛkaleŋ okɔɔ ba o ba fee o chieeŋndo choo le mi waŋnda kpou a tuei. Te keŋ yɔŋnuŋ pɛ, okoŋ kɔɔli, ­mɛɛlula chieeŋndo la fuuluu.” (Maatiu 24:14) Kɛ vɛɛ yooŋgu kɛndɔɔ hoo looku yɛ niŋ dimiŋ o chieeŋndo choo kpou? Teleŋ Chiisu wa o chieeŋndo choo wo, mbo kɛsul naa tamasioo. Ndu naŋ nɔ ni miŋ tol kɔɔli.—Luku 8:1.

Ŋ kindiŋ le waŋnda komallo o la ndalo bɛɛ. Mi Chiisu pɛɛku buɛiyaa nduaa le yooŋgu kɛndɔɔ dimioo chiɛiyo a chiɛiyo. (Maatiu 10:11-13; Walta Wanaa Chiisuaa 5:42; 20:20) Wanaa dimi yooŋgu kɛndɔɔ o wɔsiŋ kɛmɛ tasoŋ niŋnda, ma chɔm nda naa nda nɔ le yooŋgu kɛndɔɔ dimioo wa. (Maatiu 10:5, 6; Kɔliŋtiaŋ Diiŋ Ndɔɔ 10:13) Hau bɛɛ lende koni wali dimiaa yooŋgu kɛndɔɔ hoo cho o kɔɔnaa ni. Kunda kɛ kɛ fee nɔ fonda nda nɔ ma pilichi wo. Hei mala naa ni miŋ tosa nyɛ Chiisu dimi wo le “waŋnda yooŋgu kɛndɛ Mɛlɛkaa” dimullo vɛlɛ a seileŋ timbioo nyɛkɛndɛi.—Walta Wanaa Chiisuaa 10:42.

Ba o ba waŋnda wa pɛ, miŋ kindiŋ le nda yooŋgu kɛndɔɔ dimullo. Mi Chiisu kɛsul naa vɛlɛ tamasi cheleŋ. Mi ndoo dimi vɛlɛ yooŋgu kɛndɔɔ o luŋ. O peela bɛndaŋ kɔŋgɔ bɛɛ mbo dimi yooŋgu kɛndɔɔ. Mbo dimi vɛlɛ yooŋgu kɛndɔɔ o sooŋ kolaa. (Maki 4:1; Chɔŋ 4:5-15) Naa bɛɛ ba o ba naŋ saaluŋ pɛ waŋ­nda, miŋ dimul nda yooŋgu kɛndɔɔ hoo. O nɛi ni, o lɔɔlaŋ niŋ ni, naa waŋnda chua nyɛm nyaanaŋ­ndoŋ nda ni, o foŋndo choo ni, kpou miŋ pilichi. Ŋ dimul vɛlɛ wanaa naŋ chiɛɛliaŋnda yooŋgu kɛndɔɔ. Wanaa naŋ tosa wallo diompilɛ wa ni, chaaŋaa naa naŋ kua o sukuu wa ni, vɛlɛa wanayaŋ naŋ. Waŋnda o miiliɔŋndaŋ niŋ chieeŋndo balɔɔ kpede cho yooŋgu kɛndɛ piŋi nda hoo wo tueiyɔɔ. Nɛila yɛ yɛla naŋ pilichi laŋ ndaŋ kpou la cho naa malaa ni.—Luomaŋnda 1:16.

Nɛɛnɛ ŋ yeema yɛ ma dimul yooŋgu kɛndɔɔ hoo a Masale Mɛlɛkaleŋ okɔɔ? A dimul vɛlɛ wana koŋ mɛɛ yooŋgu kɛndɔɔ hoo piiliaŋ chila ndɔlaŋ yɛ. Kɛsiŋ yooŋgoo hoo o ba le. Te a sɔla dɔɔ ndu pɛ, dimul a cheleŋnda.

• “Yooŋgu kɛndɛ” kuɛɛ nɔ yɛ le dimiŋndo?

• Vɛɛ Seiyaa Chɛhowaa cho yɛ Chiisu tuulaa o yooŋgu kɛndɔɔ hoo ­dimioo niŋ?