O wɔsiŋ kɛmɛ tasoŋ niŋ, kunda pɔmbɔɔ wa. “Wanaa Chiisu vem hɔlte ndɔ va a laŋgbaa kalla Chulusɛlɛm” wa o kundaa hoo niŋ ni. Kundaa hoo ndaa veelu ni aa dialii kuumbaŋ choo ve. Nda ndaa kialu yamaŋ sɔwɛɔŋ le Kilisiɔŋaa pɔyaŋnda ni, a wa o kunda leKilisiɔŋndo niŋnda. (Walta Wanaa Chiisuaa 15:2) A yaasiaa fɛŋ Diom Mɛlɛkaa nyɛkɛndɛi, nduyɛ ma chɛl nyɛ o dimi wo, malaŋ nda kialu yamɛi. (Walta Wanaa Chiisuaa 15:25) Tamasi pilɛ koŋ kpe dialle hau cho tolɔɔ kɔɔli ni.

Mɛlɛka cho dialle hei kpekoo soliŋndo le hɛnaŋ ndɔɔ tosaa. Puaapiliaa pɔyaŋnda cho o Dialii Kuumbaŋ Choo Ve hei niŋ ni. A nɔ yeemɛi i kala kala le Diom Mɛlɛkaa. A nɔ vɛlɛ taasioo o hɔbɛi le kɛɛsiaala kɛndɛlaŋ tosaa a wali naa hoo okɔɔ, vɛlɛ a nyuuniaala fula a piɛiye okɔɔ laŋ. O lɔɔ o lɔɔ bɛŋgu, ma chal diompilɛ le yaasiaa a sɔɔŋ piiliaŋ puaapiliaa kpou chieeŋndo balɔɔ silɔ woŋ okɔɔ. A mɛɛ i wa o wɔsiŋ kɛmɛ tasoŋ niŋ yɛ koni, hau bɛɛ miŋ sɔla silalaŋ o Baabuiyo niŋ. Lepum o yaula nda poonyial naa laŋ niŋ, te koŋ te a buɛiyaa kelaa choo wa, ɔɔ a nɛila yɛ yɛla cheleŋ. Hei huŋ a yiyaŋ pilɔɔ kpe vɛlɛ a wallo o diompilɔɔ niŋ wanaa Mɛlɛkaa tɛɛŋ. ­(Walta Wanaa Chiisuaa 16:4, 5) Dialii Kuumbaŋ Choo Ve hei cho nyɛm mala naa le pɛɛkoo a Mɛlɛka okɔɔ wo hɔlteŋ ni. Ndi chɔm mɛɛ wali dimiaa yooŋgu kɛndɔɔ nɔ mbo kuɛ yɛ ni. Ndi ko chɛl le suei yulɔɔ puaapiliaa nɔ ma chua kalaŋndaŋ o kunda leKilisiɔŋndo niŋnda ni.

Nɛi chɔmaa nyina Mɛlɛkaa dialle hei tual kɔɔli ni. O Chɛhowa lo, Mɛlɛka kpuluŋgumaa, vɛlɛ a Chiisu Kiliti, wana cho kunda ­leKilisiɔŋndo Bolleŋndo, Dialii Kuumbaŋ Choo Ve hei nua le nɛi chɔmaa ni. (Kɔliŋtiaŋ Tasoo 11:3; Ɛfisiaŋnda 5:23) Wanaa cho o dialle hei niŋnda chue ndapila maa nda le cho simlebolla le wanaa Mɛlɛkaa le. Nda ni, a Kilisiɔŋaa pɔyaŋaa cheleŋ kpou, ‘cho saa fɔŋndɔɔ kɔɔli ni ba o ba fee o kɔ.’ (Sɔɔŋ Chɔɔmaŋndoŋ 14:4) Dialii Kuumbaŋ Choo Ve naŋ bɔɔ kɔl te ŋ wa pɛ piɛileŋ a nda okɔɔ le wali nda cho tosaa wo.

• Nɛɛ yaa wa yɛ o dialii kuumbaŋ choo ve niŋ o wɔsiŋ kɛmɛ tasoŋ niŋ?

• Vɛɛ Dialii Kuumbaŋ Choo Ve hau tofa yɛ o Mɛlɛka lo le nɛi chɔmaa?