Sindɛ pa Chɛhowa kɛɛsiaa ni le mi yuŋgulaŋ la wa chuuŋgiaŋndo naapilɛ. O hei tosaa niŋ chaŋyɛi ndɛi a Chɛhowa kiandu poŋ. Hei tosa vɛlɛ mi naŋaŋndo wa o yuŋgoo niŋ. (Ɛfisiaŋnda 6:4) Lelaŋ, yuŋgula Seiyaa Chɛhowaa nɔ teleŋndo o lɔɔ o lɔɔ bɛŋgu le pɛɛkoo a Chɛhowa okɔɔ. A chal pɛ, a dɔu balta kɛndɛlaŋ a Mɛlɛka okɔɔ nduyɛ a mɛɛ la piiliaŋ nda yɛ. O yɔŋ bɛɛ aa numpilɛ kpe cho ni, a soliŋ teleŋndo hoo kpeku le pɛɛkoo a Mɛlɛka okɔɔ o Baabuiyo niŋ.

Pɛɛku leyuŋgoo mala naa miŋ sɔɔŋguu Chɛhowa ikɛi kpɛɛluŋ. “La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.” (Chemisi 4:8) Ŋ sina Chɛhowa nyɛkɛndɛi te o wa pɛ miŋ pɛɛku a kaala ndɔlaŋ okɔɔ o Baabuiyo niŋ, vɛlɛ a mɛɛ o tosa sɔɔŋ lepum yɛ. Mɛɛ ŋ kandu pɛɛku leyuŋgoo bɛɛŋ bɛɛŋ yɛ cho ni, teleŋndo chuaa ma nua o Baabuiyo niŋ nduyɛ ma veelu diomndaŋ choo choo. A nua vɛlɛ nyɛ naŋ nɔ le pɛɛkoo o Bɔŋaŋ Yoomu leKilisiɔŋndo a Wali Pollo o lɔɔ bɛŋgu wo. A piɔu vɛlɛ wanaa nya cho o yuŋgoo niŋnda buŋgaŋ o Baabuiyo niŋ le mi wana o wana kɔ pɛɛku pɔɔ a ba ndɔ. Te la chal niŋ pɛ le pɛɛku leyuŋgoo, la yaasiaa bolii Baabui nya pɛɛku keŋnde.

Teleŋndo hoo naŋ sɔɔŋguu wanaa naŋ cho o yuŋgoo niŋnda ikɛi kpɛɛluŋ ni. Baabuiyo pɛɛkoo diompilɛ tosa mi pɔnɔɔ a lanɔɔ, kalaŋchuauwa, vɛlɛ a chuauwaa ndaa kpou nɔ diom pilɔɔ o yuŋgoo niŋ. Pɛɛku leyuŋgoo nɔ mbo wa boondii nyaale. Nduyɛ, mi wana o wana nɔ o kɔl maa nyɛ nda nɔ ma wa tosaa o lɔɔ o lɔɔ bɛŋgu wo o cho ni. Kalaŋchuauwa hɛli nyɛ nda nɔ le pɛɛkoo wo o Bandu Mɛŋgɛlaa niŋ, te koŋ te o “Tiondoo!” niŋ o tɛɛŋgii nɛi jw.org ɔɔ yaula cheleŋ. Kalaŋchuauwa suaa vɛlɛ a balahawɛila chuauwaa ndaa sɔla o sukuulaŋ, nduyɛ ma nuuviaa nɛilaŋ mɛɛ nda looku ma mala nda yɛ. La nua Tɛlivisiɔŋ Seiyaa Chɛhowaa o (tv.pr418.com) mi la suukaŋ lechoo. La pɛɛku vɛlɛ chonduŋ nɔ le soliŋndo o bɔŋaŋndaŋ o lɔɔ koŋ bɛŋgu woŋ. Te pɛɛku leyuŋgoo chuu pɛ, la toosiaa nyɛdiaa pɔmbɔ le mi nya kpou de a kɔlkɛndɛ.

Te wanaa cho o yuŋgoo niŋnda wa pɛ teleŋndo hoo chuaa o lɔɔ o lɔɔ bɛŋgu le Chɛhowa piɛiyo diompilɛ, o mala nda ma nɔ yeemɛi le Diom Mɛlɛkaa pɛɛkoo. Nduyɛ mi Chɛhowa dɔu nda sala tau.—Timoti Tasoo 4:15, 16.

• Le yɛɛ naŋ chua yɛ teleŋndo le pɛɛku leyuŋgoo tosaa?

• Yɛɛ kalaŋchuauwa tosa yɛ mi pɛɛku leyuŋgoo wa boondii kɔlkɛndɛ?