Pɛɛku mandaa iMɛlɛkayaa kanduŋ niŋ lɔɔ levil, nduyɛ ndu cho suŋgbuleŋ ni le Seiyaa Chɛhowaa. Pɛɛku teŋgeŋndo cho le wanaa yɔŋguŋ ndapila o piaa cha le wali dimiaa yooŋgu kɛndɛ Mɛlɛkaa wa. Pɛɛkoo hoo mala nda le ‘tosaa wali Mɛlɛkaa nyɛkɛndɛi.’​—Timoti Diiŋ Ndɔɔ 4:5.

Sukuu Wali leKɔɔfaa. Te kɔɔfanɔ lɔɔlɔɔ wo tosa pɛ kɔɔfaleŋ le wɔsioo o pilɛ, a veelu ndu le pɛɛkoo hoo tosaa le palɛi iŋɔmpum. Lepum o Toŋgo leMasa cho ndu ikɛiyo niŋ. Sabu pɛɛkoo hoo cho ni, le mbo naŋnuŋ Chɛhowa ikɛi kpɛɛluŋ. Le mbo sina vɛlɛ mɛɛ o dimi yooŋgu kɛndɔɔ o nɛi o nɛi niŋ yɛ, nduyɛ vɛlɛ mɛɛ o hiau lachi o wali ndɔ leKilisiɔŋndo niŋ yɛ.

Sukuuwo le Wanaa Dimi Yooŋgu Kɛndɛ leMasaa Wa. A tosa pɛɛkoo hoo le paŋgoŋ ŋmuuŋ. Wanaa nɔ taasioo le yooŋgu kɛndɔɔ dimioo wa, nduyɛ ma nɔ yeemɛi le chalta ndalaŋ malɔɔ le kɔlaŋ naa cheleŋnda, tosa pɛɛkoo hoo ni. Waŋnda haa chɛl le dimioo aa, “A che ya. Viom ya.” Tamasi Chiisu Kiliti wo nda cho tolɔɔ kɔɔli ni, wana dimiaa yooŋgu kɛndɛ bɛndoo le chieeŋndo. (Aisaya 6:8; Chɔŋ 7:29) Koŋ cho ni, te o yɔŋ pɛ ma faŋaŋ o chalta numndaŋ le kɔlaŋ landaŋ, a nɔ ma tosa yoomu num­ndo tɛtɛlɛ. Naamoo, fondaa, a nyɛdiaa waŋnda dia wo wa lepum teŋgeŋ. Lepum pɛŋ o bɛnda ma pɛɛku suɛi maŋgalɛi cheleŋ. Puaapiliaa, a ndepiliaa yembuaa, vɛlɛ a wanaa cho o nɔlaŋ nda, a nɔ wɔsioŋ 23 tei 65 wa, nɔ kuee ma nɔ suliŋnda iMɛlɛkaya laŋ a la cheleŋndaŋ le wallo hoo tosaa. Hoo mala nda mi Chɛhowa, a kɔɔna ndɔɔ hiou lachi a nda kpekoo soliŋndo.

Sukuuwo Kiiliadi. O Hibuluiye niŋ, “Kiiliadi” sim ni, “pouta leseilaŋ.” Chɔŋ wɔsi 1943, wanaa fula niŋ o sukuuwo Kiiliadi wa hiou niŋ 8,000. Waŋnda haa cho yooŋgu kɛndɔɔ dimioo chieeŋndo balɔɔ silɔ. Nduyɛ, a sɔla niŋ fula makɔɔli kɛndɔɔ tau. (Walta Wanaa Chiisuaa 13:47) Le tamaseliiyo, teleŋ nda yɔŋ waŋnda Pɛlu le yooŋgu kɛndɔɔ dimioo wo, kunda ve loŋ kposoŋ te. Kɛ suŋ suŋ niŋ, Seiyaa Chɛhowaa cho loŋ hiouwɔɔ 1,000. Chepaŋ bɛɛ, teleŋ waŋnda kuɛ yooŋgu kɛndɔɔ dimioo loŋndo, Seiyaa Chɛhowaa tɔ kinɛi nda komal ni. Kɛ suŋ suŋ niŋ, Seiyaa Chɛhowaa cho loŋ hiouwɔɔ 200,000. Le paŋgoŋ ŋuɛɛnu nda tosa pɛɛkoo hoo ni. Pɛɛkoo hoo mala nda le Diom Mɛlɛkaa sinaa nyɛ kɛndɛi. Wanaa cho o kɔɔfale teŋgeleŋ ndeŋ niŋnda, ɔɔ a fula o lɛŋii cheleŋnde niŋnda, a cho o lɛuwoŋ nda, ɔɔ buɛiyaa ibuŋgaa, sɔla veeloo le pɛɛkoo hoo. Pɛɛku kala kalaa o cho ni. O mala nda le wali dimiaa yooŋgu kɛndɔɔ simioo yi o chieeŋndo balɔɔ sɔ.

• Le sabu yɛɛ nda tosa yɛ Sukuu Wali leKɔɔfaa?

• Nɛɛyaa kua yɛ o Sukuuwo le Wanaa Dimi Yooŋgu Kɛndɛ leMasaa Wa?