Le yɛɛ naŋ veelu yɛ ndu aa Toŋgo leMasaa? Kanifuule, loŋ Seiyaa Chɛhowaa kua pɛɛkoo o Baabuiyo niŋ ni a Masale Mɛlɛkaleŋ okɔɔ. Teleŋ Chiisu wa lɛŋ naŋ ndo, a Masaleŋ ndeŋ okɔɔ o wa waŋnda pilichillo ni.—Luku 8:1.

Loŋ cho fondaŋ lepiɛiyo ni le kilisiɔŋaa tonyaa. O Toŋgoo hoo niŋ ko nda pɛɛku vɛlɛ ni le kɔlaŋ yooŋgu kɛndɔɔ dimioo a Masale Mɛlɛkaleŋ okɔɔ. (Maatiu 24:14) Toŋgola leMasalaŋ ndaŋ la cho a hiyaŋndaŋ. Lapum, la choŋnuŋ kpɛdɛ. Lapum yɛ kpasu. Lapum chalaŋ. Kɛ laŋ kpede la cho le tuu le wanaa chal leniŋ nda, nduyɛ, ŋ toosiaa laŋ le chɔmnɔŋ te. O toŋgolaŋ ndaŋ niŋ, opum, kundalaŋ la tiɔɔŋ la soliŋ ndu kpeku ni. O wɔsila laŋga hiou laŋ niŋ, Toŋgola leMasala naŋ taŋgul taŋ la wa o waalaŋ niŋ. O dimi niŋ, paale o paale, toŋgolaŋ la ŋuɛɛnu naŋ taŋgul ni. Hei cho yɔŋnɔŋndo halikpeŋ mi kundalaŋ la hiou lachi a hindɔɔ. Vɛɛ naŋ tiu yɛ ba le hei tosaa?—Maatiu 19:26.

Nyɛsɔlaa del le toŋgolaŋ taŋgullo wo naŋ soliŋ kpeku ni le laŋ taŋgullo. O lɛuve nda yɔŋ nyɛsɔlaa hoo ni. Te kunda o kunda Seiyaa Chɛhowaa yeema pɛ Toŋgo leMasaa taŋgullo, te koŋ te le ndu miŋgioo toosiaa, nyɛsɔlaa hoo nda soliŋ kpeku ni.

Wanaa taŋgul toŋgolaŋ laŋ nda a chaŋ ba ba fee, a paawa nda le. Ndapila yɔŋguŋ ni a kɔllo kpou. O lɛŋnde ipum niŋ, Kundalaŋ la cho la Taŋgul Toŋgola leMasalaŋ ndaŋ. Kundala taŋgulaa laŋ ndaŋ, la kua ba o ba fee o lɛŋii keŋ niŋ. O yɔŋ bɛɛ aa o sɔndɔkɔltaŋ, kunda taŋgulaa hoo kua. A tosa hei halikpeŋ ma chua chilaŋ o taŋgullo hoo niŋ, vɛlɛ a Seiyaa Chɛhowaa cho pilachieeya loŋnda baala taŋgulaa chɔmndo. O lɛŋii cheleŋ niŋ, ma soliŋ Seiyaa Chɛhowaa apum kpeku, a nɔ suliŋ­ndaŋ nda maa tofa lehɔlla le taŋgultaŋ ndaŋ. Nda chɔm ni mɛɛ nda nɔ ma taŋgullɛ, vɛlɛ a mɛɛ nda nɔ ma toosiaa Toŋgola leMasalaŋ yɛ. Mi che bɛɛ naa, wanaa sina a taŋgullo okɔɔ wa yɔŋguŋ le malaa, kɛ ba o ba waŋnda haa kuɛ pɛ taŋgullo, mi wanaa cho o kunda koŋ niŋnda bɛɛ yɔŋguŋ le malaa. Lelaŋ, ŋ dimi maa nyina Chɛhowaa, vɛlɛ a yɔŋgɔŋ buɛiyaa nduaa cho wo, cho tosaa ni miŋ wa wallo hoo tiuwo ba.—Sam 127:1; Kolosiaŋnda 3:23.

• Le yɛɛ naŋ veelu yɛ naa naa lepiɛiya aa Toŋgo leMasaa?

• Vɛɛ naŋ cho yɛ tiuwo ba le Toŋgola leMasalaŋ taŋgullo chieeŋndo balɔɔ silɔ?