Te o yɔŋ pɛ ma wa Baabuiyo pɛɛkoo a Sei Chɛhowaa, ma kindiŋ le yaasiaa pɔɔ buŋgɛi nya nɔ le pɛɛkoo ve tuupa mi paale nya nɔ le pɛɛkoo leŋ le fuuluu. Lende koni icho a bɔŋaŋnda naŋ bii laŋ ni. Te o yɔŋ pɛ miŋ toosiaŋ fɛŋ nyɛkɛndɛi tuupa miŋ kuɛ o bɔŋaŋndaŋ, ŋ sɔla tɔnɔɔ tau. Kɛ ŋ bii tɔnɔɔ sɔlaa fau te ŋ wa pɛ hei tosaa lɔɔlɔɔ fee.

Tuu fɛŋ le fondaŋ bɛnda le pɛɛkoo wo, vɛlɛ a teleŋ bɛnda wo. Boondii kuɛɛ bɛnda yɛ ma handu yiyaŋ numndo kpou o nyɛ ŋ cho pɛɛkoo wo choo? Idii puŋ ŋ pɛɛku ni tuupa ma kuɛ wallo, baa ichɔl pili pili te chuaambuaa lɔl pɛ? O cho naa maa mɛɛ ma chua teleŋ vilɛi le. Numpila kɛɛsiaa teleŋ bɛnda a numndo ni. Nduyɛ, te a wa pɛ pɛɛkoo, chɛl mi nyɛ o nyɛ kelu pɛɛku numndo tɛɛŋ te. Nuuviaa fondaŋ doŋ doŋndo. Kindiŋ ma faŋaŋ nyɛ o nyɛ bɔɔluu num nilaŋ ikɛi. Te alaadioo wa pɛ num suɛi ikɛi, a nyumi. Te a nɔ pɛ foŋ­ndo, ndu bɛɛ a nyumi. Piɛi fɛŋ tuupa ma kandu pɛɛkoo. Hei mala num ma faŋa kɔllo o buulaŋndaŋ, nduyɛ ma ­handu kɔllo o Diom Mɛlɛkaa choo.—Filipiaŋnda 4:6, 7.

Keeku pulaleŋ o sɔɔŋ kulloŋ bɛŋgu, nduyɛ ma kindiŋ le nyunaa mulioo. Tuupa ma kandu pɛɛkoo, sina wɔ fɛŋ nyɛ buŋgɛi ŋ nɔ le pɛɛkoo ve cho suɛi a ndi okɔɔ wo. Challɔ fɛŋ ma yiyaŋ a suɛi lebolle. Tuuwɔ mɛɛ sɔɔŋ lebolluŋ pɔmbɔŋ cho ŋ chiɛɛliaŋ a suɛi lebolii bɛnduei yɛ. Mɛɛndaŋ fotueilaŋ, nduyɛ ma tofa nyunala miiŋgaa lechoo laŋ ma che mɛɛ la soli sɔɔŋ kulloŋ kpendekele yɛ. Tofa niko o pɛl o pɛl niŋ, okoŋ ma kindiŋ le nyuna pɛl koŋ mulioo. Kumbi Baabuiyo ma nua bolii Baabui cho i poonyiaa o pɛl koŋ niŋnde. Yiyaŋndɔ mɛɛ i chɛlaŋ a buŋgɛi ŋ cho pɛɛkoo ve yɛ. (Walta Wanaa Chiisuaa 17:11) Te a che pɛ mulioo o pɛl koŋ niŋ, keeku pulaleŋ o diomnda laŋ bɛŋgu. Koŋ mala num ma loonuŋ muli koŋ. Mɛɛ a kuɛ niŋ pɛ o bɔŋaŋndo ma yeema le nyunaa mulioo, a heelu baa ma muli o biŋgi.

Te a wa pɛ buŋgaŋ naŋ pɛɛku o bɔŋaŋnda naalaŋ o lɔɔ bɛŋgu woŋ nuaa, mɛɛ a cho chɔɔlu kɔlkaloo sɔla tau a Mɛlɛka okɔɔ o Baabuiyo niŋ.—Maatiu 13:51, 52.

• Nɛi pɛɛkaa kuɛɛ ŋ nɔ yɛ ma tol kɔɔli lɔɔlɔɔ le toosiaŋndo le bɔŋaŋndaŋ?

• Vɛɛ ŋ toosiaŋ yɛ le nyunaa mulioo o bɔŋaŋndo?