Diola maHibuluilaŋ cho Bɛtɛl ni. Ndu sim ni maa “Chiɛi Mɛlɛkaa.” (Chɛnɛsee 28:17, 19) Diolaŋ ndaŋ la chɛl bɔɔ taŋgulta bɛndula Seiyaa Chɛhowaa nɔ o lɛuwuŋ ndaŋ cho chieeŋndo balɔɔ kpede woŋ. O taŋgultaŋ ndaŋ niŋ nda kɔɔna wali dimiaa yooŋgu kɛndɔɔ ni, nduyɛ loŋ ko nda toolu ndu ni. O naa lebolla Niu Yɔk U.S.A. Dialii Kuumbaŋ Choo Ve hei cho ni. Loŋ dialle hei lo ni ma sina nyɛ cho yɔŋnɔŋndo o lɛuwuŋ Seiyaa Chɛhowaa cho o chieeŋndo balɔɔ silɔ woŋ. Wanaa cho o lɛuwoŋ muŋ niŋnda nda veelu ni aa yuŋgoo Bɛtɛl. O chiɛi pilɔɔ niŋ kpe yuŋgoo hoo cho ni. Naapilɛ nda tosa wallo ni. Naapilɛ ko nda dia nyɛdiaa ni. Pɛɛku Baabuiyo bɛɛ naapilɛ nda tosa ni o diompilɔɔ niŋ.—Sam 133:1.

Fonda teŋgeŋndo o cho ni, naa yuŋgoo hoo yɔŋguŋ ndapila wa. Ba o ba Bɛtɛl cho o chieeŋndo choo, chaaŋaa naa wanaa laalaŋnda, waŋpiaanduaa a waŋlaanduaa tosa wallo loŋ ni. Le hɛnaŋ Mɛlɛkaa tosaa vɛlɛ a wali ndɔ leMasaa hivioo lachi nda yɔŋguŋ ndapila ni le wallo loŋ lɔɔlɔɔ. (Maatiu 6:33) Wanaa cho wallo loŋnda chue paawa ipaŋgu le. Kɛ a toolu nda a nyɛsɔlaa pɔmbɔ halikpeŋ ma soli bahawɛila ndalaŋ. Nda kpou nɔ naa lɔlaa kɛndiaa. Wana o wana cho Bɛtɛl nɔ wallo le tosaa. Apum, o ɔfisiilaŋ (bilolaŋ) niŋ nda tosa wallo ni. Apum, naa yauwaa. Apum yɛ, naa diaa nyɛdiaa toosiaa. Apum, naa toosiaa layauwa nda tosa wallo ni. Apum, naa nda holi ­yaulaŋ boolaŋ okɔɔ wa. Apum, le chiɛiyo dindioo. Apum, nyɛlaŋ tɔɔ o maasiiyo. Apum yɛ, le nyɛm tambu woŋ toosiaa. Mi walta cheleŋ la tosaŋ vɛlɛ loŋ o laŋ kɔɔli.

Wallo pila tosaŋ o fondaa hoo ni le wali dimiaa yooŋgu kɛndɔɔ tooloo. Le mi waŋnda pɛɛku tonya Baabuiyo cho suɛi lebolle ni le Bɛtɛl kɛ kɛ fee. Yauwo hoo cho tamasioo opilɛ le pɛɛkoo hoo. O hɔlte Dialii Kuumbaŋ Choo Ve bɛŋgu o poonyiaŋ ni. Mɛɛ nda chii ndu poonyiaa, ma yɔŋ ndu o huieye niŋ o kundala hivi yaulaŋndaŋ o chieeŋndo balɔɔ kpede. O maasiila tosa wallo chɔ chɔ laŋ choo nda toosiaa yauwo hoo ni o lɛuwuŋ toosiaa layauwo niŋ. Okoŋ ma yɔŋ ndaŋ o kundalaŋ niŋ hiouwɔɔ 110,000. Nɛi o nɛi wallo hoo keeku pɛ, yuŋgoo Bɛtɛl toolu ndu ni le wali dimiaa yooŋgu kɛndɛ cho hoo choŋ choŋndo.—Maki 13:10.

• Nɛɛ yaa tosa yɛ wallo Bɛtɛl? Nduyɛ vɛɛ nda bii yɛ nda?

• Wali choŋ choŋ kuɛɛ yuŋgoo Bɛtɛl cho yɛ tooloo a nyɛ nda tosa loŋ ndo?