Le miŋ tiu ba miŋ dimul “lekaa o lekaa, a isɔɔ o isɔɔ maŋgalaa, a waŋnda suu o suu” “yooŋgu kɛndɔɔ”, ŋ cho yaulaŋ toosiaa o sɔɔŋ maŋgalaŋ niŋ hiouwɔɔ 750. (Sɔɔŋ Chɔɔmaŋndoŋ 14:6) Vɛɛ naŋ looku yɛ hei ba tiu? Le miŋ tiu ndi ba, ŋ nɔ kunda poonyiaa layauwo o lɛŋnde kɔɔli. Nduyɛ, ŋ nɔ wanaa yɔŋguŋ le laŋ hivioo o sɔɔŋ maŋgalaŋ niŋnda. Nda kpou Seiyaa Chɛhowaa nda cho ni.

O puuluei niŋ fɛŋ la poonyiaŋ. Te Kunda Poonyiaa poonyiaa pɛ nyɛ o nyɛ o naa lebolla, mɛɛ mi Dialii Kuumbaŋ Choo Ve keeku fɛŋ hɔlteŋ lechoo. Kunda poonyiaa hoo chua chilaŋ ni, nduyɛ ndu ko kɔɔna walta wanaa poonyiaa haa ni. Naa lebolla apum cho ni. Apum yɛ, o lɛuwoŋ ŋpum niŋ nda cho ni. Kundala poonyiaa laŋ o lɛŋii yɛ yɛi niŋndaŋ la mala naa ni miŋ tiu ba le naamula faŋga faŋga sinaa. O hei niŋ, ŋ tiu vɛlɛ ba miŋ poonyiaa a sɔɔŋ piiliaŋ wanaa dimi sɔɔŋ maŋgalaŋ yɛ yiɔŋ o lekaa o lekaa niŋnda okɔɔ.

A chii pɛ poonyiaa o puuluei niŋ, a chua a yɔŋ wanaa hivi o sɔɔŋ maŋgalaŋ niŋnda lo. Te a chii pɛ poonyiaa o puuluei niŋ, dialle keeku hɔlteŋ lechoo. Te a che pɛ maa o bɛnda, a yɔŋ o wanaa hivi o chieeŋndo balɔɔ kpede wa lo o hueiye niŋ. Diomnda tonya laŋ wanaa hiviaa haa kindiŋ ni ma soliŋ kpeku. Keŋ mala nda ni ma hivi ndu o suɛi ndɛi maŋgalɛi niŋ nyɛkɛndɛi. A hivi pɛ, a muliŋ a veelu diomnda nda hivi laŋ. Okoŋ, a mɛɛndaŋ nyɛkɛndɛi le biondɔŋndaŋ. Hei mala ni mi nyɛ poonyiaŋ o puuluei niŋndo fula kpendekele, nduyɛ ma bii ndu bila.—Ikilisiaatii 12:10.

Kɔmpitɛilaŋ (ɔdinatɛɛlulaŋ) la mala ni le mi wallo hoo tosaŋ chɔ chɔ. O cho kɔmpitɛilaŋ (ɔdinatɛɛlulaŋ) te la poonyiaa le wanaa poonyiaa le, kɛlɛŋgaa niŋ te le wanaa hiviaa. Kɛ, wanaa poo­nyiaa vɛlɛ a wanaa hiviaa soliŋ ndaŋ kpeku le wallo hivioo lachi chɔ chɔ. La nɔ yaula tɛɛsiaa ladiomndo leniŋ, vɛlɛ a nyɛm cheleŋ ŋ mala le sɔɔŋ maŋgalaŋ yɛ yiɔŋ hivioo wo. Seiyaa Chɛhowaa toosiaa nyɛ pum o kɔmpitɛiyo niŋ a ba nda, a veelu ndu o puuluei niŋ aa MEPS. Ndu mala ni mi yau nda poonyiaa o puuluei ­niŋndo hiviŋ o sɔɔŋ maŋgalaa bɔɔ bɔɔ niŋ. O mala vɛlɛ mi nyɛ poonyiaŋ koŋndo chɛlaŋ a fotueila cho o yauwo niŋndaŋ. Okoŋ kɔɔli, a yɔŋ ndaŋ naa nda toosiaa yaulaŋ nda.

Sɔɔŋ maŋgalaŋ pum, o cho wanaa bɔɔ le dimi muŋ te. Kɛ le yɛɛ naŋ wou yɛ sɛmbɛ waa ndoo kpɛ le hei tosaa? Kanifuule, Chɛhowa hɛnaŋ mi “waŋnda kpou a sɔla pioŋɔɔ, nduyɛ, ma sina tonya cho a ndu okɔɔ wo.”—Timoti Tasoo 2:3, 4.

• Vɛɛ yaula naalaŋ la looku yɛ poonyiaŋ?

• Lɛ yɛɛ naŋ hivi yɛ yaula naalaŋ o sɔɔŋ maŋgalaa bɔɔbɔɔ niŋ?