A mɛɛ kiilanɔɔ Pɔɔl poonyiaa o Kɔliŋtiaŋ Tasoo 6:​1-8 niŋ yɛ, maa mi waŋnda ndaa kuɛ o masaleŋ a chaaŋaa ndaa laalaŋnda. Mi i tɛɛmbuu ndu kɔl maa Kilisiɔŋnda apum o kundaa Kɔliŋ niŋ, te suɛi ndii keekaŋ nda tɛɛŋ pɛ nda chaaŋ ndɔ laalaŋndo, o ‘kuɛ sei ndɔɔ biyɔɔ o masaa lo, nduyɛ, mi wanaa cho wanaa piɛiyaa Mɛlɛka le va a chal kɔɔsɔla laŋ bɔŋaa nya tɛɛŋ.’ (Suɛi 1) Mi Pɔɔl dimi maa o bɛnda mi Kilisiɔŋnda chɔm suɛi chaaŋ nda laalaŋndo o lemasa le. Kɛ ndaa nɔ mi ndaa toosiaa sɔɔŋ ndapila tɛɛŋ o kundaa niŋ. Ŋ yaasiaŋndɔ le sabu sawaa hoo yɔŋguŋndo, okoŋ kɔɔli, miŋ tofa sɔɔŋ pum ŋ sawaa hoo piiliaŋ te woŋ.

Te sɔŋgɔ leyulaa ɔɔ yondoo luɛi naa tɛɛŋ naa chaaŋ naa laalaŋndo pɛ, ŋ nɔ fɛŋ miŋ kindiŋ le ndu tosiaa a mɛɛ Chɛhowa yeema yɛ. O cho a mɛɛ naŋ yeema yɛ le. (Pulɔwaa 14:​12) A mɛɛ Chiisu dimi yɛ, te kɛɛ sinapɛŋgoo luɛi nya pɛ tɛɛŋ nya waŋndo, o bɛnda mila toosiaa ndu chɔ chɔ yɔŋii o simnuŋ suɛi bɛndu. (Maatiu 5:​23-26) Kɛ i cho suɛi kɔl tambɛi le sinaa maa mi Kilisiɔŋnda apum hiu ba a kɔllo tuuloo, ma bii seiyo o lemasa. Mi Pɔɔl dimi aa, “Nya wanaa laalaŋnda, kɔla kalala nya kua a sɔɔŋ nyaŋ o kootiilaŋ niŋ ndaŋ bɛɛ suee, la chɔm maa la faŋaŋ o pɛɛku iwana Mɛlɛkayaa choo.” Le yɛɛ? Saboo cho ni maa suɛi suu waa naa tɛɛmbuu kundaa tɔɔ, nduyɛ mi i ke vɛlɛ Mɛlɛka naŋ cho piɛiyo wo diola wɔɔŋndaŋ. Le hei, ŋ nɔ miŋ kɛsiŋ nyɛ Pɔɔl dimi hoo wo o kɔl. Ndu cho ni, “Te chaaŋ num tosal num suɛi wɔɔŋnde pɛ, o bɛnda bɛɛ mi i loŋnuŋ num lende.”—Sɔɔŋ 7.

Mi Pɔɔl dimi vɛlɛ maa Mɛlɛka yɔŋgu kɛɛsiaa kɛndɔɔ o kundaa niŋ le sɔŋgɔɔ toosiaa. Wanaa chua chilaŋ o kundaa niŋnda nɔ taasioo, nduyɛ a sina tonya cho o Baabuiyo niŋndo. Mi Pɔɔl dimi vɛlɛ maa “a nɔla ma dimi sɔɔŋ wanaa laalaŋnda tɛɛŋ” te o hiŋ pɛ o sɔɔŋ waa naa choo. (Sɔɔŋ 3-5) Mi Chiisu yɔŋgu silaa maa, te chaaŋ num wana laalaŋndo o tosal num yɔŋ wɔɔŋndo pɛ, mɛɛ choola wɔɔŋ wɔɔŋndaŋ  dimioo a kuuyu kuuyoo cho naa yɛ, ŋ nɔ miŋ tosa nyɔɔŋ sala yaa le ndi toosiaa. O tasoo, veelu ndu nya ŋiɔɔŋ kpe ma chɔm ndu nyɛ o tosa wo. Te o sɔlɔlaŋ te, o diiŋ ndɔɔ, a veelu seiyo opilɛ ɔɔ a ŋiɔɔŋ. Te o yeŋ vɛlɛ nya nilaŋ te, o yaa ndɔɔ o koŋ kɔɔli, a chɔm kunda wanaa laalaŋnda. Ndu cho yɛ wanaa chua chilaŋ o kundaa niŋnda ni.—Maatiu 18:​15-17.

Wanaa chua chilaŋ o kundaa niŋnda cho wanaa kɔɔsaa ŋwaŋ tɛɛŋ te, kɛlɛŋgaa niŋ te wanaa leyula. A kɛsi lasawa puaapiliaa tɛɛŋ le sɔŋgɔ leyula toosiaa nda tɛɛŋ te. Kɛ, a kindiŋ le ma mala wanaa sɔŋgɔɔ cho tɛɛŋ nda, le ma tol sila Baabuiyo kɔɔli, nduyɛ, ma chɛlaŋ o nɛi kɔl nyuloo niŋ. Te a sina mɛɛ nda bii suɛi keŋ yɛ le, o bɛnda ma dimul buɛi ibuŋgaa, te koŋ te, lɛuvii Seiyaa Chɛhowaa o lɛŋnde leŋ niŋ. Kɛ sɔɔŋ pum cho ŋ chɛlaŋ a nyɛ Pɔɔl sila wo le. Sɔɔŋ kuɛɛ? Tofawɔ ŋpum.

Teleŋndaŋ lapum, mɛɛ mi masaleŋ le luɛi tɛɛŋ malaŋ kɔl nyuloo huŋ. Le taamaseliiyo, mɛɛ yau nɔɔ sɛɛsiaa cho naa yɛ, te waŋndo kukaŋ pɛ chuaa, te waŋndo kɛɛ pɛ le chuauwaa o velu wa mandaa, te o cho pɛ waŋndo opilɛ a lo kueelaŋ biyɔɔ tei mi yulaleŋ le del wɔ wa, te waŋndo kɛɛ pɛ le num kioo nyɛ nya chɛlaŋ choo wo, te waŋndo yeema pɛ yaulaŋ toosiaa nda waŋndo tɛɛŋ. Lepum vɛlɛ, mi puaapilɛnɔɔ che maa o bɛnda mbo saala muɛiyaŋ o lemasa yɔŋii suɛi kuumbuŋ ndu choo. *

Te o ve tuŋ aa le sɛɛŋgiaŋndo kinɛi le suɛi kuɛ o lemasa le, mɛɛ o cho nyɛ Pɔɔl poonyiaa wo le nda tɛɛmbuu koŋ te. * Kɛ a koŋ kpou, nyɛ Kilisiɔŋnɔɔ nɔ mbo kɛsiŋ o kɔllo cho ni, diola Chɛhowa laŋ dindioo, kɔl nyuloo lueiyo o kundaa niŋ, vɛlɛ a diompilɔɔ. Kaalaa tosa ni mi wana o wana sina buɛiyaa Chiisuaa. Nduyɛ, “kaalaa . . . o ve le dɛnɛ ndɔ kɛndɔɔ koni le o landuŋ kɔl te.”—Kɔliŋtiaŋ Tasoo 13:​4, 5; Chɔŋ 13:​34, 35.