A mɛɛ Baabuiyo dimi yɛ, teleŋ kuɛɛ wana lanɔ Kilisiɔŋnɔɔ nɔ yɛ mbo kumbu bolleŋ, nduyɛ le yɛɛ? Ŋ tofaŋndɔ nyɛ kiilanɔɔ Pɔɔl poonyiaa a hei okɔɔ wo. O ke naa nɛi chɔmaa naŋ yeema wo le miŋ tosa kɛɛsiaa kɛndɔɔ, o ke Mɛlɛka bɛɛleŋndo. (Kɔliŋtiaŋ Tasoo 11:​3-16) Pɔɔl chɔm naa sɔɔŋ sala yaa. (1) nyɛ o wa tosaa mbo kumbu bolleŋ ndo, (2) fonda o wa mbo kumbu bolleŋ ndo, nduyɛ (3) le sabu o nɔ mbo kumbu bolleŋ ndo.

Nyɛ o wa tosaa wo. Pɔɔl chɔm sɔɔŋ ŋmuuŋ. Muŋ cho ni, piɛileŋ a yooŋgu kɛndɛ Mɛlɛkaa dimioo. (Sɔɔŋ 4, 5) Piɛileŋ yɛ le sim le suukaŋndo a Chɛhowa. Hau, yooŋgu kɛndɛ Mɛlɛkaa dimioo cho ni, nyɛ o nyɛ Kilisiɔŋnɔɔ pɛɛku waŋnda o Baabuiyo niŋ a Mɛlɛka okɔɔ. Baa dimioo Pɔɔl cho ni maa wana lanɔɔ nɔ mbo kumbu bolleŋ teleŋ o teleŋ o wa pɛ piɛileŋ, ɔɔ waŋndo Baabuiyo pɛɛkoo? Sako. Fonda wana lanɔɔ cho wa piɛiyo a waŋndo pɛɛkoo wo cho chɔm ni te o nɔ pɛ mbo kumbu bolleŋ, ɔɔ o nɔ mbo kumbu le.

Fonda o wa wo. Diomnda Pɔɔl dimi laŋ ndaŋ la cho naa chɔmndo fondalaŋ sala tiɔɔŋ. Yuŋgoo, vɛlɛ a kundaa. Mbo dimi aa, “Wana lanɔɔ ndu ndu wana cho ndu bolleŋ ndo cho pɔnɔ  ndɔ ni. . . . Kɛ nduyɛ, wana lanɔɔ ndu, te o wa Mɛlɛka piɛiyo pɛ, kɛlɛŋgaa mbo wa waŋndo Yooŋgu Kɛndɛ Mɛlɛkaa dimullo pɛ, o nɔ mbo kumbu bolleŋ. Te o kumbu bolleŋ fɛɛŋ te, mɛɛ o tɛɛmbuu pɔnɔ ndɔ, o cho ndu bolleŋ ndo labɛɛ.” (Sɔɔŋ 3, 5) O kɛɛsiaa nɔɔ niŋ, wana pɔnɔɔ Chɛhowa kɛsi ni maa ndu cho laandɔ bolleŋ ni. O nɔ mbo sina kɛsɛ maa pɔnɔ ndɔ nɔ ndu kpaayaa choo ni. Te o sina keŋ lapɛŋgu le, mbo chua foofo Chɛhowa pila ke pɔnɔ ndɔ wo, mɛɛ o tɛɛmbuu pɔnɔ ndɔ labɛɛ. Le taamaseliiyo, te o wa pɛ waŋndo Baabuiyo pɛɛkoo kɛ mi pɔnɔ ndɔ wa o fonda koŋ, o nɔ mbo kumbu bolleŋ le chɔmndo maa pɔnɔ ndɔ nɔ ndu kpaayaa choo. Mi pɔnɔ ndɔ yiŋndɔ bɛɛ le, o nɔ mbo kumbu bolleŋ, kanifuule ndu cho bolle yuŋgoo ni. * Te o wa yɛ piɛileŋ, te koŋ te, mbo wa waŋndo pɛɛkoo, kɛ mi poombɔ ndɔ pɔmbɔ yiŋndo wa o fonda koŋ? O nɔ mbo kumbu bolleŋ. Kɛ koŋ chɔm naa maa po ndɔɔ le cho yuŋgoo bolleŋ te. Kɛ le kpaaya Chɛhowa ke waŋ piaanduaa sɔla yiŋɔɔ o kunda leKilisiɔŋndo niŋnda.

Mi Pɔɔl suaa vɛlɛ a teleŋ cheleŋ okɔɔ o kundaa niŋ. Mbo dimi aa, “Te wana o wana wa pɛ mbo sɛɛŋgiaa pɛɛkoo hoo pɛ, mɛɛ nyɛ pilɛ kpe ya nɔ ni mi dimul wana koŋ. Ndu cho ni maa naa ni a kundala wanaa laalaŋaa Mɛlɛkaa, ŋ nɔ nɛi cheleŋ o hoo kɔɔli le Mɛlɛka piɛiyo lechoo le.” (Sɔɔŋ 16) O kunda leKilisiɔŋndo niŋ, waŋ piaanduaa yiŋnda nɔ dioo ni le waa bolleŋ. (Hibuluiya 13:​17; Timoti Tasoo 2:​11-14, NW) Puaa kinɛi nda yulu iso ni le chilaŋ chuaa, te koŋ te, le waa buɛiyaa malalaŋnda. Nda Mɛlɛka ke kalaŋndo ni le wanaa nduaa mandaa. (Walta Wanaa Chiisuaa 20:​28) Kɛ teleŋndaŋ lapum, mi bahawɛiyo fula o tosa ma soliŋ ndepilɛnɔɔ kpeku le mbo tosa wali wana pɔnɔ yiŋaa suiliŋndo nɔ kuee le tosaa wo. Le taamaseliiyo, ma dimul ndu lepum le bɔŋaŋ wali pollo biyɔɔ te wana pɔnɔ yiŋaa suiliŋndo ve loŋ te. Te ndepilɛnɔɔ wa pɛ pɛɛku Baabui o kɛɛsiaa wo tosaa mi wana pɔnɔ yiŋaa * wa ikɛi, o nɔ mbo kumbu bolleŋ le chɔmndo maa pɛɛku  o cho koŋ tosaa wo, puaa o kundaa niŋ nɔ ni ma tosa ndu.

O baa pilɔɔ choo, sɔɔŋ bɔɔbɔɔ cho a piɛileŋ okɔɔ ŋ ndepilɛnɔɔ nɔ mbo kumbu bolleŋ te woŋ. Le taamaseliiyo, te o wa pɛ nyunaa mulioo o bɔŋaŋnda naala leKilisiɔŋndaŋ, mbo wa o wali pollo niŋ nda pɔnɔ ndɔ, ɔɔ puaa pilɛnɔ cheleŋ, ɔɔ mbo wa chuauwaa nduaa yiŋndɔ le wa pɛɛkoo, te koŋ te, piɛiyo a nda latulu, o nɔ mbo kumbu lebol te. Kɛ mi suɛi cheleŋ fula mi i bii ndu kɔndɔfili. Te o sina nyɛ kpeekpei o nɔ mbo tosa o suɛi keŋ niŋ te, o nɔ mbo chɔɔlu yaasiaa tosa o yaula naalaŋ niŋ a ndi okɔɔ. * Kɛ a koŋ kpou, te o nɔ wɔ pɛ kiisaŋndo a nyɛ kpeekpei o nɔ mbo tosa wo, nduyɛ, mi kɔl ndɔ iyamaa dimul ndu le mbo kumbu bolleŋ, o cho suɛi wɔɔŋ te, a mɛɛ naŋ cho chɔɔ o fotueiyo niŋ a maluaŋ yɛ.

Le sabu o nɔ mbo kumbu bolleŋ ndo. O sɔɔŋ 10 niŋ, miŋ cha sabulaŋ la tiɔɔŋ le nyɛ wana lanɔ Kilisiɔŋnɔɔ nɔ mbo kumbu bolleŋ ndo. “Le sabu koŋ, wana lanɔɔ nɔ ni mbo kumbu bolleŋ, nduyɛ vɛlɛ le mi kiilaa Mɛlɛkaa sina. Koŋ chɔm ni maa o kpaaya pɔnɔ ndɔɔ bɛŋgu o cho ni.” O tasoo, yiyaŋndɔ a diomndaŋ ndaŋ, “koŋ chɔm ni maa o kpaaya pɔnɔ ndɔɔ bɛŋgu o cho ni.” Te wana lanɔɔ kumbu pɛ bolleŋ, mɛɛ o chɔm maa o sina kpaaya Chɛhowa ke waŋ piaanduaa yiŋaa o kundaa niŋndo. Hoo chɔm ni maa o kaala Chɛhowa, nduyɛ mbo diikuŋ ndu o ba bɛŋgu. Sabu diiŋ ndɔɔ cho ni, “le mi kiilaa Mɛlɛkaa sina.” Vɛɛ hei piiliaŋ yɛ maalikɛiya te wana lanɔɔ kumbu pɛ bolleŋ?

Maalikɛiya nɔ yeemɛi tau le ma che maa ŋ diikuŋ kpaaya cho o kɔɔna Chɛhowaa niŋndo, hoo o choo choo niŋ, vɛlɛ a hoo o leŋndeŋ choo. Nda bɛɛ sɔla tɔnɔɔ o taamasi wanaa  lahakiaa kɛsi o hei niŋndo. A nɔ ma tuisiŋ Mɛlɛka o ba bɛŋgu, nyɛ maalikɛiya apum bumba le tosaa o paandoo niŋndo. (Chudi 6) Lepum, mi maalikɛiya che maa wana lanɔ Kilisiɔŋnɔɔ sina sɔɔŋ lapɛŋgu, o nɔ kɔlkaloo, nduyɛ o nɔ taasioo mbo hiau bɛɛ wana pɔnɔ yiŋaa o kundaa niŋ. Kɛ a koŋ kpou, mbo chɔm bɛɛleŋ le kpaaya cho ndu choo wo. O teleŋndaŋ lapum niŋ, mi wana lanɔ Kilisiŋnɔɔ wa wana pɔyaŋndo o wa niŋ a Chiisu latulu o choo choo niŋndo. Wana lanɔ waa ndoo nɔ foofoo o choo choo niŋ le waa o masaleŋ choo a Chiisu latulu mbo hiau bɛɛ o maalikɛiya nɔ wo. Nuawɔ taamaselii kɛndɛ bɛndu se le mi maalikɛiya che hau waŋ laanduaa bolleŋ kumbɔɔ! Numpila yiyaŋndɔ a keŋ, le mi maalikɛiya waalaŋ o waalaŋ niŋ wa chɔɔ ndepiliaa tuisiŋndo, vɛlɛ a bɛɛleŋ chɔmndo le kɛɛsiaa hoo. O cho di bɛndoo pila le keŋnuŋ nda koŋ te?