1, 2. Yɛɛ naŋ nɔ yɛ miŋ tosa le miŋ lo o kaala Mɛlɛkaa bɛŋgu?

NAA kpou yeema miŋ wa kpeŋgbeleŋ nduyɛ miŋ wa kɛndiaa. Lelaŋ miŋ kindiŋ le nyɛdiaa kɛndɔɔ dioo, miŋ hiiluu dialloŋ teleŋ o teleŋ, nduyɛ miŋ manda dialuŋ naŋ. Ŋ vi ŋdial le muŋ kpou tosaa le, kanifuule, tɔnɔlaŋ la cho leniŋ. Kɛ ŋ nɔ vɛlɛ miŋ wa kpeŋgbeleŋ nduyɛ miŋ wa kɛndiaa o nɛi cheleŋ niŋ.

² Mi che bɛɛ ŋ kandu nyɛkɛndɛi le Chɛhowa sinaa, kɛ ŋ nɔ vɛlɛ miŋ hiou lachi a chaŋyɛi naŋ nɔ a ndu ve kindioo poŋ. Mɛɛ Chudi dɛɛniaa Kilisiɔŋnda le ma “Hiou lachi a waa o kaala Mɛlɛkaa bɛŋgu,” mbo tɛɛsiaa mɛɛ nda tosa ndi yɛ. Mbo dimul nda aa: ‘La . . . hiou lachi a dialluŋ kalaŋ sɔlaa o tiindaŋ nya nɔ hoo o Mɛlɛka niŋ ndo.’ (Chudi 20, 21) Lelaŋ, vɛɛ naŋ taŋgullɛ tiindaŋ kpeekpeiyo?

3-5. (a) Vɛɛ Setana yeema yɛ num ma yiyaŋ a sawala Chɛhowalaŋ? (b) Vɛɛ ŋ yiyaŋ yɛ a sawala Chɛhowalaŋ vɛlɛ a sawala mandaalaŋ?

³ I cho suɛi sɔvɛ le mi numpila laalaŋ kɛsɛ maa nɛi chɔmaa Chɛhowaa hiou bɛnda. Setana yeema num ma yiyaŋ maa sawala Mɛlɛkalaŋ la kendu bɔɔ biyɔɔ. Nduyɛ maa, a cho wa a nyaale te a kɛɛsiaa pɛ a ba num le sinaa teŋgeŋndo o kɛndɔɔ tɛɛŋ a o wɔɔŋndo. Chɔŋ o kpeloo Idɛŋ niŋ, Setana kindiŋ niŋ le tosaa mi waŋnda laalaŋ  a hei. (Chɛnɛsee 3:​1-6) Hau bɛɛ, o cho kindiŋndo kpoke le keŋ tosaa.

⁴ Setana nɔ pa di? Baa sawala Chɛhowalaŋ la kendu pa biyɔɔ? Sako. Le taamaseliiyo, yiyaŋndɔ maa a cho balɔɔ o kpele kɛndɛ kɛndɔɔ niŋ. Ma cha kpakioo num lachi. Mi kpakioo hoo kuuna num kɔlaŋ o fondaŋndo opum. Okoŋ ma dimi aa: ‘Le yɛɛ kpakioo hoo heu yɛ ya nɛiyo?’ Kɛ o foofo koŋ choo, ma tuɛi kpɔkuŋndo pɛɛliaa o kpaki koŋ kɔɔli. Vɛɛ ŋ yiyaŋ yɛ a kpaki koŋ okɔɔ suŋ suŋ? Ma naŋ kɔl le mɛɛ kpaki koŋ heu kpɔkuŋ koŋ nɛiyo o nɔla num dio le yɛ! Sawala mandaala Chɛhowalaŋ la cho ko maa kpaki koŋ. Nduyɛ, Setana cho ko maa kpɔkuŋ koŋ. Diom Mɛlɛkaa sila naa aa: “La manda nya pila a mɛɛ kaala nyalaŋ la nɔ mi la wa yɛ, nduyɛ mi la wa nyɛ kɛndɛ yekeŋ. Kanifuule, [Setana], o cho yaamɔɔnɔ nyaa wo, o cho balɔɔ mbo wa nuuviaa le wana o cha mbo tɛɛmbuu wo, mɛɛ kpɔkuŋ bɛndoo o balu visiaa kɔɔli le nda biyɔɔ yɛ.”—Pitɛ Tasoo 5:​8.

⁵ Chɛhowa yeema naa miŋ sɔla yoomu sɔvɛ sɔviɔɔ! O yeema mi Setana hui naa le. Le saboo hoo o ke naa sawalaŋ a sawala mandaalaŋ ni le naa mandaa nduyɛ miŋ wa a nyaale. (Ɛfisiaŋnda 6:​11) Mi Chemisi poonyiaa aa: “Wana pɛɛku yooŋgoo hoo nyɛ kɛndɛi yo, nduyɛ mbo hiou lachi a nyɛ o dimi wo tosaa wo, . . . salaa Mɛlɛka duau ndu le ndu tosaa ni.”—Chemisi 1:​25.

6. Vɛɛ naŋ looku yɛ laalaŋ maa nɛi Chɛhowaa hiou wa o sɔvɛ?

⁶ Te ŋ tol pɛ nɛi chɔmaa Chɛhowaa kɔɔli, ŋ cho wa a nyaale. Okoŋ, mi chaŋyɛi nɛi a ndu hiou lachi nduyɛ mi i kendu poŋ. Le taamaseliiyo, miŋ sɔla tɔnɔɔ te ŋ chɛl pɛ veelu o veelu naa le waa piɛileŋ o ndulo teleŋ o teleŋndo. (Maatiu 6:​5-8; Tɛsaloniaŋ Tasoo 5:​17) O dimul naa le yooŋgu kɛndɔɔ dimioo a waŋnda pɛɛkoo. O dimul naa vɛlɛ le chuuŋgiaŋndo diompilɛ le ndu  piɛiyo a dɛɛniaŋndo vellaa velle. Te ŋ diikuŋ ndu pɛ, miŋ wa a nyaale. (Maatiu 28:​19, 20; Kaleesiaŋnda 6:​2; Hibuluiya 10:​24, 25) Te ŋ yiyaŋ pɛ mɛɛ sɔɔŋ muŋ tosaa kindi niŋ tiindaŋ naa poŋ yɛ, ŋ cho chɔɔlu laalaŋ kɛsɛ maa nɛi chɔmaa Chɛhowaa hiou bɛnda.

7, 8. Yɛɛ mala yɛ naa miŋ mal buulaŋndo le tɔɔndaŋnda cho naa komal o chilaŋ niŋndaŋ?

⁷ Naapum miŋ buulaŋ maa o chilaŋ niŋ, tɔɔndaŋ kala kalaa cho naa komal, nduyɛ maa ŋ nɔla niŋ ndu simul te. Te a yiyaŋ niŋ pɛ lende, loonuŋ nyɛ Chɛhowa dimi wo. O dimi aa: “Ya cho Mɛlɛka Yaawɛɛ, Mɛlɛka nyaa ni. Le teleŋ o teleŋ nyɛ bɛnda le tosaa wo, ndu ya I pɛɛku nya ni, nduyɛ mi chɔm nya nɛi nya nɔ le kɔlaŋ choo wo. Te nya aa tuei ya diom pɛ, mi nya aa tosa nyɛ ya I dimul nya wo, sala bɛndoo o wa wa nya choo, nduyɛ mi ndu oo wa nya choo le fɛɛŋ a fɛɛŋ, mɛɛ pioo o hiau nuaa o vela le yɛ.  Mɛɛ mɛŋndaŋ o Pee Mɛŋma Ihɛllo ma huŋ nuaa a kpaaya bɛndoo yɛ, lende dɛnɛ nya kɛndɔɔ ndu oo huŋ niŋ a kpaayaa kɔɔli ni.”—Aisaya 48:​17, 18.

⁸ Te ŋ diikuŋ pɛ Chɛhowa, kɔl nyulu naa cho wa maa pee vela le wo, nduyɛ, sakpoyɛi nɛi cho wa maa pee mɛŋma ihɛl pɛŋgi a kɔŋgɔɔ lɔɔ le wo. Nyɛ o nyɛ komal naa bɛɛ o yoomoo niŋ, ŋ tiuba miŋ sim yi. Baabuiyo mɛi lediom aa: “Chɔm Mɛlɛka Yaawɛɛ ba num havɛiyo, o nɔla mbo mala num. Mɛlɛka mel wanaa cho ndu o hɔl sakpo wa mi yaamɔɔwa yem nda le.”—Sam 55:​22.

9, 10. Yɛɛ o sim yɛ le waa kaasoŋnɔɔ?

⁹ Mɛɛ ŋ kindi chaŋyɛi numnde nya Chɛhowa fau yɛ, lende koni ŋ hiau ‘lachi a sɔɔŋ ŋkaasoŋndoŋ pɛiyo’ ni. (Hibuluiya 6:​1) Yɛɛ o sim yɛ le waa kaasoŋnɔɔ?

¹⁰ Ŋ tuu kaasoŋyɛi leKilisiɔŋnde a wɔsiŋ naŋ nɔ woŋ te. Le simnɔŋndo kaasoŋnɔɔ o Mɛlɛka piɛiyo niŋ, ŋ nɔ miŋ siiŋguu Chɛhowa chaaŋ naa kɛndɛ kɛndɔɔ nduyɛ miŋ kindiŋ le sɔɔŋ chɔɔ mɛɛ o cha muŋ yɛ. (Chɔŋ 4:​23) Mi Pɔɔl poonyiaa aa: “Wanaa cho haa nyɛ wana chieeyɛi ndɛi i dimul nda le tosaa wo, maa ndu nda tosa ni wa, wanaa waa lende nyɛ wana chieeyɛi keŋ i dimul nda wo, ndu nda landuŋ kɔl le tosaa ni. Kɛ wanaa tosa nyɛ nyina . . . Mɛlɛkaa o dimul nda wo wa, nda nda, nyɛ Mɛlɛka o hɛnaŋ ndo, ndu nda landuŋ kɔl le tosaa ni.” (Luomaŋnda 8:​5) Te waŋndo wa pɛ kaasoŋnɔɔ o Mɛlɛka piɛiyo niŋ, o hendu kɔllo o yelelaŋndo choo a nyɛm kiɔɔŋ te. Kɛ, mbo handu kɔllo o Chɛhowa piɛiyo choo, nduyɛ, mbo tosa kɛɛsiaalaŋ a taasi o yoomu ndɔɔ niŋ. (Pulɔwaa 27:​11; nuawɔ Chemisi 1:​2, 3.) O chɛl mi kɔl ndɔɔ nyindu ndu le suɛi wɔɔŋnde tosaa le. Kaasoŋnɔɔ o Mɛlɛka piɛiyo niŋ sina nyɛ cho o kɛndɔɔ wo nduyɛ o cho o bɛɛndiaŋ le ndu tosaa.

11, 12. (a) Yɛɛ Pɔɔl ndoo dimi yɛ a Kilisiɔŋnɔɔ sinaa ‘yɛ yiɔɔ suɛi naŋ le tosaa ve tɛɛŋ, a suɛi niŋ le tosa le ve’? (b) Vɛɛ simnɔŋndo Kilisiɔŋnɔ kaasoŋnɔɔ cho yɛ nyɛ pilɛ a simnɔŋndo wana nyaanaŋndo?

 ¹¹ Sɛmbɔɔ yeemaŋ ni le simnɔŋndo kaasoŋnɔɔ. Mi Pɔɔl dimi aa: ‘Wana cho niŋ kaasoŋnɔɔ wo, ndu dia nyɛdiaa yɔŋaa hoo ni. Wana waa nuaa ndu, ndu lo maluaa pɛiyo haaa mbo sina yɛ yiɔɔ suɛi naŋ le tosaa ve tɛɛŋ, a suɛi niŋ le tosa le ve.’ (Hibuluiya 5:​14) Diomndo hoo ‘pɛiyo’ tosa mi waŋndo yiyaŋ a mɛɛ wanaa nyaanuŋ nyaanɔŋ labɛɛlaa wa pɛɛku yɛ.

¹² Te ŋ che pɛ wana nyaanuŋ nyaanɔŋ labɛɛlaa wo kiltaŋ, ŋ sina maa teleŋndo a pɛɛkoo tosa ni mbo simnɔŋ wana waa lende. A vilu ndu wana nyaanaŋ te. Te chɛlɛkpɔɔ veluŋ pɛ, o nɔla wɔ peloŋ a balaŋ soliŋ kpeku nyɛkɛndɛi le. Kɛ mɛɛ teleŋndo hiau fau, mbo pɛɛku mɛɛ wana saa nyɔɔ yɛ, a mɛɛ wana kua yɛ. Te o pɛɛku pɛ, o nɔla mbo simnuŋ wana nyaanaŋ labɛɛlaa. O nɛi pilɛ koŋ choo, teleŋndo a pɛɛkoo yeemaŋ ni le simnɔŋndo Kilisiɔŋnɔ kaasoŋnɔɔ.

13. Vɛɛ naŋ pɛɛku yɛ le yiyaŋndo mɛɛ Chɛhowa yiyaŋ yɛ?

¹³ O yauwo hoo niŋ, ŋ pɛɛku le yiyaŋndo mɛɛ Chɛhowaa yiyaŋ o sɔɔŋ choo yɛ. Nduyɛ, le sɔɔŋ chɔɔ mɛɛ Chɛhowa che muŋ yɛ. Ŋ pɛɛku le balikaa melaa a kaalaa chɔmndo le sawala Chɛhowalaŋ. Te ŋ wa pɛ kɛɛsiaalaŋ tosaa, ŋ nyunaŋ naapila aa: ‘Sawala kuɛɛ la chɛlaŋ yɛ a suɛi hei? Sawala mandaala Baabui kuɛɛ ya soliŋ yɛ kpeku? Vɛɛ ya duau yɛ laŋ o wali niŋ? Yɛɛ Chɛhowa yeema yɛ ya mi tosa?’—Nuawɔ Pulɔwaa 3:​5, 6; Chemisi 1:​5.

14. Yɛɛ naŋ nɔ yɛ miŋ tosa te ŋ yeema pɛ tiindaŋ naa kindioo?

¹⁴ Fɛɛŋ bɛɛ ŋ mel tiindaŋ naa taŋgullo o Chɛhowa niŋ te. Mɛɛ nyɛdiaa kɛndɔɔ nɛŋi naa dialuŋ naŋ yɛ, lende koni pɛɛkoo a Chɛhowa okɔɔ kindi tiindaŋ naa ni. Mɛɛ naŋ kandu Baabuiyo pɛɛkoo, miŋ pɛɛku tonyala taselaŋ a Chɛhowa okɔɔ nduyɛ a nɛila ndɔlaŋ. Ŋ nɔ miŋ mɛɛlu loŋ te.  Ŋ nɔ miŋ hiou lachi a sɔɔŋ yiŋgoloŋ ndoŋ sinaa. Keŋ koni Pɔɔl ndoo yiyaŋ ni mɛɛ o dimi aa: “Wana cho niŋ kaasoŋnɔ wo, ndu dia nyɛ diaa yɔŋaa hoo ni.” Baabuiyo dimul naa aa: “Kɔl kaloo cho nyɛ kpeekpei o yoomu wana chioo niŋ mbo hiau nyɛ o nyɛ.”—Pulɔwaa 4:​5-7; Pitɛ Tasoo 2:​2.

15. Vɛɛ i cho yɛ suɛi sɔvɛ le Chɛhowa a chaaŋaa naa laalaŋnda kaalaa kpeekpei?

¹⁵ Mi waŋndo nɔ kɛndiaa nduyɛ mbo wa kpeŋgbeleŋ. Kɛ le mbo lo lende, o sina maa mɛɛ mbo hiou lachi a ndupila mandaa nyɛkɛndɛi. O nɛi pilɛ koŋ choo, wana cho kaasoŋnɔɔ wo sina maa o nɔ mbo tosa wallo kalaŋ le mi chaŋyɛi lo ikala poŋ nda Chɛhowa tɛɛŋ. Pɔɔl loonuŋ naa aa: “Wana o wana nya pila la mɛɛndaŋ o kɔlta nyalaŋ niŋ, wana o wana mi num pila kelu yamɛi te a cho pɛ hiouwɔɔ lachi a tiindaŋndo nɔɔ o Kiliti niŋ.” (Kɔliŋtiaŋ Diiŋ Ndɔɔ 13:​5) Kɛ nyɛ cheleŋ yeemaŋ mbo hiau tiindaŋ kpeekpeiyo nɔɔ. Kaalaa le Chɛhowa, a kaalaa le puaapiliaa a ndepiliaa naa nɔ mbo hiou lachi a hindɔɔ. Mi Pɔɔl dimi aa: “A yɔŋ bɛɛ . . . mi I nɔ dɛnɛ sinaa kpou, nduyɛ, o wa bɛɛ mi I nɔ laalaŋndo maa a yɔŋ bɛɛ aa pembei ni, mi nɔla mi dimul ndi aa, faŋaŋ, o koŋ kɔɔli, mi i faŋaŋ, kɛ te I kaala chaaŋ ni wana chioo le mɛɛ I cho nyɛ o nyɛ kposoŋ te.”—Kɔliŋtiaŋ Tasoo 13:​1-3.

16. Vɛɛ Setana yeema yɛ naa miŋ yiyaŋ?

¹⁶ Setana yeema naa miŋ yiyaŋ maa fɛɛŋ bɛɛ ŋ nɔla miŋ nɛŋi Chɛhowa kɔl te. O yeema naa miŋ tambu kɔl nduyɛ miŋ yiyaŋ maa nɛi o nɛi cho le bahawɛila naalaŋ solioo le. O yeema naa miŋ laalaŋ a chaaŋaa naa Kilisiɔŋnda le, nduyɛ o yeema naa miŋ wa a nyaale le. (Ɛfisiaŋnda 2:​2) Setana sina maa yiyaŋnda wɔɔŋndaŋ la nɔla mi la tɛɛmbuu naa kɔllo. O sina vɛlɛ maa, la nɔla mi la tɛɛmbuu chaŋyɛi nɛi a Chɛhowa. Kɛ Chɛhowa ke naa nyɛ mala naa  le yiyaŋnda wɔɔŋndaŋ chɔulabaa wo. Ndu cho tiindaŋndo ni.

17. Vɛɛ tiindaŋndo cho yɛ nyɛ sɔvɛ?

¹⁷ O Tɛsaloniaŋ Tasoo 5:​8 niŋ, mi Baabuiyo tuu tiindaŋ naa a mɔsil manda po chɔuwo bolleŋ ndo. Mbo veelu mɔsil koŋ maa tiindaŋ piŋi naa wo. Te ŋ dɔu pɛ tiindaŋndo o mɛila Chɛhowalaŋ niŋ, koŋ mala naa miŋ manda yiyaŋnda naalaŋ okoŋ, miŋ soliŋ yiyaŋnda wɔɔŋndaŋ o kɔl.

18, 19. Vɛɛ tiindaŋndo luei yɛ Chiisu yoomuaŋ?

¹⁸ Chiisu ndoo nɔ tiindaŋndo. Mi tiindaŋndo hoo kindi ndu poŋ. O nyumma ndɔ ma mɛɛlaŋ choo o chieeŋndo choo, mi simulta kala kalalaŋ la komal ndu o lepula. Mi chaaŋ ndɔ pisi ndu. Mi o pilɔɔ viinuŋ maa o sina ndu le. Mi a tuaa mal ndu ma nyaanuŋ. Mi wanaa nda fula chiee pilɔɔ wa simul ndu, nduyɛ ma dimi le ma dii ndu diyɔɔ imɔnɔɔ. Yɛɛ mala yɛ ndu le sɔɔŋ palaŋ muŋ kpou biuwɔŋndo? “Le kɔl kɛndɛ wa ndu chumndo  lachi wo. Le hei, o chue bɛɛ bɛɛla tambɛila o sɔla laŋ ndaŋ maa la cho nyɛ o nyɛ le. O cho niŋ hau ichali o fondaŋ lebiɔɔ o ba kɛndɛ Mɛlɛkaa choo.”—Hibuluiya 12:​2.

¹⁹ Mi Chiisu sina maa te o lo pɛ o tiindaŋndo choo, o cho Finya ndɔ saŋgalaa chuu nduyɛ mbo chɔɔmuu Setana maa wana lachoowaa o cho ni. Tiindaŋndo hoo ke ndu kɔl kɛndɔɔ tau ni. Mbo sina vɛlɛ maa o cho suŋ miiŋgu diompilɛ nda Finya ndɔ o choo choo niŋ. Tiindaŋndo hoo mala ndu ni mbo biunuŋ. Maa Chiisu, ŋ nɔ miŋ handu kɔllo o tiindaŋ naa choo. O cho naa mala miŋ biunuŋ mɛɛ mɛɛ la wa.

20. Yɛɛ mala yɛ num ma nɔ yiyaŋ kɛndɔɔ?

²⁰ Chɛhowa cho tiindaŋ numndo a biuwɔŋ numndo chɔɔ. (Aisaya 30:​18; nuawɔ Malakai 3:​10.) O mɛi lediom maa o “nɔla mbo ke num nyɛ kɛndɛ ŋ yeema o kɔl numndo niŋ ndo.” (Sam 37:​4) Lelaŋ, handu kɔl numndo o tiindaŋ numndo choo. Setana yeema num ma mal  tiindaŋ numndo. O yeema num ma yiyaŋ maa Chɛhowa cho tosa nyɛ o dimi wo le. Kɛ chɛl mi yiyaŋnda wɔɔŋndaŋ la tiu num ba le! Te a che pɛ maa tiindaŋ numndo kandu tolɔɔ toolo, nyuna Chɛhowa le malaa. Loonuŋ a diomnda cho o Filipiaŋnda 4:​6, 7 niŋndaŋ. O dimi aa: “La nɔ buulaŋ o isɔɔ isɔɔ niŋ te. Nduyɛ, isɔɔ o isɔɔ nya wa Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ, pɛŋgu o pɛŋgu nya wa ndu nyunaa le nyɛ o nyɛ pɛ, la mel ndu balikaa. O koŋ kɔɔli, kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo nɔla mbo manda kɔlta nyalaŋ, a yiyaŋnda nyalaŋ, kani fuule, le mɛɛ nya cho o diom pilɔɔ niŋ a Chiisu Kiliti yɛ.”

21, 22. (a) Yɛɛ Mɛlɛka tuu yɛ le chieeŋndo? (b) Yɛɛ ŋ kɛɛsiaa yɛ le tosaa?

²¹ Teleŋ o teleŋ, wa yiyaŋndo a chila kɛndɛla cho num lachi laŋ okɔɔ. O lo niŋ chobe, mi wana o wana cho wa o chieeŋndo choo wa Chɛhowa piɛiyo. (Sɔɔŋ Chɔɔmaŋndoŋ 7:​9, 14) Yiyaŋndɔ a yoomoo o chieeŋ sɛnɛiyo niŋ. O wa niŋ o kɛndɛ mbo hiou nyɛ o nyɛ! Setana, nyinaa nduaa wɔɔŋnda, a dɛnɛ wɔɔŋndo kpou cho faŋaŋ. A cho delɔɔ a naa le, nduyɛ a cho wu le. Te a tendu pɛ lɔɔlɔɔ, a cho waŋnɔŋ kpeŋgbeleŋ. A cho wa a nyaale le waa yoomu. Waŋnda cho wallo tosa diompilɛ le chieeŋndo kpede miŋgioo kpele hɛnɛkiɔɔ. Nyɛdiaa kɛndɔɔ cho wa le wana o wana. A cho nɔ fondaŋ chalaa sɔviɔɔ. Wanaa dɛnɛ wɔɔŋ ve lɛ niŋ te. Nduyɛ, wanaa latandaa ve lɛ niŋ te. Wanaa kaa kɛndiaa kposoŋ wa niŋ ni. Waŋchieeya kpede o chieeŋnde choo cho ‘sɔla naŋɔɔ mɛɛ I yɔŋnuŋ a chuauwaa Mɛlɛkaa yɛ.’—Luomaŋnda 8:​21.

²² Chɛhowa yeema num ma siiŋguu ndu Chaaŋ num kɛndɛ kɛndɔɔ. Lelaŋ, kindiŋ o nɛi o nɛi niŋ ma diikuŋ Chɛhowa nduyɛ lepaa o lepaa ma sɔɔŋguu ndu ikɛi kpɛɛluŋ. Maa naa kpou hiou lachi a waa o kaala Mɛlɛkaa bɛŋgu le fɛɛŋ a fɛɛŋ!—Chiud 21.