1, 2. Vɛɛ kɔllo wa yɛ Chɛhowa te o che naa pɛ kindiŋndo le sandei chɔmndo?

PAALE pilɛ, mɛɛ poombɔɔ fula o sukuu mbo wa kɔlaŋ o bɛɛ, mbo cha bɔlɔ ŋkanioo lɛŋ a kanioŋ ŋ piaa cha. Yɛɛ o cho yɛ tosa? Ndoo nɔla mbo kuɛŋ a ndu. Kɛ mbo miŋgul wana nyɔɔ. Mɛɛ kalaa poombɔɔ hoo tuei a ndi okɔɔ, mbo naŋ kɔl tau a nyɛ o tosa wo.

² Mi kalaŋ chuauwaa bɔɔbɔɔ naŋ kɔl tau te chuauwaa ndaa chɔm pɛ sandei. Chɛhowa Finya naa o choo choo niŋ, Mɛlɛka tonyaa o cho ni. Nduyɛ, mbo naŋ kɔl te ŋ chɔm pɛ sandei. (Sam 31:​5) Ŋ yeema miŋ nɛŋi ndu kɔl nduyɛ miŋ “tosa nyɛ bɛnda le tosaa wo o nɛi o nɛi niŋ.” (Hibuluiya 13:​18) I ve bɛɛŋ bɛɛŋ le sandei chɔmndo le. Ŋ yaasiaŋndɔ simultaŋ lahiɔɔlu. Ŋ cho vɛlɛ saalɔŋ tɔnɔlaŋ latiŋ te ŋ tiu pɛ simultaŋ ndaŋ ba.

3-5. (a) Vɛɛ naŋ huinuŋ yɛ naapila? (b) Yɛɛ mala yɛ naa miŋ sandu a naapila?

³ Le miŋ chɔm sandei o waŋnda lo, mɛɛ miŋ sandu fɛŋ a naapila. O cho lɔɔlɔɔ le hei wa bɛɛŋ bɛɛŋ te. O wɔsiŋ kɛmɛ tasoŋ niŋ, puaapiliaa wa o kundaa Lawodisia niŋnda wa ndapila huinɔŋndo. A wa yiyaŋndo maa a cho Mɛlɛka kɔllo nɛŋioo. Kɛ o kpeekpei  niŋ, a ve ndu kɔl nɛŋi le. (Sɔɔŋ Chɔɔmaŋndoŋ 3:​17) Naa bɛɛ, mɛɛ naŋ yiyaŋ maa ŋ cho yɛ, ŋ ve lende kpeekpeiyo le.

⁴ Mi buɛi Chiisu wo Chemisi tɛɛsiaa aa: “Wana chua hoo ndu pila maa wana piɛiyaa Mɛlɛkaa o cho ni, kɛ mbo bumba sondo ndɔɔ mandaa wo, mɛɛ ndu pila cho huinɔŋndo ni. Mɛɛ Mɛlɛka ndɔ piɛiyaa simnuŋ suɛi fondo fuu.” (Chemisi 1:​26) Lepum miŋ yiyaŋ maa le mɛɛ naŋ cho sɔɔŋ kɛndɔŋ ŋpum tosaa yɛ, ŋ soliŋ bɛɛ diomnda wɔɔŋndaŋ o sondo, ɔɔ miŋ dimi choolaŋ, Mɛlɛka bii naa tɔɔyaŋ te. Te lende i cho ni, mɛɛ ŋ cho naapila huinɔŋndo. Yɛɛ mala yɛ naa miŋ mal naapila huinɔŋndo?

⁵ Te ŋ nuaŋnuŋ pɛ o tofaŋndo niŋ, miŋ che mɛɛ dialuŋ naŋ cho o kɔɔ yɛ. Te ŋ nua pɛ o Baabuiyo niŋ, miŋ che wanaa suu naŋ cho o kɔlta naalaŋ niŋnda. Baabuiyo nɔla mbo mala naa miŋ sina naa naŋ kendu ŋdialla, a naa naŋ vi ŋdialla. Miŋ sina maa ŋ nɔ miŋ siŋga yiyaŋ naa, sɔɔŋ naŋ tosa woŋ, a mɛɛ naŋ suaa yɛ. (Nuawɔ Chemisi 1:​23-25) Kɛ te ŋ yiyaŋ pɛ maa ŋ nɔ sɔŋ kposoŋ te, mɛɛ ŋ nɔla miŋ siŋga kaala naalaŋ te. Lelaŋ, ŋ nɔ miŋ soliŋ Baabuiyo kpeku le miŋ yaasiaŋ naapila nyɛkɛndɛi. (Chaŋ Imɔnɛ Chɛluimaya Wo 3:​40; Hakai 1:​5) Piɛileŋ bɛɛ le mala naa miŋ sina wanaa kpeekpei naŋ cho wa. Ŋ nyuna Chɛhowa o piɛileŋ niŋ le mbo yaasiaa naa, nduyɛ mbo mala naa miŋ che siɔwuŋ naŋ, okoŋ miŋ siɛɛnduu muŋ. (Sam 139:​23, 24) Ŋ loonuŋ maa, ‘Mɛlɛka Yaawɛɛ o tul wanaa tosa sɔɔŋ wɔɔŋndoŋ nda leyɛ. Kɛ wanaa tosa sɔɔŋ kɛndɔŋ nda nda, kaalaa o kaala nda ni.’—Pulɔwaa 3:​32.

6. Le yɛɛ pɔnɔɔ a lanɔɔ nɔ yɛ ma sandu ndapila tɛɛŋ?

⁶ Sandei cho bɔɔ nyɛ sɔvɛ o yuŋgoo niŋ. Te pɔnɔɔ a lanɔɔ wa pɛ sakpo ndapila tɛɛŋ, a kiisaŋ a ndapila le. Nduyɛ, mi wana o wana tiindaŋ chaaŋ ndɔ. Waŋnda kɛɛ sandei chɔmndo o nɔɔ niŋ o nɛila bɔɔbɔɔ niŋ. Le taamaseliiyo, naapum mi wana cho o nɔɔ wo kandu i tɛsɛ tɛsɛi nda wana nda cho o nɔ niŋ te wo. Mbo nua fotueila tumfondolaŋ. Nduyɛ mbo kandu yeemɛi nɔɔ le wana cheleŋ o duumu niŋ. Mi wana ŋchondoo dimi aa, “Ŋ dou labali naa wanaa lachoowaa le, nduyɛ I yee naaŋaŋ a wanaa sondo yeelɛi le.” (Sam 26:​4) Te a nɔ pɛ yiyaŋ nɔɔlɛiyo le wana cheleŋ, mɛɛ a sendu nya wana  nya cho o nɔɔ niŋndo le. Nduyɛ mi hei pala nɔ numndo.

7, 8. Vɛɛ ŋ soliŋ yɛ Baabuiyo kpeku le chuauwaa numnda pɛɛkoo mɛɛ sandei cho nyɛ sɔvɛ yɛ?

⁷ Chuauwa bɛɛ nɔ ma pɛɛku maa sandei cho nyɛ sɔvɛ. Kalaŋ chuauwa soliŋ Baabuiyo kpeku le nda hei pɛɛkoo. Baabuiyo nɔ taamaseliila wɔɔŋndaŋ a wanaa kɛɛ sandei chɔmndo wa: Mi Ekaŋ tosa viileŋ. Mi Kɛhasi dimi choolaŋ le mbo sɔla kanioŋ. Nduyɛ, mi Chuda chiimbuu kanioŋ, o mɛɛlulaŋ mbo pisi Chiisu le kaniŋ humboŋ 30.—Chɔɔsuaa 6:​17-19; 7:​11-25; Masaa Bɛnduaa Diiŋ Nduaa 5:​14-16, 20-27; Maatiu 26:​14, 15; Chɔŋ 12:​6.

⁸ Taamaseliila kɛndɛlaŋ la cho vɛlɛ tau o Baabuiyo niŋ a wanaa ndaa chɔm sandei ya okɔɔ: Mi Chekɔpu dimul puaa nduaa le ma miŋgi kaniŋ ndaa saaluŋ ndoŋ. Mi Chɛfitaa nda chua ndɔɔ lo o buŋgɛi ndaa chuel Mɛlɛka ve choo. Nduyɛ mi Chiisu chɔm sandei o teleŋ kala kalaa bɛŋgu. (Chɛnɛsee 43:​12; Chɔɔchiaa 11:​30-40; Chɔŋ 18:​3-11) Taamaseliilaŋ ndaŋ la mala chuaambuaa ma bii bila maa sandei cho nyɛ sɔvɛ.

9. Te kalaŋ chuauwa wa pɛ wanaa sandaa, vɛɛ hei mala yɛ chuauwaa ndaa?

⁹ Kalaŋ chuauwa nɔla ma pɛɛku nyɛ o sawa mandaa Baabui sɔviɔɔ hoo niŋ. Ndu cho ni: “Te o wa pɛ mi la nɔla mi la pɛɛku chaaŋnda, vɛ niŋ la pɛɛku nya pila le? La cho waŋnda dimullo maa wana yɔŋ levii le, kɛ mi nya yɔŋ viileŋ.” (Luomaŋnda 2:​21) Te nyɛ kalaŋ chuauwa dimi wo wa pɛ teŋgeŋ a nyɛ nda tosa wo, mi chuauwaa ndaa sina. Te ŋ dimul pɛ chuauwaa naa le ma chɔm sandei, kɛ mi naapila wa o kafalaŋ choo, ŋ cho nda hɔlla hiŋ. Te chuauwa sina pɛ maa mi wanaa velu nda wa dimi choolaŋ, o yɔŋ bɛɛ o sɔɔŋ pɔmbɔŋ  niŋ, nda bɛɛ cho tosa nyɛ pilɔɔ kpe. (Nuawɔ Luku 16:​10.) Kɛ te chuauwa che pɛ maa wanaa velu nda wa sandu, hei mala nda mi nda bɛɛ huŋ simnuŋ kalaŋ chuauwaa sandaa.—Pulɔwaa 22:​6; Ɛfisiaŋnda 6:​4.

10. Vɛɛ naŋ chɔm yɛ sandei o balta naalaŋ niŋ naa chaaŋaa naa Kilisiɔŋnda?

¹⁰ Ŋ nɔ vɛlɛ miŋ chɔm sandei o puaapiliaa naa lo o kunda leKilisiɔŋndo niŋ. I wa tɛtɛlɛ le mi balta naŋ duau lepaa o lepaa laŋ la simnuŋ choŋgulaŋ ɔɔ miŋ tɛɛmbuu waŋndo tɔɔ. Te ŋ lambaŋ pɛ bali naŋ sina le wo dɔwɔɔ, ŋ cho choolaŋ dimi. O bɛnda bɔɔ miŋ ‘manda sondo naa.’ (Pulɔwaa 10:​19) Sandei chɔmndo cho naa maa ŋ nɔ miŋ dimi nyɛ o nyɛ naŋ yiyaŋ, nyɛ o nyɛ naŋ sina, a nyɛ o nyɛ naŋ tuei pɛ le. O yɔŋ bɛɛ aa nyɛ naŋ nɔ le dimioo wo cho tonya, te o ve suɛi naa le, o bɛnda miŋ dɔu ndi bali le. (Tɛsaloniaŋ Tasoo 4:​11) Waŋnda apum a chiee suɛi o waŋnda lo le. Ma dimi aa: “I wo le wana tonyaa dimul te.” Kɛ naa wanaa Chɛhowaa, diomnda naalaŋ la nɔ mi la wa lɔɔlɔɔ la yeelɛi nduyɛ mi la nɛŋi waŋnda kɔltaŋ.—Nuawɔ Kolosiaŋnda 4:​6.

11, 12. (a) Te waŋndo tosa pɛ hakioo mbo viaŋ haki ndɔɔ, vɛɛ o chɔɔlu yɛ bahawɛiyo kui? (b) Nyunala yɛɛ naŋ nɔ yɛ miŋ nyunaŋ lepum? (c) Vɛɛ naŋ chɔm yɛ sandei o kɔɔna Chɛhowaa lo?

¹¹ Bɛnduaa kundaa Chɛhowa ke wallo ni le kundaa malaa. I wa tɛtɛlɛ le mi bɛnduaa mala naa te ŋ chɔm pɛ sandei o nda lo. Le yɛɛ? Te a del pɛ a naa okoŋ ma kuɛ o wana chiɔuwaa lo, a viŋ ndu pa mɛɛ naa cho num paaliaŋndo yɛ? Te a tosa pɛ keŋ, vɛɛ o cho yɛ num chiɔu? Lende koni, te ŋ tosa pɛ haki wɔɔŋ wɔɔŋndo, ŋ nɔ miŋ dimi choolaŋ te. Kɛ, ŋ nɔ miŋ kuɛ o bɛnduaa  lo miŋ dimul nda tonyaa a ndi okɔɔ. (Sam 12:​2; Walta Wanaa Chiisuaa 5:​1-11) Yiyaŋndɔ vɛlɛ a hei okɔɔ: Yɛɛ ŋ cho yɛ tosa te a sina pɛ maa chaaŋ num tosa haki wɔɔŋ wɔɔŋndo? (Lɛvitikɔɔ 5:​1) Dimioo ŋ cho ni aa: “Chaaŋ ni kɛndɛ kɛndɔɔ o cho ni, I cho ndu chɔɔmuu le”? Ɔɔ a cho loonɔŋ maa bɛnduaa kundaa cho loŋ le chaaŋ num malaa mbo kindi chaŋyɛi nduɛi poŋ a Chɛhowa?—Hibuluiya 13:​17; Chemisi 5:​14, 15.

¹² Ŋ nɔ vɛlɛ miŋ chɔm sandei o kɔɔna Chɛhowaa lo te ŋ wa pɛ konalaŋ poonyiaa, mɛɛ kona wali pollo cho naa yɛ. Nduyɛ, ŋ nɔ miŋ chɔm sandei te ŋ wa pɛ yauwo peeloo le kɔɔfaleŋ ɔɔ le wali lɔɔlɔɔ cheleŋ tosaa.—Nuawɔ Pulɔwaa 6:​16-19.

13. Vɛɛ naŋ chɔm yɛ sandei te ŋ wa pɛ yulaleŋ tosaa naa chaaŋaa naa Kilisiɔŋnda?

¹³ Puaapiliaa a ndepiliaa Kilisiɔŋnda nɔ ma muuliaŋ sɔɔŋ leyulaŋ a wali Chɛhowaa le. Le taamaseliiyo, te ŋ wa pɛ o Toŋgo leMasaa a o wali pollo niŋ, ŋ nɔ miŋ tosa yulaleŋ te. Nduyɛ, ŋ nɔ miŋ soliŋ puaapiliaa a ndepiliaa naa kpeku le nda tɔnɔɔ sɔlaa o ŋdial te. Te a chua pɛ Seiyaa Chɛhowaa le wallo, paawa nda a teleŋndo, ke nda nyɛ sɔlaa nya chɛlaŋ choo wo, nduyɛ ma ke nda tɔnɔ o tɔnɔ cho o wallo niŋ a mɛɛ sawaa dimi yɛ. Lepum, mi sawaa dimi le wana koŋ ɔɔ yuŋgu ndɔɔ dandaa dɔwɔɔ te a naa pɛ, ɔɔ ma paawa ndu teleŋ o wa o pɛŋgioo niŋndo. (Timoti Tasoo 5:​18; Chemisi 5:​1-4) Nduyɛ te o wa pɛ aa Sei Chɛhowaa chua num le wallo ni, yiyaŋ naa maa o cho num biyɔɔ o nɛi teŋgeŋndo choo le. (Ɛfisiaŋnda 6:​5-8) Kindiŋ ma tosa wallo o teleŋ nya chɛlaŋndo choo, nduyɛ ma dɔu kɔllo o wali nda cho num paawa wo.—Tɛsaloniaŋ Diiŋ Ndɔɔ 3:​10.

14. Yɛɛ Kilisiɔŋnda nɔ yɛ ma tosa tuupa ma mɔsɔŋa yulaleŋ tosaa?

 ¹⁴ Te o wa yɛ ma mɔsɔŋa yulaleŋ tosaa nya puaapilɛnɔɔ ɔɔ ndepilɛnɔɔ? Naapum mbo wa maa kanioŋ nya chuuŋgiaa ni ɔɔ kuoo nya bii ni. O sɔɔŋ waa naa niŋ, sawa mandaa Baabuiyo cho o naŋ soliŋ kpeku le naa malaa wo: Poonyiaa nyɛ o nyɛ o yau choo. Mɛɛ Chɛluimaya pendu lɛŋndeŋ, mbo toosiaa yaulaŋ latiɔɔŋ. Mbo tosa mi seiya pila sooŋ o opilɛ choo, okoŋ mbo kɛsi laŋ kpou le wana sinaŋ dɛnɛ loo. (Chɛluimaya 32:​9-12; tofa vɛlɛ Chɛnɛsee 23:​16-20.) Apum yiyaŋ maa te a toosiaa pɛ yaulaŋ, mɛɛ koŋ chɔm ni maa a laalaŋ a puaapilɛnɔ ndaa le. Kɛ o kpeekpei niŋ, te ŋ toosiaa pɛ yaulaŋ, koŋ mala kɛɛ sinapɛŋgoo luei naa tɛɛŋ te. Ŋ tembu kɔl te, nduyɛ ŋ sɛɛŋgiaŋ te. O yɔŋ bɛɛ o sɔɔŋ leyulaŋ niŋ, loonuŋ maa kɔl nyuloo o kundaa niŋ hiou wa nyɛ sɔvɛ a sɔɔŋ leyulaŋ.—Kɔliŋtiaŋ Tasoo 6:​1-8; tofa Diomnda Chɔɔlaalaŋ 30.

15. Vɛɛ Chɛhowa yiyaŋ yɛ a kafala cho tosaŋndo o yulaleŋ niŋndaŋ?

¹⁵ Ŋ nɔ miŋ chɔm sandei o wana o wana lo, kɔ bii a wanaa cho Chɛhowa piɛi le wa. Chɛhowa che ndi suɛi sɔvɛ le miŋ chɔm sandei. “Mɛlɛka Yaawɛɛ o tul wanaa tosal waŋnda kafalaŋ o wɔŋgulaŋ niŋ a sekeleilaŋ nda leyɛ. Kɛ wanaa wa haa sakpo a waŋnda o wɔŋgulaŋ niŋ nda, nda o kaala ni.” (Pulɔwaa 11:​1; 20:​10, 23) Sindɛ, mi waŋnda ndaa soliŋ sekeleilaŋ kpeku o wɔŋgulaŋ niŋ. Kɛ mi yulaa ndaa tosalaŋ kafalaŋ. Apum ndaa chii waŋnda paawa le. Apum yɛ, mi ndaa bii paawaa mbo hiou wɔŋgula nda pisilaŋ. Mɛɛ kafalaŋ la wa sindɛ yɛ, lende koni la cho hau o yulaleŋ niŋ ni. Nduyɛ mɛɛ Chɛhowa ndoo tul kafalaŋ leyɛ teleŋ koŋ yɛ, lende koni o tul laŋ leyɛ hau ni.

16, 17. Kafala suu yɛɛ naŋ nɔ yɛ miŋ faŋaŋ hau kɔɔli o chieeŋndo niŋ?

 ¹⁶ Mi sɔɔŋ luei naa balaŋ o kafalaŋ niŋndoŋ komal naa. Muŋ cho ni, te ŋ wa pɛ wallo nuuviaa, nyunalaŋ mulioo o yauwo choo le masaa waa, ɔɔ tofaa chuaa o sukuu. Mi waŋnda apum dimi choolaŋ, ma lisa ndapila mbo hiou mɛɛ nda cho yɛ, nduyɛ ma hiŋ waŋnda hɔlla a mulila ndalaŋ. Wanaa bɔɔbɔɔ yiyaŋ maa hei cho suɛi wɔɔŋ kposoŋ te. Kɔndɔfili bii naa le. Baabuiyo dimi maa o palɛi mɛɛlɛi chieeŋndo hoo niŋ, waŋnda “nɔ niŋ yiyaŋ le chaaŋaa ndaa waŋnda chieeya le, mɛɛ le nda pila. Wanaa kaala ŋkaniaa nda wa niŋ ni, . . . nyɛ o nyɛ cho nyɛ kɛndɛ ma tul ndu leyɛ.”—Timoti Diiŋ Ndɔɔ 3:​1-5.

¹⁷ Teleŋndaŋ lapum, miŋ che maa wanaa lakafaa cho batiuwaa sɔlaa o chieeŋndo hoo niŋ. (Sam 73:​1-8) Lepum, mi wallo hɛluŋ pɛŋ Kilisiɔŋnɔɔ. Ma tuŋ ndu kanioŋ. Nduyɛ ma bii ndu biyɔɔ wɔɔŋndo o wallo niŋ le mɛɛ o sandu yɛ. Kɛ baa tɔnɔɔ cho pa te ŋ lo pɛ o sandei choo? Ŋ yaasiaŋndɔ.

18. Le yɛɛ diola kɛndɛlaŋ la cho yɛ nyɛ sɔvɛ?

¹⁸ O chieeŋndo hoo niŋ, o kendu le saalɔŋndo wana sandaa, wana tonyaa, a wana wana nɔla ma tiindaŋndo. Nduyɛ naa kpou nɔ dioo le diola kɛndɛlaŋ tagullo le naapila. (Makal 7:​2) Te a wa pɛ wana sandaa, mi waŋnda apum mam num. Ma dimi maa diɔmndo ŋ cho ni. Kɛ wanaa cheleŋ cho num chandɔɔ le sandii numnde nduyɛ ma laalaŋ num. O chieeŋndo choo kpou, waŋnda sina Seiyaa Chɛhowaa le sandii ndɛi. Seiyaa Chɛhowaa waŋnda apum chua le wallo ni,  kanifuule a sina maa a sandu. Te a soli pɛ waŋnda apum o wallo niŋ le kafalaŋ, teleŋnda bɔɔbɔɔ, a soli Seiyaa Chɛhowaa le.

19. Vɛɛ sandei chɔmndo piiliaŋ yɛ chaŋyɛi numnde a Chɛhowa?

¹⁹ Te a chɔm pɛ sandei o nɛi o nɛi niŋ, ma wa a kɔl nyulu. Ma nɔ vɛlɛ kɔl iyama walaŋndo. Ŋ nɔla miŋ wa maa Pɔɔl. Mbo poonyiaa aa: “Naa pila ŋ sina maa kɔlta naalaŋ la cho walaŋ.” (Hibuluiya 13:​18) I hiou kpou ve, Finya num kaalaa, Chɛhowa, cho chɔɔ mɛɛ ŋ cho kindi kindiŋndo le sandei chɔmndo o nɛi o nɛi niŋ yɛ. Nduyɛ o naŋ kɔl a hei—Nuawɔ Sam 15:​1, 2; Pulɔwaa 22:​1.