1, 2. Le yɛɛ naŋ nɔ yɛ miŋ mandaŋ te ŋ wa pɛ yelelaŋndo hɛlioo?

YIYAŊNDƆ maa a hiŋ le maŋgueileŋ bouwo. Kɛ mɛɛ ŋ tofa, ma cha maa kpeŋgei pilɛi cho i siowɛi. Yɛɛ ŋ nɔ yɛ niko ma tosa? A cho leŋ dio kaŋgalaŋ ɔɔ a cho leŋ viouwɔɔ? Ɔɔ kpeŋgii sɛ keŋnde ŋ cho kɛɛya ni, okoŋ ma de kpeŋgii naŋnde?

² Mɛɛ ŋ dimi maa yelelaŋndo cho ko maa maŋgueile leŋ. Mi wana tuei lapum yeela, kɛ la bɔɔbɔɔ la cho la siowɛi kanifuule, la nɔ kaa nɔɔlɛiyo, niilu latandaa a walta nyinaa wɔɔŋnda. Lelaŋ, te a wa pɛ  yelelaŋndo hɛlioo, dimioo ŋ cho ni aa: “I nɔ di mi hɛli yelelaŋ kɛ kɛ ya yeema pɛ”? Ɔɔ dimioo ŋ cho ni aa: “Yelelaŋndaŋ kpou la wɔu”? Ɔɔ a cho yelelaŋ kɛndɔɔ hɛli le ma tuei ndu yeela okoŋ ma mal o wɔɔŋndo?

3. Te ŋ wa pɛ yelelaŋndo hɛlioo, a yɛɛ okɔɔ naŋ nɔ yɛ miŋ yiyaŋ?

³ Naa kpou yeema pisultaŋ a yelelaŋndo. Nduyɛ ŋ yeema miŋ hɛli laŋ nyɛkɛndɛi. Le hei, ŋ nɔ miŋ nyunaŋ aa, vɛɛ yelelaŋ naŋ hɛli wo piiliaŋ yɛ piɛile naaleŋ o Chɛhowa lo?

4. Sawa mandaa Baabui kuɛɛ mala yɛ naa le yelelaŋ naa hɛlioo?

⁴ Te ŋ yɔŋguŋ pɛ o Chɛhowa lo, mɛɛ buŋgɛi naŋ chua keŋ ni le yoomu naa soliŋndo kpeku le ndu piɛiyo. (Nuawɔ Ikilisiaatii 5:​4.) Miŋ chua buŋgɛi maa nyɛ o nyɛ naŋ cho wa tosaa, ŋ cho ndu tosa le Mɛlɛka bɛɛleŋ kioo. (Kɔliŋtiaŋ Tasoo 10:​31) O cho ko o bɔŋaŋndaŋ a o wali pollo niŋ te naŋ chɔm maa ŋ yɔŋguŋ o Mɛlɛka lo le. Hei pɛɛku naa maa nyɛ o nyɛ naŋ wa pɛ tosaa, o yɔŋ bɛɛ aa yelelaŋndo, o nɔ mbo ke Mɛlɛka bɛɛleŋ.

5. Vɛɛ naŋ nɔ yɛ miŋ piɛi Chɛhowa?

⁵ Nyɛ o nyɛ naŋ tosa pɛ, o cho o chiɛɛliaŋ a piɛile naaleŋ o Chɛhowa lo. Mi Pɔɔl tɛɛsiaa hei mɛɛ o dimi aa: “La yɔŋgu nya pila o Mɛlɛka lo maa nyɛ salaa o cho yoomu wo. . . . Mi la yɔŋguŋ o nyɛ nɛŋi ndu kɔl lo tosaa niŋ.” (Luomaŋnda 12:​1) Mi Chiisu dimi aa: “Kaala Masanɔɔ o cho Mɛlɛka ŋ piɛiyo wo nyɛ kɛndɛ kɛndɛi. Kaala ndu a kɔl numndo kpou, nduyɛ ma wa yiyaŋndo a ndu okɔɔ teleŋ o teleŋ fee. Kaala ndu  a kpaaya numndo kpou.” (Maki 12:​30) Teleŋ o teleŋ, ŋ yeema miŋ tosa nyɛ hiou wa o sɔvɛ wo le Chɛhowa. O Isɔluɛi niŋ sindɛ, te waŋnda ndaa wa pɛ salaa solioo o Chɛhowa lo, ndaa nɔ ma yɔŋgu chɔlu cho kɛndiaa wo. Te salaa ndoo nɔ pɛ sɔŋndo, Mɛlɛka ndoo chɛl ndu le. (Lɛvitikɔɔ 22:​18-20) O nɛi pilɛ koŋ choo, piɛile naaleŋ le simnuŋ nyɛ fondoo o Chɛhowa lo. Vɛɛ hei yɔŋnuŋ yɛ?

6, 7. Vɛɛ yelelaŋ naa piiliaŋ yɛ piɛile naaleŋ o Chɛhowa lo?

⁶ Chɛhowa dimul naa aa: “La wa wanaa diandaa mɛɛ ya cho wana diandaa yɛ.” (Pitɛ Tasoo 1:​14-16; Pitɛ Diiŋ Ndɔɔ 3:​11) Mi Chɛhowa chɛl piɛile naaleŋ te le wa pɛ le diandaa. (Ditɔnɔmii 15:​21) Piɛile naaleŋ le ve le diandaa le te ŋ wa pɛ sɔɔŋ Chɛhowa tul leyɛ woŋ tosaa, mɛɛ kaa nɔɔlɛiyo, niilu latandaa, a walta nyinaa wɔɔŋnda cho naa yɛ. (Luomaŋnda 6:​12-14; 8:​13) Nduyɛ, miŋ tɛɛmbuu vɛlɛ Chɛhowa kɔl te ŋ soliŋ pɛ nyɔɔŋ muŋ kpeku le yelelaŋndo. Mi hei nɔɔliaa piɛile naaleŋ, okoŋ mi Chɛhowa kɛɛ leŋ. Nduyɛ mi hei kelu chaŋyɛi nɛi a ndu.

⁷ Lelaŋ, vɛɛ naŋ hɛli yɛ yelelaŋ naa a taasi? Sawala mandaala Baabui kuɛɛ mala yɛ naa le sinaa teŋgeŋndo yelelaŋ bɛnda wo tɛɛŋ a o bɛnda le wo?

8, 9. Yelelaŋ suu kuɛɛ naŋ nɔ yɛ miŋ kɛɛ nduyɛ le yɛɛ?

⁸ Yelelaŋndaŋ la cho niŋ hau suulaŋ yɛ yɛ. Lapum la bɛnda le Kilisiɔŋnɔɔ, kɛ la bɔɔbɔɔ la bɛnda kposoŋ te. O tasoo, ŋ soo wɔ a yelelaŋ suu naŋ nɔ miŋ kɛɛ wo.

⁹ Vidueilaŋ, tɛɛŋgoŋ, tɛlivisiɔŋndaŋ, pisulta vidueilaŋ a chonduŋ bɔɔbɔɔ nɔ kaa nɔɔlɛiyo, niilu latandaa a walta nyinaa wɔɔŋnda leniŋ. Teleŋnda  bɔɔbɔɔ, ma chɔm nyɛm wɔɔŋndoŋ muŋ maa sɔɔŋ mamaa, nduyɛ maa ŋ wɔu le. Kɛ Kilisiɔŋnda nɔ ma mandaŋ a yelelaŋ chɛlaŋ a sawala diandaala Chɛhowalaŋ te wo. (Walta Wanaa Chiisuaa 15:​28, 29; Kɔliŋtiaŋ Tasoo 6:​9, 10) Te ŋ kɛɛ pɛ yelelaŋ waa naa, mɛɛ ŋ chɔm Chɛhowa maa ŋ tul o wɔɔŋndo leyɛ.—Sam 34:​14; Luomaŋnda 12:​9.

10. Yɛɛ wa yɛ fulamakɔɔlioo te ŋ hɛli pɛ yelelaŋ wɔɔŋndo?

¹⁰ Kɛ mi waŋnda apum yiyaŋ maa yelelaŋ niilu latandaa, kaa nɔɔlɛiyo, ɔɔ walta nyinaa wɔɔŋnda wɔu kposoŋ te. Ma dimi aa: ‘Kpundɛ yɛɛ cho yɛ leniŋ? Fɛɛŋ bɛɛ I tosa niŋ sɔɔŋ muŋ te.’ Te ŋ yiyaŋ pɛ o nɛi waa lende choo, mɛɛ ŋ huinuŋ naapila. Baabuiyo dimi aa: “Kɔl wana chioo o hui wana o hiou nyɛ o nyɛ, nduyɛ o cho nyɛ dɛnɛ wɔɔŋ bɛndu.” (Chɛluimaya 17:​9) Te ŋ wa pɛ yelelaŋndo tosaa a nyɛm Chɛhowa yeema le woŋ, vɛɛ naŋ chɔm yɛ maa ŋ tul muŋ leyɛ? Mɛɛ naŋ tosa yelelaŋndo a muŋ fau, lende koni naŋ cha ni maa ŋ cho sɔɔŋ wɔɔŋ te. Mɛɛ teleŋndo hiau fau, lende koni kɔl naa iyamaa yɔŋnuŋ tindiŋ ni. Nduyɛ, ŋ wa niŋ bɛɛ kɛɛsiaa wɔɔŋndo tosaa o dimullɛ naa le.—Sam 119:​70; Timoti Tasoo 4:​1, 2.

11. Vɛɛ Kaleesiaŋnda 6:​7 mala yɛ naa le yelelaŋ naa hɛlioo?

¹¹ Diom Mɛlɛkaa dimul naa aa: “Yɛiyii wana saŋ o chiɛi numnde niŋ nde, ndi koni ŋ kuau ni.” (Kaleesiaŋnda 6:​7) I cho tonya maa te ŋ tosa pɛ yelelaŋndo a sɔɔŋ wɔɔŋndoŋ, ŋ cho muŋ tosa o chilaŋ niŋ. Le taamaseliiyo, yelelaŋ kaa nɔɔlɛiyo paaliaŋ niŋ apum ma lo okoŋ ma luei baa o kaa nɔɔlɛiyo niŋ. Kɛ Chɛhowa ke naa mala naŋ yeema wo le yelelaŋ naa hɛlioo a taasi.

12. Yɛɛ mala yɛ naa miŋ tosa kɛɛsiaala kɛndɛlaŋ te ŋ wa pɛ yelelaŋndo hɛlioo?

¹² Yelelaŋndaŋ lapum la chɔm kpendekele maa Chɛhowa yeema laŋ kposoŋ te, nduyɛ ŋ sina maa ŋ nɔ miŋ kɛɛ laŋ. Kɛ te o wa yɛ mi kiisaŋndo wa naa a lapum? Chɛhowa ke naa lasawa o lepula le hɛlioo nyɛ naŋ nɔ miŋ tofa, yaŋ nilaŋ, veelu diomndaŋ, a nyɛ naŋ nɔ miŋ kɛɛ wo le. Kɛ o yeema naa miŋ soliŋ kɔl iyama naa sɔla pɛɛku Baabuiyo wo kpeku. (Nuawɔ Kaleesiaŋnda 6:​5.) Chɛhowa ke naa sawala mandaalaŋ. Laŋ la cho tonyala tase naŋ pɛɛku o Baabuiyo niŋ a mɛɛ o cha sɔɔŋ yɛ ni. Sawala mandaalaŋ ndaŋ la mala naa miŋ pɛɛku kɔl iyama naa nyɛkɛndɛi. La mala naa le sinaa ‘nyɛ Masanɔɔ Mɛlɛka hɛnaŋndo.’ Hei mala naa miŋ tosa kɛɛsiaa nɛŋi ndu kɔllo wo.—Ɛfisiaŋnda 5:​17.

13. Le yɛɛ Kilisiɔŋnda tosa yɛ kɛɛsiaalaŋ yɛ yɛ a yelelaŋndo okɔɔ? Kɛ yɛɛ Kilisiɔŋnda kpou nɔ yɛ ma tosa?

¹³ Teleŋnda bɔɔbɔɔ, yelelaŋ Kilisiɔŋnɔɔ opum hɛli wo ve nyɛ pilɛ a o Kilisiɔŋnɔ cheleŋ hɛlli wo le. Le sabu yɛɛ? Naa kpou nɔ yeemaŋ yɛ yɛ. Nduyɛ vɛlɛ, nyɛ waŋndo hoo yeema wo naapum o cho ndu le opilɔɔ yeema le. O wa bɛɛ lende, le kɛɛsiaala kɛndɛlaŋ tosaa, Kilisiɔŋnda kpou nɔ ma tol nɛi chɔmaa sawala mandaala Baabuiyo kɔɔli. (Filipiaŋnda 1:​9) Sawalaŋ ndaŋ la cho naa mala le miŋ hɛli yelelaŋ Mɛlɛka chɛl lo.—Sam 119:​11, 129; Pitɛ Tasoo 2:​16.

14. (a) Yɛɛ sɔvɛ naŋ nɔ yɛ miŋ kɛsiŋ o kɔl te ŋ wa pɛ teleŋ naa soliŋndo kpeku? (b) Sila yɛɛ Pɔɔl ndoo ke yɛ Kilisiɔŋnda?

¹⁴ Nyɛ cheleŋ naŋ nɔ miŋ kɛsiŋ vɛlɛ o kɔllo cho  mɛɛ kpɛ naŋ cho teleŋndo chua o yelelaŋndo niŋ yɛ ni. Hei nɔla mii chɔm mɛɛ yelelaŋndo cho nyɛ sɔvɛ le naa yɛ. Naa Kilisiɔŋnda, wali Chɛhowaa hiou wa nyɛ sɔvɛ o yoomu naa niŋ. (Nuawɔ Maatiu 6:​33.) Kɛ ŋ yala ndi bila biyɔɔ le, miŋ ke yelelaŋndo fondaa mbo chua naa teleŋndo o ba tau. Mi Pɔɔl sila Kilisiɔŋnda aa: “La mandaŋ nyɛ kɛndɛ kɛndɛi a kaala nya cho tosaa laŋ okɔɔ. La nɔ kaalaŋ maa wanaa kindu kɔl te le. La nɔ kaalaŋ maa wanaa kɔl kalu. Pɛŋgu o pɛŋgu te la sɔla fondaŋndo le suɛi kɛndɛi tosaa pɛ, la tosa.” (Ɛfisiaŋnda 5:​15, 16) Lelaŋ, ŋ nɔ miŋ tosa kɛɛsiaa mɛɛ kpɛ naŋ cho teleŋndo chua le yelelaŋndo yɛ. Nduyɛ miŋ nɔ o kɔl lɔɔlɔɔ maa wali Chɛhowaa cho nyɛ tasoo o yoomu naa niŋ ni.—Filipiaŋnda 1:​10.

15. Vɛɛ naŋ mandaŋ yɛ a yelelaŋ tɛɛmbuu chaŋyɛi cho naa tɛɛŋ a Chɛhowa ve?

 ¹⁵ O kpeekpei niŋ, ŋ nɔ miŋ kɛɛ yelelaŋ naŋ sina maa Chɛhowa tul ndu leyɛ wo. Kɛ te o wa yɛ miŋ nɔ kiisaŋndo a yelelaŋndo okɔɔ? Baa ŋ nɔ pa miŋ mandaŋ? Yiyaŋndɔ a hei. Te o yɔŋ pɛ ma wa kɔlaŋ o pembei choo, baa o naa feke fekiaa pa ŋ cho wa kɔlaŋ ni? Sako. Te a kaala pɛ yoomu numndo, a sɔɔŋguu o naa feke fekiaa le yɔŋi ŋ del o kpundɔɔ niŋ. Nyɛ pilɛ koŋ kpe cho a yelelaŋ naŋ hɛli wo ni. Diom Mɛlɛkaa dimul naa aa: “Kpɛkpɛla nɛi dɛnɛ wɔɔŋndo.” (Pulɔwaa 4:​25-27) Lelaŋ, o cho ko yelelaŋ naŋ sina maa o niŋ te wo le naŋ kɛɛ le. Kɛ ŋ nɔ vɛlɛ miŋ kɛɛ yelelaŋ kɛ kɛ naŋ chiikuu pɛ maa o niŋ kposoŋ le naa le, nduyɛ mbo tɛɛmbuu chaŋyɛi nɛi a Chɛhowa.

16. (a) Ɔɔ sɔɔŋ ŋtiŋ ŋ Chɛhowa tul leyɛ woŋ? (b) Vɛɛ naŋ chɔm yɛ maa ŋ tul nyɛ Chɛhowa tul leyɛ wo leyɛ?

¹⁶ Mi wana ŋchondoo poonyiaa aa: “Wanaa kaala Mɛlɛka Yaawɛɛ wa kinɛi, la tul yɔŋ wɔɔŋndo leyɛ.” (Sam 97:​10) Baabuiyo pɛɛku naa mɛɛ Chɛhowa yiyaŋ yɛ nduyɛ a mɛɛ o cha sɔɔŋ yɛ. Yiyaŋndɔ mɛɛ nyɛ ŋ pɛɛku wo mala num le sɔɔŋ chɔɔ mɛɛ Chɛhowa cha muŋ yɛ. Le taamaseliiyo, ŋ pɛɛku maa Chɛhowa tul ‘choolaŋ dimioo, a waŋndo diyɔɔ, a sɔɔŋ wɔɔŋndoŋ tuunɔŋndo o kɔl le waŋndo, a keleŋa waŋndo keleŋa hoo a ŋpelu le kɔlaŋ yɔŋ wɔɔŋndo tosaa wo’ leyɛ (Pulɔwaa 6:​16-19) Ŋ pɛɛku maa ŋ nɔ miŋ kɛɛ ‘suundaa, . . . nyɛm cheleŋndoŋ sooluuwo, . . . piondɔŋndaŋ, . . . niilu latandaa, paŋaliaŋndaŋ, . . . kɔl tuu bɛndoo, . . . hɔlteŋ luɛiyɔɔ o nyɛ pilaa, muɛiyaŋ  kolɔɔ mi ma bii naa, a sɔɔŋ waa lende ŋ cheleŋ.’ (Kaleesiaŋnda 5:​19-21) A che pa mɛɛ sawala mandaala Baabuilaŋ ndaŋ la mala num ma hɛli yelelaŋ numndo yɛ? Ŋ yeema miŋ tol sawala Chɛhowalaŋ kɔɔli o nɛi o nɛi niŋ o yoomu naa niŋ, ŋ wa naa wanaa cheleŋnda ɔɔ naapilɛ kpeele. (Kɔliŋtiaŋ Diiŋ Ndɔɔ 3:​18) Nduyɛ pɛŋ, nyɛ naŋ tosa te ŋ wa pɛ naapilɛ kpeele wo nɔla mbo chɔm wana suu naŋ cho kpeekpeiyo.—Sam 11:​4; 16:​8.

17. Tuupa miŋ hɛli yelelaŋndo, nyunala yɛɛ naŋ nɔ yɛ miŋ nyunaŋ?

¹⁷ Lelaŋ, te a wa pɛ yelelaŋndo hɛlioo, nyunaŋndɔ aa: ‘Vɛɛ chuaŋ chua nuu cho yɛ chaŋyɛi nii piiliaŋ a Chɛhowa? Vɛɛ o cho yɛ kɔl iyama nuu piiliaŋ?’ Ŋ chɔɔlu wɔ sawala mandaala Baabuiyo yaasiaa la mala naa le yelelaŋndo hɛlioo laŋ.

18, 19. (a) Sila yɛɛ Pɔɔl ndoo ke yɛ Kilisiɔŋnda? (b) Sawala mandaala Baabui kuɛɛ mala yɛ naa le yelelaŋ naa hɛlioo?

¹⁸ Te ŋ hɛli pɛ yelelaŋndo, mɛɛ ŋ hɛli nyɛ naŋ cho wa yiyaŋndo choo wo. Mi Pɔɔl poonyiaa aa: “Nyɛ o nyɛ cho suɛi sandaa, nyɛ o nyɛ cho suɛi lebɛɛ, nyɛ o nyɛ cho suɛi sakpo, nyɛ o nyɛ cho suɛi diandaa, nyɛ o nyɛ cho suɛi kaalaa, nyɛ o nyɛ cho suɛi bɛnda, nyɛ o nyɛ cho suɛi ikɛndɛ, nyɛ o nyɛ cho suɛi chandaa, la nɔ muŋ o kɔlta nyalaŋ niŋ.” (Filipiaŋnda 4:​8) Te ŋ pei pɛ yiyaŋ naa cha a sɔɔŋ kɛndɛŋ waa naa, ŋ nɔla miŋ dimi aa: “Oo Mɛlɛka Yaawɛɛ, . . . I cho piɛileŋ maa diomnda nilaŋ, a yiyaŋnda nilaŋ, mi la bɛnda num o hɔl fɔ.”—Sam 19:​14.

¹⁹ Nyunaŋndɔ aa: ‘Sɔɔŋ kuɛɛ ya cho yɛ peiyo o yiyaŋ nuu niŋ? Te o yɔŋ pɛ mi chii viduei ya yeema le nuaa wo tofa, I cho pa chɔ sɔɔŋ kɛndɛŋ ya nɔ mi wa yiyaŋndo choo woŋ? I cho pa wa a kɔl nyulu  nduyɛ mi kɔl iyama nuu wa nyɛkɛndɛi? (Ɛfisiaŋnda 5:​5; Timoti Tasoo 1:​5, 19) Baa I cho pa wa fɛɛsɛŋ le mi piɛi o Chɛhowa lo? Ɔɔ I cho kɔl tambu? Baa yelelaŋ koŋ tosa pa mi wa yiyaŋndo a niilu latandaa okɔɔ vɛlɛ a sɔɔŋ nɔɔlɛiyoŋ? (Maatiu 12:​33; Maki 7:​20-23) Yelelaŋ suu ya cho hɛli wo chɔm pa maa I chɛl mi hiou “lachi a kaala waŋnda o chieeŋndo hoo niŋ a tosa laŋ” tosaa?’ (Luomaŋnda 12:​2) Te ŋ muli pɛ a kɔllo kpou, koŋ cho naa mala miŋ sina nyɛ naŋ nɔ miŋ tosa le chaŋyɛi nɛi kindioo a Chɛhowa wo. Ŋ yeema miŋ piɛi maa wana ŋchondoo aa: “Faŋa ya kɔl lo o nyɛm fondoŋ Mɛlɛka.” *—Sam 119:​37.

20, 21. Te ŋ wa pɛ yelelaŋndo hɛlioo, le yɛɛ naŋ nɔ yɛ miŋ yiyaŋ a mɛɛ o piiliaŋ niŋ acheleŋnda yɛ?

²⁰ Sawa mandaa sɔvɛ cheleŋ naŋ nɔ vɛlɛ miŋ kɛsiŋ o kɔllo cho hoo ni aa: “Waŋnda a pum a dimi maa, ŋ nɔ di mi ŋ tosa nyɛ o nyɛ fee. Kɛ nduyɛ, o cho nyɔɔŋ fau le ŋ nɔla mi ŋ hivi waŋndo lachi o laalaŋ ndɔɔ niŋ te. Wana o wana, o cho ko suɛi mala num num pilɛ kpe ve le ŋ tosa le. Nyɛ mala chaaŋaa numnda wo ndu ŋ tosa ni.” (Kɔliŋtiaŋ Tasoo 10:​23, 24) Ŋ nɔ bɛɛ dioo le nyɔɔ pum tosaa, koŋ chɔm naa maa mɛɛ miŋ tosa ndu le. Ŋ nɔ miŋ yiyaŋ nyɛkɛndɛi mɛɛ kɛɛsiaala naalaŋ la piiliaŋ puaapiliaa a ndepiliaa naa yɛ.

²¹ Kɔlta iyamala naalaŋ la cho nyɛ pilɛ le. Le taamaseliiyo, naapum mi kɔl iyama numndo chɛl num le ma tofa tɛlivisiɔŋndo opum. Kɛ ma sina maa  tɛlivisiɔŋ ŋ tofa koŋndo paaliaŋ kɔl iyama puaapilɛnɔɔ ɔɔ ndepilɛnɔɔ. Yɛɛ ŋ cho yɛ tosa? Mi che bɛɛ a nɔ dioo le ndu tofaa, naapum a kɛɛsiaa le ndu kiɔɔ tofaa. Le yɛɛ? Kanifuule, a yeema ma tosa “yɔŋ wɔɔŋ waa nuaa a chaaŋaa num aa laalaŋnda” le ɔɔ ma tosal Kiliti ‘yɔŋ wɔɔŋndo’ le. (Kɔliŋtiaŋ Tasoo 8:​12) Ŋ yeema miŋ tosa nyɛ o nyɛ tosa mi chaaŋaa naa Kilisiɔŋnda tosa yɔŋ wɔɔŋndo wo le.—Luomaŋnda 14:​1; 15:​1; Kɔliŋtiaŋ Tasoo 10:​32.

22. Vɛɛ naŋ chɔm yɛ maa ŋ nɔ sinapɛŋgoo te o hiŋ pɛ a nyɛm Kilisiɔŋaa cheleŋ hɛli le tosaa wo?

²² Kɛ te o wa yɛ maa kɔl iyama numndo chɛl num kposoŋ le ma tofa, ma veelu diomndaŋ, ɔɔ ma tosa nyɛ acheleŋnda yeema wo le? Le mɛɛ ŋ kaala puaapilɛnɔ numndo nduyɛ ma nɔ bɛɛle ndɔleŋ yɛ, a nɔ kuee ma baŋ ndu maa ndu bɛɛ tosa kɛɛsiaa pilɛ koŋ kpe le. Wana cho mɔmbillo nyaanɔŋndo wo sina maa lepum, mi acheleŋnda nyaanuŋ mɔmbillo ma hiou ndu ɔɔ mbo hiou nda. Kɛ a koŋ kpou, o chaa mɔmbillo nyaanɔŋndo. O nɛi pilɛ koŋ choo, a cho sawala mandaala Baabuiyo tolɔɔ kɔɔli nya puaapilɛnɔ cheleŋ, kɛ la nɔ yiyaŋnda pilɛ le yelelaŋ bɛnda wo le.—Ikilisiaatii 7:​16; Filipiaŋnda 4:​5.

23. Yɛɛ cho yɛ naa mala le yelelaŋndo hɛlioo nyɛkɛndɛi?

²³ Yɛɛ mala yɛ naa le yelelaŋndo hɛlioo nyɛkɛndɛi? Mɛɛ miŋ pɛɛku kɔl naa iyamaa a sawala mandaala Baabuiyo, okoŋ miŋ soliŋ ndu kpeku, nduyɛ miŋ wa yiyaŋndo a puaapiliaa a ndepiliaa naa okɔɔ, koŋ tosa miŋ hɛli yelelaŋ kɛndɔɔ. Nduyɛ, ŋ cho wa a nyaale le mɛɛ naŋ cho nyɛ o nyɛ tosaa le Mɛlɛka bɛɛleŋ kioo yɛ.