1, 2. Le yɛɛ naŋ yeema yɛ mi waŋndo chɔm naa nɛiyo te ŋ wa pɛ kɔlaŋ o fondaŋ naŋ sina le wo? Yɛɛ Chɛhowa ke yɛ naa le naa nɛiyo chɔmndo?

TE A yeema pɛ kɔlaŋ o fonda ŋ sina paale pilɛ bɛɛ le wo, yɛɛ mala yɛ num a luusiaŋ te? Wana sina fonda koŋ ndo ŋ nyuna ni le mbo chɔm num nɛiyo. Te a nyuna ndu pɛ, a luusiaŋ te. Kɛ te a kuɛ pɛ a ba num, a cho fuuluu naa ŋ cho kɔlaŋ nda le ma luusiaŋ.

² Naa kpou nɔ simulta yɛ yɛlaŋ o yoomoo niŋ, nduyɛ teleŋndaŋ lapum miŋ kuɛ le luusiaŋndo. Kɛ le naa nɛi  chɔmaa kioo, mi Chɛhowa ke wana o wana kɔl iyamaa. (Chemisi 1:​17) Ŋ yaasiaŋndɔ nyɛ cho kɔl iyamaa wo, nduyɛ a mɛɛ o tosa wallo yɛ. Okoŋ, ŋ cho pɛɛku mɛɛ naŋ manda kɔl naa iyamaa yɛ, le sabu naŋ nɔ miŋ buulaŋ a kɔlta iyamala acheleŋnda wo, nduyɛ a mɛɛ kɔl iyama walaŋndo tosa mi yoomu naa chɔɔlu wa o kɛndɛ yɛ.

3. Yɛɛ cho yɛ kɔl naa iyamaa?

³ Ke sɔvɛ Chɛhowa ke naa wo kɔl iyamaa cho ni. Kɔl iyamaa cho ni, nyɛ mala naa le sinaa ikɛndɛi a iwɔɔŋnde wo. Diom maKilikii nda soliŋ kpeku le “kɔl iyamaa” o Baabuiyo niŋndo sim ni, “kɔl kalu ipilayaa.” Te kɔl naa iyamaa tosa pɛ wallo nyɛkɛndɛi, o mala naa miŋ sina wanaa suu naŋ cho wa. O mala naa miŋ wa wanaa tonya a naapila, yeemaŋ naŋ, vɛlɛ a yiyaŋnda naalaŋ. O nɔla mbo chɔm naa nɛiyo le ikɛndɛi tosaa nduyɛ miŋ kpakpala iwɔɔŋnde. O tosa miŋ wa a nyaale te ŋ tosa pɛ kɛɛsiaa kɛndɔɔ, ɔɔ mbo pɛɛsa naa te ŋ tosa pɛ kɛɛsiaa wɔɔŋndo.—Tofa Diomnda Chɔɔlaalaŋ 5.

4, 5. (a) Yɛɛ yɔŋnuŋ yɛ mɛɛ Adam nda Ifi kɛɛ le kɔlta ndala iyamalaŋ nilaŋ yaŋɔɔ? (b) Ɔɔ taamaseliilaŋ latiŋ o Baabuiyo niŋ la chɔm mɛɛ kɔl iyamaa tosa wallo yɛ?

⁴ Wana o wana nɔ chuaŋ chuaa le kɔl iyama ndɔɔ nilaŋ yaŋɔɔ ɔɔ mbo kɛɛ. Mi Adam nda Ifi hɛli le kɔl nda iyamaa kiɔɔ nilaŋ yaŋɔɔ, nduyɛ fulamakɔɔlioo wa ni, ma tosa hakioo. Okoŋ kɔɔli, mi kɔl nda iyamaa pɛɛsa nda. Kɛ ndii hiou niŋ lɔɔ. Ndaa kɛɛ niŋ fɛŋ Mɛlɛka diikɔŋndo. (Chɛnɛsee 3:​7, 8) Mi che bɛɛ ndaa nɔ kɔlta  iyamala walaŋndaŋ, nduyɛ ma sina maa i cho suɛi wɔɔŋ le Mɛlɛka kiɔɔ diikɔŋndo, kɛ ma kɛɛ le kɔlta iyamala ndalaŋ nilaŋ yaŋɔɔ.

⁵ O baa pilɔɔ choo, wanaa lahakiaa bɔɔbɔɔ yaŋ niŋ kɔl nda iyamaa nilaŋ. Choobu wa taamasi kɛndɛ. Le mɛɛ o tosa kɛɛsiaala kɛndɛlaŋ yɛ, mbo dimi aa: “Haaa a teleŋ ya I cho yoomu wo, kɔl nuu o cho ya walaŋ a nyɛ ya I cho dimioo wo.” (Choobu 27:​6) “Kɔl” Choobu wa hoo suɛi a ndu okɔɔ wo sim le kɔl ndɔ iyamaa, kɔl kalu ndoo nɔ le sinaa iwɔɔŋnde a ikɛndɛiyo. Kɛ Deeve ndu, mbo kɛɛ kɔl ndɔ iyamaa nilaŋ yaŋɔɔ teleŋndaŋ lapum, okoŋ mbo kɛɛ Chɛhowa diikɔŋndo. Okoŋ kɔɔli, mi kɔl ndɔɔ pɛɛsa ndu, nduyɛ i wa ko maa kɔl ndɔɔ wa ndu dimullo ni maa, “o tosa suɛi wɔɔŋnde.” (Saamiɛɛ Tasoo 24:​4-6) Kɔl iyama Deeve wo wa ndu dimullo ni maa suɛi o tosa ve wɔu. Mɛɛ o yaŋ kɔl ndɔ iyamaa nilaŋ, mbo pɛɛku le kiɔɔ biondɔŋ pilɛ koŋ tosaa vɛlɛ.

6. Le yɛɛ naŋ dimi yɛ maa ke Mɛlɛkaa kɔl iyamaa cho ni?

⁶ Wanaa cho Chɛhowa piɛi le wa bɛɛ, teleŋnda bɔɔbɔɔ ma sina maa sɔɔŋ ŋpum bɛnda nduyɛ ŋpum bɛnda le. Baabuiyo dimi aa: “Teleŋndaŋ la pum waŋndo pila mi kɔl ndɔɔ yaala ndu. Teleŋndaŋ la pum mbo ke ndu di.” (Luomaŋnda 2:​14, 15) Le taamaseliiyo, wanaa bɔɔbɔɔ sina maa viileŋ ɔɔ wanachioo diyɔɔ cho suɛi wɔɔŋ. Mi che bɛɛ a sina ndi lapɛŋgu le, kɛ kɔl nda iyamaa kɛsɛ nda wa koŋ nilaŋ yaŋɔɔ ni, kɔl kalu Chɛhowa dɔu nda o lakɔl le sinaa ikɛndɛi a iwɔɔŋnde wo. A cho vɛlɛ sawala mandaala Mɛlɛkalaŋ tolɔɔ kɔɔli, ɔɔ tonya kpeekpei Chɛhowa yɔŋgu le naa malaa miŋ tosa kɛɛsiaa kɛndɔɔ wo.

7. Le yɛɛ kɔl naa iyamaa hui yɛ naa lepum?

 ⁷ Kɛ teleŋndaŋ lapum, mi kɔl naa iyamaa hui naa. Le taamaseliiyo, mɛɛ naŋ cho wanaa lahakiaa yɛ, kɔl naa iyamaa nɔla mbo hui naa te ŋ handu pɛ kɔllo o yiyaŋ naa choo nduyɛ mbo yɛɛ naa o nɛi wɔɔŋndo choo. Kɔl iyama walaŋndo hiŋ o lepilɛ niŋ kpe le. Mɛɛ miŋ pɛɛku ndu. (Chɛnɛsee 39:​1, 2, 7-12) Le naa malaa, Chɛhowa ke naa nyina diandaa a sawala mandaala Baabuiyo. (Luomaŋnda 9:​1, NW) Ŋ yaasiaa wɔ mɛɛ naŋ pɛɛku kɔl naa iyamaa yɛ.

8. (a) Vɛɛ yeemaŋ naŋ piiliaŋ yɛ kɔl naa iyamaa? (b) Yɛɛ naŋ nɔ yɛ fɛŋ miŋ nyunaŋ tuupa miŋ tosa kɛɛsiaa?

⁸ Waŋnda apum yiyaŋ maa kɔl nda iyamaa nilaŋ yaŋɔɔ sim ni, tolɔɔ yeemaŋ ndaŋ kɔɔli. Ma yiyaŋ maa nyɛ o nyɛ bɛnda le nda pɛ, a nɔla ma tosa. Kɛ yeemaŋ naŋ nɔ hakioo, nduyɛ miŋ hui naa. Yeemaŋ naŋ nɔ kpaayaa tau, le hei miŋ piiliaŋ kɔl naa iyamaa. Baabuiyo dimi aa: “Kɔl wana chioo o hui wana o hiou nyɛ o nyɛ, nduyɛ o cho nyɛ dɛnɛ wɔɔŋ bɛndu. Wana o wana nɔla ma sina nyɛ cho wana chioo o kɔl lo le.” (Chɛluimaya 17:​9) Lelaŋ miŋ kandu yiyaŋndo maa suɛi pum i naŋ, mi che bɛɛ i wa iwɔɔŋ. Le taamaseliiyo, tuupa mi Pɔɔl simnuŋ Kilisiɔŋnɔɔ, mbo tusi wanaa Mɛlɛkaa tɔɔndaŋ kala kalaa choo, nduyɛ mbo yiyaŋ maa suɛi kɛndɛi o wa keŋ tosaa ni. O yiyaŋ ndɔɔ niŋ, kɔl iyama ndɔɔ waŋnuŋ walaŋ. Kɛ mbo dimi aa: “Masanɔɔ Mɛlɛka ndu pɛɛsa ya ni.” (Kɔliŋtiaŋ Tasoo 4:​4; Walta Wanaa Chiisuaa 23:​1; Timoti Diiŋ Ndɔɔ 1:​3) Mɛɛ Pɔɔl pɛɛku mɛɛ Chɛhowa yiyaŋ a nyɛ o wa tosaa wo yɛ, mbo sina maa o nɔ mbo siŋgaŋ. Hei chɔm ni maa, tuupa miŋ tosa nyɛ o nyɛ,  ŋ nɔ fɛŋ miŋ nyunaŋ aa, ‘Yɛɛ Chɛhowa yeema yɛ ya mi tosa?’

9. Yɛɛ o sim yɛ le siooŋii Mɛlɛkɛi nɔɔ?

⁹ Te a kaala pɛ waŋndo, a yeema ma tɛɛmbuu ndu kɔl te. Le mɛɛ naŋ kaala Chɛhowa yɛ, ŋ yeema miŋ tosa nyɛ o nyɛ tɛɛmbuu ndu kɔllo le. Siooŋii naŋ nɔ le Chɛhowa kɔllo tɛɛmbuu wo ve nɔ mii wa tau. Ŋ che o taamaselii Nɛhimaya wo niŋ. Mbo kɛɛ le foofo ndɔɔ soliŋndo kpeku le mbo sul. Le yɛɛ? Mbo tɛɛsiaa aa: “Kani I nɔ siooŋii Mɛlɛkɛi.” (Nɛhimaya 5:​15) Nɛhimaya ndoo tosa nyɛ o nyɛ ndoo tɛɛmbuu Chɛhowa kɔl te. Maa Nɛhimaya, naa bɛɛ nɔ siooŋnde le tosaa suɛi tɛɛmbuu Chɛhowa kɔllo ve. Ŋ pɛɛku nyɛ nɛŋi Chɛhowa kɔllo wo te ŋ wa pɛ diomndaŋ veeloo o Baabuiyo niŋ.—Tofa Diomnda Chɔɔlaalaŋ 6.

10, 11. Sawala mandaala Baabui kuɛɛ mala yɛ naa le kɛɛsiaala kɛndɛlaŋ tosaa a muɛiyaŋ okɔɔ?

¹⁰ Le taamaseliiyo, Kilisiɔŋnɔɔ nɔ mbo tosa kɛɛsiaa te o cho muɛiyaŋ kolɔɔ ɔɔ o cho kolɔɔ le. Sawala mandaala kuɛɛ mala yɛ ndu mbo tosa kɛɛsiaa kɛndɔɔ? Nuawɔ latiŋ: Baabuiyo kuuna muɛiyaŋ kolɔɔ le. O dimi pɛŋ maa ke Mɛlɛkaa muɛiyaŋ ma cho ni. (Sam 104:​14, 15) Kɛ mi Chiisu dimul buɛiyaa nduaa maa a luei balaŋ “o kolɔɔ kala kalaa niŋ te.” (Luku 21:​34) Nduyɛ mi Pɔɔl dimul Kilisiɔŋnda maa a kpakpala “niilu o niilu kolaa.” (Luomaŋnda 13:​13) Mbo dimi vɛlɛ maa wanaa kolaa “luei o masale Mɛlɛkaleŋ niŋ te.”—Kɔliŋtiaŋ Tasoo 6:​9, 10.

¹¹ Mi Kilisiɔŋnɔɔ nyunaŋ dɔɔ aa, ‘Vɛɛ kpɛ muɛiyaŋ ma cho yɛ ma sɔvɛ le ya? Baa I yeema maŋ le pɛŋgioo? Baa le mi wa fɛɛsɛŋ ya kol muɛiyaŋ ni? I tiu pa ba mi kol maŋ tuuleŋ? I tiupa ba mi dɔɔniaa teleŋnda ya kol  taŋ? * I tosa pa yelelaŋndo a chaaŋaa niaa mi muɛima ve bɛɛ le?’ Ŋ nyuna Chɛhowa le naa malaa miŋ tosa kɛɛsiaa kɛndɔɔ. (Nuawɔ Sam 139:​23, 24.) O nɛiyo hoo choo, ŋ pɛɛku kɔl naa iyamaa le keleŋaa sinaa sawala mandaala Baabuiyo. Kɛ sɔɔŋ cheleŋndoŋ yeemaŋ a mɛɛ naŋ cho hunɔɔ chɔ yɛ.

12, 13. Le yɛɛ kɔl naa iyamaa wa yɛ naapum teŋgeŋ a la wanaa cheleŋnda? Vɛɛ naŋ bii yɛ teŋgeŋnda laŋ?

¹² Naa kpou, ŋ nɔ kɔlta iyamala pilɛ le. Mi kɔl num iyamaa chɛl num le tosaa nyɛ wana cheleŋ kɔl ndɔ iyamaa chɛl te wo. Le taamaseliiyo, naapum ma kɛɛsiaa le muɛiyaŋ kolɔɔ, kɛ mi wana cheleŋ ndu yiyaŋ maa o nɔ mbo kol te. Le yɛɛ waŋnda a ŋiɔɔŋ nɔ yɛ yiyaŋnda teŋgeŋndaŋ o hei choo?

¹³ Teleŋdaŋ lapum, waŋndo opum yiyaŋ ndɔɔ a sɔɔŋ okɔɔ chɛŋ o kɔɔlima nduaŋ, mɛɛ yuŋgu ndɔɔ che ndi yɛ, sɔɔŋ yɔŋnuŋ o yoomu ndɔɔ niŋndoŋ, vɛlɛ a sɔɔŋ cheleŋ. Te o hiŋ pɛ a muɛiyaŋ okɔɔ, naapum mi wana ndoo nɔ bahawɛiyo le muɛiyaŋ kolɔɔ tuuleŋndo, kɛɛsiaa maa kposoŋ bɛɛ o kol lɛ le. (Masaa Bɛnduaa Tasiaa 8:​38, 39) Lelaŋ te a ke pɛ waŋndo muɛiyaŋ mbo kɛɛ, yɛɛ ŋ nɔ yɛ ma tosa? Baa suɛi cho num pala? Baa baŋɔɔ ŋ cho ndu ni mbo kol maŋ kaŋgalaŋ? Baa mɛɛ mbo chɔm num le sabu o kɛɛ wo? Sako, kanifuule, a nɔ bɛɛleŋ le kɔl ndɔ iyamaa.

14, 15. Bahawɛi yɛɛ wa yɛ o palɛi Pɔɔl le niŋ? Sila kɛndɛ yɛɛ Pɔɔl ndoo yɔŋgu yɛ?

 ¹⁴ O palɛi Pɔɔlle niŋ, mi bahawɛiyo fula o ndoo chɔm maa kɔlta iyamalaŋ la cho teŋgeŋndo. Visiŋ pum wa o lɔɔlaŋ niŋ le pisioo, ndaa soliŋ muŋ fɛŋ kpeku le piɛile lachoowaleŋ vɛlɛ a sooluulaŋ. (Kɔliŋtiaŋ Tasoo 10:​25) Pɔɔl ndoo chi ndi maa suɛi wɔɔŋ te i cho le visioŋ muŋ piondɔɔ ma de le. Le ndu, o Chɛhowa lo nyɛdiaa kɛ kɛ fula ni. Kɛ mi puaapiliaa apum a ndaa sooluu piɔmnda o paandoo niŋnda, yiyaŋ teŋgeŋ. Ma yiyaŋ maa, i cho suɛi wɔɔŋ le visiŋ muŋ dioo. Baa Pɔɔl ndoo yiyaŋ pa maa, ‘I nɔ di mi de nyɛ o nyɛ ya yeema pɛ, i paaliaŋ kɔl ni iyama le?’

¹⁵ Pɔɔl ndoo yiyaŋ lende le. Yiyaŋnda puaapiliaa nduaa la wa nyɛ sɔvɛ le ndu. Le hei, mbo mal dila ndoo nɔ le sɔɔŋ tosaa laŋ latiŋ a kɔl ndɔɔ kpou. Mi Pɔɔl dimi aa: “O cho ko nyɛ nɛŋi naa pila kɔltaŋ ndo le naa ŋ nɔ mi ŋ tosa le.” Mbo dimi vɛlɛ aa: “Nyɛ Kiliti tosa wo o tosa ndu le ndu pila kɔl nɛŋi suee le.” (Luomaŋnda 15:​1, 3) Maa Chiisu, Pɔɔl ndoo buulaŋ le acheleŋnda tau mbo hiau ndupila.—Nuawɔ Kɔliŋtiaŋ Tasoo 8:​13; 10:​23, 24, 31-33.

16. Le yɛɛ naŋ nɔ yɛ miŋ kilul puaapilɛnɔ naa yamɛi le nyɛ kɔl ndɔ iyamaa chɛl ndu le tosaa wo le?

¹⁶ Kɛ te o wa yɛ mi waŋndo kɔl ndɔ iyamaa chɛl ndu le mbo tosa nyɛ naŋ che maa o niŋ le tosa le wo? Ŋ nɔ miŋ mandaŋ yɔŋi naŋ pɛɛsa ndu okoŋ miŋ baŋ maa naŋ cho o kɛndɔɔ tosaa ni mi ndu wa o wɔɔŋndo tosaa. (Nuawɔ Luomaŋnda 14:​10.) Chɛhowa ke naa kɔlta iyamalaŋ le naapila yamɛi kilul lo, kɛ o cho chaaŋnda le. (Maatiu 7:​1) Ŋ chɛl mi yeemaŋ naŋ hiŋ a piɔuwaŋndo o  kundaa niŋ te. Kɛ ŋ nɔ miŋ nuuviaa nɛilaŋ le kaalaa chɔmndo a waa diompilɛ.—Luomaŋnda 14:​19.

17. Yɛɛ yɔŋnuŋ yɛ a kɔl iyama waŋnda apum?

¹⁷ Mi Pitɛ, wana Chiisu vem hɔlte ndɔ wo poonyiaa aa: “Manda kɔl num iyamaa nyɛkɛndɛi.” (Pitɛ Tasoo 3:​16, NW) I cho suɛi imɔnɔ le sinaa maa te waŋnda hiou pɛ lachi a sawala mandaala Chɛhowalaŋ kiɔɔ, kɔl nda iyamaa sila lɛ nda kposoŋ te. Mi Pɔɔl dimi maa kɔl iyama waa naa “yɔnuŋ niŋ tindiŋ.” (Timoti Tasoo 4:​2) A lomnuŋ niŋ paandu? Te a lomnuŋ pɛ, mi fonda  ŋ lomnuŋ koŋndo yɔŋnuŋ tindiŋ te o seŋgu pɛ, a sinaŋ lɛ nyɛ o nyɛ o foŋndaŋ koŋ te. Te waŋndo hiou pɛ lachi a sɔɔŋ wɔɔŋndoŋ tosaa, mi kɔl ndɔ iyamaa yɔŋnuŋ “tindiŋ.” Nduyɛ mɛɛ teleŋndo hiau fau, lende koni o pɛŋgi wallo ni.

18, 19. (a) Yɛɛ tɔɔyaŋndo naapila biyɔɔ a siɔmbulaŋ le nyɛ naŋ tosa wo pɛɛku yɛ naa? (b) Yɛɛ naŋ nɔ yɛ miŋ tosa te ŋ wa pɛ naapila tɔɔyaŋndo biyɔɔ le hakila naala naŋ mulul niŋ kɔɔ laŋ?

¹⁸ Te ŋ tosa pɛ suɛi wɔɔŋnde, mi kɔl naa iyamaa wa naa dimullo maa ŋ tɛɛmbuu isɔɔ. Hei mala naa le sinaa nyɛ naŋ tosa wo nduyɛ miŋ mal ndu tosaa. Ŋ yeema miŋ pɛɛku isɔɔ o biondɔŋnda naalaŋ niŋ, halikpeŋ ŋ miŋgi lɛ laŋ tosa le. Le taamaseliiyo, mi che bɛɛ mi Masaa Deeve ndoo tosa hakioo, kɛ mi kɔl ndɔ iyamaa nyindu ndu le mbo mulul yɔŋ ndɔ wɔɔŋndo kɔɔ. Mbo  tul nyɛ o tosa wo leyɛ nduyɛ mbo chɔm yeemɛi le Chɛhowa diikɔŋndo o chilaŋ niŋ. Mi nyɛ yɔŋnuŋ Deeve wo nyindu ndu le dimioo a Chɛhowa okɔɔ aa: “A cho wana kɛndɛ . . . nduyɛ . . . a cho o bɛɛndiaŋ le naa malɔɔ [haki] le yɔŋnda naala wɔɔŋndaŋ.”—Sam 51:​1-19; 86:​5; tofa Diomnda Chɔɔlaalaŋ 7.

¹⁹ Kɛ naapum mi waŋndo wa wɔ ndupila tɔɔyaŋndo biyɔɔ le suɛi o tosa o paandoo niŋnde, mi che bɛɛ o mulul ndi niŋ kɔɔ. Tɔɔyaŋndo naapila biyɔɔ tɛɛmbuu naa kɔllo nduyɛ mbo tosa ma yiyaŋ maa a cho wana sɔvɛ kposoŋ te. Te lende ŋ yiyaŋ lepum ni, loonuŋ maa a nɔla ma siŋga nyɛ yɔŋnuŋ o paandoo niŋndo le. O yɔŋ bɛɛ maa num oo sina teŋgeŋndo ikɛndɛi tɛɛŋ a i wɔɔŋnde, ɔɔ num oo sina le, Chɛhowa mal num haki fasɛi. Nduyɛ o chii hakila laŋ wɔɔsuu fiou. A cho o diandaa  Chɛhowa o hɔl, nduyɛ sina maa a cho niŋ sɔɔŋ kɛndɔŋ tosaa. Mi kɔl numndo pɛɛsa wɔ num, kɛ Baabuiyo dimi aa: “Mɛlɛka ndu hiou a kɔlta naalaŋ.” (Nuawɔ Chɔŋ Tasoo 3:​19, 20.) Hei chɔm ni maa kaala ndɔɔ a malɔɔ ndɔ hakioo hiou a tɔɔyaŋ naŋ bii naapila wo vɛlɛ a siɔmbula bii naa laŋ. Laalaŋ maa Chɛhowa mal num haki. Te waŋndo chɛl pɛ maa Chɛhowa mal ndu haki, mbo wa fɛɛsɛŋ nduyɛ mbo wa a nyaale o Chɛhowa piɛiyo niŋ.—Kɔliŋtiaŋ Tasoo 6:​11; Hibuluiya 10:​22.

20, 21. (a) Yɛɛ yauwo hoo cho yɛ num mala le ma tosa? (b) Hɛnɛkɛyɛi yɛɛ Chɛhowa ke yɛ naa? Vɛɛ naŋ nɔ yɛ miŋ soliŋ ndi kpeku?

²⁰ Yauwo hoo toosiaŋ le num malaa ma pɛɛku kɔl iyama numndo le mbo sila num nduyɛ mbo manda num o palɛi mɛɛlɛi kala kalɛi hei niŋ. O cho num vɛlɛ mala le sawala mandaala Baabuiyo dɔwɔɔ o wali niŋ, le nyɛ o nyɛ ŋ wa pɛ tosaa o yoomu numndo niŋ. A tonya, yauwo hoo cho naa lasawa ke o lepula le nyɛ naŋ nɔ le tosaa o sɔɔŋ komal naa woŋ niŋ kpou le. Ŋ nɔ miŋ tosa ‘nyɛ o nyɛ Kiliti dimul naa le tosaa,’ nduyɛ hei tɔlnuŋ o sawala mandaala Mɛlɛkalaŋ choo. (Kaleesiaŋnda 6:​2) Ŋ nɔ miŋ nuuviaa nɛilaŋ le suɛi wɔɔŋnde tosaa le mɛɛ sawa kpeekpei cho a ndi okɔɔ le yɛ le. (Kɔliŋtiaŋ Diiŋ Ndɔɔ 4:​1, 2; Hibuluiya 4:​13; Pitɛ Tasoo 2:​16) Kɛ, ŋ soliŋ hɛnɛkɛyɛi nɛi kpeku le miŋ chɔm Chɛhowa kaalaa .

²¹ Te ŋ yiyaŋ pɛ o sawala mandaala Baabuiyo choo nduyɛ miŋ dɔu laŋ o wali niŋ, ŋ pɛɛku le sinaa ‘yɛ yiɔɔ suɛi naŋ le tosaa ve tɛɛŋ a suɛi niŋ le tosa le ve,’ nduyɛ miŋ yiyaŋ mɛɛ Chɛhowa yiyaŋ yɛ. (Hibuluiya 5:​14) Fulamakɔɔlioo cho ni, mi kɔl naa iyamaa sɔla pɛɛkoo le naa nɛi chɔmaa kioo o yoomoo niŋ, nduyɛ mbo mala naa le loo o kaala Mɛlɛkaa bɛŋgu.