1-3. (a) Ke sɔvɛ yɛɛ Chɛhowa ke yɛ naa? Vɛɛ naŋ soliŋ yɛ ndu kpeku o nɛi wɔɔŋndo choo? (b) Vɛɛ naŋ nɔ yɛ miŋ soliŋ kioo le suɛi kpeku?

FINYAA pindul po ndɔ kpasoo nɛɛsoo. O cho a kɔl kɛndɛ le po ndɔɔ ke teŋgeŋndo hoo kioo. Kɛ te o wa yɛ mi po ndɔɔ chiee nyaanɔŋ a nɛɛsoo le, okoŋ mbo kundu waŋndo a siɛlɛi fuu, nduyɛ mbo yɔŋul ndu? Vɛɛ kɔllo wa yɛ finya ndɔ?

² “Nyɛm kɛndɛ kɛndɛŋ naa ŋ sɔla woŋ kinɛi,” Chɛhowa ke naa muŋ ni. (Chemisi 1:​17) Chɛhowa ke naa sondoo le suɛi. Ke sɔviɔɔ opilɛ cho hoo ni. Kioo hoo mala naa miŋ chɔm yiyaŋ naa vɛlɛ a mɛɛ naŋ sinaŋ yɛ. Ŋ nɔla miŋ dimi sɔɔŋ mala waŋnda nduyɛ ma sinaŋ nyɛkɛndɛiyoŋ. Kɛ nyɛ naŋ dimi wo nɔla vɛlɛ mbo tɛɛmbuu acheleŋnda kɔltaŋ nduyɛ mbo saaŋgiaa nda.

³ Diomnda naŋ dimilaŋ la nɔ kpaayaa tau, nduyɛ Chɛhowa pɛɛku naa mɛɛ naŋ soliŋ kioo hoo kpeku nyɛkɛndɛi yɛ. O dimul naa aa: “Diom o diom wɔɔŋ fula nya o sondo le. Diomnda mala waŋnda laŋ, laŋ nya suaa naa nda chua ni. Koŋ cho ni, la soo diomnda ke waŋnda kpaayaa, nduyɛ mi la mala nda o nyɛ nda palaa niŋ ndaŋ. Te la tosa lende pɛ, wanaa tuɛi nyɛ nya wa dimioo wo wa, a nɔla ma sɔla malaa o diomnda laŋ niŋ.”  (Ɛfisiaŋnda 4:​29) Ŋ yaasiaŋndɔ mɛɛ naŋ soliŋ ke fula hoo Mɛlɛka o ba wo kpeku le ndu kɔllo nɛŋioo a waŋnda kɔltaŋ dɛɛniaa yɛ.

4, 5. Yɛɛ naŋ pɛɛku yɛ o Baabuiyo niŋ a mɛɛ diomndaŋ la nɔ kpaayaa yɛ?

⁴ Diomndaŋ la nɔ kpaayaa, lelaŋ ŋ nɔ miŋ mandaŋ a nyɛ naŋ dimi wo vɛlɛ a mɛɛ naŋ dimi ndu yɛ. Pulɔwaa 15:​4 dimi aa: ‘Diomnda kɛndɛla fula laŋ waŋndo o sondo laŋ, la cho machuaa maa yɔm yɔŋgu yoomoo wo. Kɛ diomnda wɔɔŋndaŋ ndaŋ, kɔllo la tɛɛmbuu waŋndo ni.’ Mɛɛ yɔm puiyaa naŋ le tofaa nduyɛ mbo yɔŋgu hueiyii kɛndɛi yɛ, lende koni diomnda kɛndɛlaŋ la nɛŋi wana cho laŋ tueiyɔɔ wo kɔl ni. O baa pilɔɔ choo, diomnda wɔɔŋndaŋ la pilaŋ acheleŋnda tana nduyɛ mi la tɛɛmbuu nda kɔllo.—Pulɔwaa 18:​21.

⁵ Pulɔwaa 12:​18 dimi aa: “Diɔmnda wɔɔŋndaŋ dimioo, la yɔŋul waŋndo, nua wɔ ko mɛɛ nda lɔwa nuaa waŋndo a muɛi faŋnde yɛ.” Diomnda wɔɔŋndaŋ la saaŋgiaa waŋndo kɔllo, nduyɛ mi la tɛɛmbuu chaŋyaŋ. Naapum a loonuŋ teleŋ waŋndo dimul num diomnda wɔɔŋndaŋ nduyɛ mbo pilaŋ num tana tau wo. Kɛ, mi yau Pulɔwaa wo hiau lachi a dimioo aa: “Diomnda kɔl kalula fula waŋndo o sondo laŋ ndaŋ, siŋgioo la siŋgi waŋndo ni.” Diomnda kɛndɛlaŋ la dɛɛniaa waŋndo kɔllo, nduyɛ mi la miŋgi chaŋyɛi sɛɛŋgiaŋndo tɛɛmbuu ve toosiaa. (Nuawɔ Pulɔwaa 16:​24.) Te ŋ loonuŋ pɛ maa diomnda naalaŋ la tɛɛmbuu waŋnda kɔllo, ŋ cho laŋ chaa soliŋ kpeku.

6. Le yɛɛ i cho yɛ ikala le sondo naa mandaa?

⁶ Sabu cheleŋ naŋ nɔ miŋ mandaŋ a diomnda naalaŋndo cho ni maa, wanaa lahakiaa naŋ cho ni.  ‘Yiyaŋnda wɔɔŋndaŋ koni la huŋ wanachioo o kɔl ni.’ Nduyɛ teleŋnda bɔɔbɔɔ, diomnda naalaŋ la chɔm nyɛ cho naa o kɔllo. (Chɛnɛsee 8:​21; Luku 6:​45) I ve bɛɛŋ bɛɛŋ le sondo naa mandaa le. (Nuawɔ Chemisi 3:​2-4.) Kɛ ŋ nɔ miŋ hiou lachi a kindiŋndo le miŋ chaa suɛi o waŋnda lo.

7, 8. Vɛɛ diomnda naalaŋ la piiliaŋ yɛ chaŋyɛi nɛi a Chɛhowa?

⁷ Ŋ nɔ vɛlɛ miŋ mandaŋ a nyɛ naŋ dimi wo kanifuule, ŋ nɔ miŋ dɔɔŋ kona o Chɛhowa lo le nyɛ naŋ dimi wo, a mɛɛ naŋ dimi ndu yɛ. Chemisi 1:​26 dimi aa: “Wana chua hoo ndu pila maa wana piɛiyaa Mɛlɛkaa o cho ni, kɛ mbo bumba sondo ndɔɔ mandaa wo, mɛɛ ndu pila cho huinɔŋndo ni. Mɛɛ Mɛlɛka ndɔ piɛiyaa simnuŋ suɛi fondo fuu.” Diom maKilikii nda hivi aa, “fondo fuu” wo sim vɛlɛ ni, “tɔnɔ bɛɛ.” (Kɔliŋtiaŋ Tasoo 15:​17) Te ŋ mandaŋ a nyɛ naŋ dimi wo le, ŋ nɔla miŋ tɛɛmbuu chaŋyɛi nɛi a Chɛhowa.—Chemisi 3:​8-10.

⁸ A tonya, ŋ nɔ sabula sɔvɛlaŋ le miŋ mandaŋ a nyɛ  naŋ dimi wo, nduyɛ a mɛɛ naŋ dimi ndu yɛ. Le naa malaa miŋ soliŋ ke naŋ sɔla le suɛiyo kpeku mɛɛ Chɛhowa yeema yɛ, mɛɛ miŋ sina diomnda suu naŋ nɔ miŋ faŋaŋ kɔɔlilaŋ.

9, 10. (a) Diomnda yɛɛ wanaa bɔɔbɔɔ soliŋ yɛ hau kpeku tau o chieeŋndo niŋ? (b) Le yɛɛ naŋ nɔ yɛ miŋ mal diomnda nɔɔlɛilaŋ soliŋndo kpeku?

⁹ Hau, i cho tɛtɛlɛ le mi waŋnda soliŋ diomnda nɔɔlɛilaŋ o sondo. Wanaa bɔɔbɔɔ yiyaŋ maa le mi waŋnda laalaŋ nyɛ nda wa dimioo wo, mɛɛ ma soliŋ diomnda nɔɔlɛilaŋ kpeku ɔɔ ma menaŋ. Diomnda nɔɔlɛilaŋ wanaa sɔɔŋ mamaa soliŋ kpeku ni le mi waŋnda mam. Kɛ, mi Pɔɔl dimi aa: “La nɔ mi la soli balaŋ po o sɔɔŋ waa nuaa niŋ. Muŋ cho ni, tumbelaŋ, kɔl tuuwo, niilu yɛle tulaa, waŋndo diola wɔɔŋndaŋ keelaa, a diomnda nɔɔlɛilaŋ dimioo.” (Kolosiaŋnda 3:​8) Mbo dimi vɛlɛ maa, “tɔɔ kalaa bɛɛ o wa nya choo a sɔɔŋ wɔɔŋndoŋ muŋ okɔɔ kposoŋ te.” Nduyɛ maa “diom o diom nɔɔlɛi” nɔ mbo fula Kilisiɔŋaa tonyaa o sondo le.—Ɛfisiaŋnda 5:​3, 4.

¹⁰ Diomnda nɔɔlɛilaŋ la tɛɛmbuu Chɛhowa kɔllo vɛlɛ a wanaa kaala ndu wa. La dindu kposoŋ te. O Baabuiyo niŋ, “niilula nɔɔlɛilaŋ” bɛɛ la cho o “nyɛm wana chieeyɛi nɛi i yeema naa mi ŋ tosa woŋ” niŋ. (Kaleesiaŋnda 5:​19-21) Hakila yɛ yɛlaŋ la cho o “niilula nɔɔlɛilaŋ” niŋ, nduyɛ niilu nɔɔlɛiyo opilɛ yaa naa o niilu nɔɔlɛi cheleŋ. Te waŋndo chua ndi pɛ maa kaa ndɔ le diomnda wɔɔŋ wɔɔŋnda soliŋndo o sondo, nduyɛ mbo kɛɛ le siŋgaŋndo, koŋ chɔm ni maa wana koŋ nɔ lɛ mbo wa o kundaa niŋ kposoŋ te.—Kɔliŋtiaŋ Diiŋ Ndɔɔ 12:​21; Ɛfisiaŋnda 4:​19; tofa Diomnda Chɔɔlaalaŋ 23.

11, 12. (a) Yɛɛ cho yɛ choŋgulaŋ? (b) Le yɛɛ naŋ nɔ yɛ miŋ mal waŋndo tɔɔ tɛɛmbuu wo?

 ¹¹ Ŋ nɔ vɛlɛ miŋ mal choŋgulaŋ. O bɛnda le yeemɛi chɔmndo o acheleŋnda niŋ, nduyɛ miŋ dimul nda a chaaŋaa naa vɛlɛ a yuŋgula naalaŋ okɔɔ. O wɔsiŋ kɛmɛ tasoŋ niŋ bɛɛ, Kilisiɔŋaa tasiaa ndaa yeema le sinaa a chaaŋaa ndaa laalaŋnda okɔɔ, le ma sina nyɛ nda nɔ ma tosa le nda malaa wo. (Ɛfisiaŋnda 6:​21, 22; Kolosiaŋnda 4:​8, 9) Kɛ te ŋ mandaŋ te, mi baltaŋ a waŋnda okɔɔ simnuŋ choŋgulaŋ. Te ŋ lambaŋ pɛ choŋgulaŋ, ŋ cho choolaŋ dimi a waŋndo okɔɔ nduyɛ miŋ dimi sɔɔŋ naŋ nɔ le dimi le woŋ. Te ŋ mandaŋ te, ŋ cho wana koŋ sɔɔŋ hɛɛnduu choo okoŋ miŋ tɛɛmbuu ndu tɔɔ. Mi Falisiiya tɛɛmbuu Chiisu tɔɔ mɛɛ nda hɛɛnduu ndu sɔɔŋ choo. (Maatiu 9:​32-34; 12:​22-24) Waŋndo tɔɔ tɛɛmbuu wo tosa mi waŋnda nɔ yiyaŋ wɔɔŋndo a ndu. O huŋ vɛlɛ a sɛɛŋgiaŋndaŋ, kɔl tambɛiyo, nduyɛ mbo tɛɛmbuu chaŋyɛi.—Pulɔwaa 26:​20.

¹² Chɛhowa yeema naa miŋ soliŋ diomnda naalaŋ kpeku le acheleŋnda malaa nduyɛ miŋ dɛɛniaa nda kɔltaŋ, kɛ o cho le yaamɔɔleŋ lueiyo waŋnda tɛɛŋ te. Wanaa kei “kpundɛlaŋ malɔɔ waŋnda tɛɛŋ” nda, Chɛhowa tul nda leyɛ. (Pulɔwaa 6:​16-19) Setana cho wana tasoo ni le Mɛlɛka a waŋnda tɔɔ tɛɛmbuu wo. (Sɔɔŋ Chɔɔmaŋndoŋ 12:​9, 10) O chieeŋndo niŋ hau, i cho tɛtɛlɛ le mi waŋnda dimi choolaŋ a acheleŋnda okɔɔ. Kɛ hei nɔ mi i yɔŋnuŋ o kunda leKilisiɔŋndo niŋ te. (Kaleesiaŋnda 5:​19-21) Lelaŋ, ŋ nɔ miŋ mandaŋ a nyɛ naŋ dimi wo. Nduyɛ tuupa miŋ soo, ŋ nɔ fɛŋ miŋ yiyaŋ. Tuupa ma dimi isɔɔ a waŋndo okɔɔ, nyunaŋndɔ aa: ‘Baa nyɛ ya nɔ le dimioo wo cho pa tonya? O bɛnda pa? I cho pa suɛi mala wana? Baa I yeema pa mi wana ya cho suɛi  a ndu okɔɔ wo tuei nyɛ ya cho dimi wo? Vɛɛ kɔllo wa yɛ ya te waŋndo dimi pɛ suɛi waa naa a ya okɔɔ?—Nuawɔ Tɛsaloniaŋ Tasoo 4:​11.

13, 14. (a) Yɛɛ yioulaŋ la tosallɛ waŋnda? (b) Le yɛɛ Kilisiɔŋnda nɔ yɛ ma mal waŋnda yioulaŋ?

¹³ Lepum, miŋ dimi sɔɔŋ nduyɛ miŋ kel suei o mɛɛlulaŋ. Kɛ i nɔ mi i wa kaa naa le waŋnda choŋgulaŋ a diomnda wɔɔŋndaŋ dimioo a nda okɔɔ le. Ŋ nɔ miŋ soliŋ diomnda wɔɔŋndaŋ o sondo kposoŋ te. Mi Pɔɔl dimi aa, “La mal nɛiyɔŋndaŋ, a kɔl biŋgioo, a kɔl tuuwo, a sɛɛŋgiaŋndaŋ, a [“yioulaŋ,” NW] a nyɛ o nyɛ cho niilu yɛle tulaa.” (Ɛfisiaŋnda 4:​31) Baabuila cheleŋ la hivi “yioulaŋ” aa, “diomnda wɔɔŋndaŋ,” “diomnda nɔɔlɛilaŋ,” a “diomnda soli wana o baa niŋ ndaŋ.” Diomnda wɔɔŋndaŋ la tɛɛmbuu waŋndo bɛɛlaŋ nduyɛ la tosa mbo cheŋnuŋ wana fondoo. I cho tɛtɛlɛ le mi chuaambuaa keleŋa kɔllo tambu. Lelaŋ, ŋ nɔ miŋ mandaŋ yɔŋi naŋ tɛɛmbuu nda kɔllo a diomnda naalaŋ.—Kolosiaŋnda 3:​21.

¹⁴ Baabuiyo sila naa o kala kala le miŋ mal yioulaŋ. Yioulaŋ la cho ni, diomnda wɔɔŋndaŋ waŋnda dimullo le nda kɔllo tɛɛmbuu wo. Nuawɔ se suɛi wɔɔŋ te waŋndo bii pɛ wana nda cho o nɔɔ niŋndo ɔɔ chuauwaa nduaa o nɛiyo hoo choo! Nduyɛ pɛŋ, te waŋndo lambaŋ pɛ waŋnda yioulaŋ nduyɛ mbo kɛɛ le siŋgaŋndo, mɛɛ o bɛnda lɛ le waa o kunda leKilisiɔŋndo niŋ te. (Kɔliŋtiaŋ Tasoo 5:​11-13; 6:​9, 10) A mɛɛ naŋ pɛɛku yɛ, te ŋ dimi pɛ sɔɔŋ nɔɔlɛiyoŋ, choolaŋ, a sɔɔŋ bɛnda le woŋ, ŋ cho chaŋyɛi nɛi tɛɛmbuu a Chɛhowa vɛlɛ a wanaa cheleŋ.

15. Diomnda suu kuɛɛ la kindi yɛ chaŋyɛi?

¹⁵ Vɛɛ naŋ soliŋ yɛ kioo le suɛi kpeku mɛɛ Chɛhowa  yeema yɛ? Mi che bɛɛ Baabuiyo chɔm naa nyɛ kpeekpei naŋ nɔ miŋ dimi ɔɔ miŋ dimi le wo le, kɛ o dimul naa maa “diomnda mala waŋnda laŋ” kinɛi naŋ soo ni. (Ɛfisiaŋnda 4:​29) Diomnda kɛndɛlaŋ, diomnda tonyalaŋ, a diomnda diandaalaŋ la mala waŋnda. Chɛhowa yeema naa miŋ soliŋ diomnda naalaŋ kpeku le acheleŋnda dɛɛniaa a nda malaa. Hei ve bɛɛŋ bɛɛŋ le tosaa le. I cho tɛtɛlɛ le sɔɔŋ wɔɔŋndoŋ dimioo mbo hiau sɔɔŋ kɛndɔŋ. (Taitɔɔ 2:​8) Ŋ soo wɔ a nɛilaŋ lapum okɔɔ, la naŋ mala waŋnda a diomnda naalaŋ ndaŋ.

16, 17. (a) Le yɛɛ naŋ nɔ yɛ miŋ chandu acheleŋnda? (b) Nɛɛ yaa naŋ nɔ yɛ miŋ chandu?

¹⁶ Mi Chɛhowa nda Chiisu yɔŋgu chandɔɔlaŋ a kɔllo kpou. Ŋ yeema miŋ tol taamasi ndaa kɔɔli. (Maatiu 3:​17; 25:​19-23; Chɔŋ 1:​47) Le miŋ chandu waŋndo mbo sɔla kɔl dɛɛniaa kpeekpeiyo, mɛɛ miŋ yaŋ ndu nilaŋ nduyɛ miŋ chɔm yeemɛi kpeekpeiye o ndu niŋ. Pulɔwaa 15:​23 dimi aa: “Te waŋndo dimi nyɛ nɔ le dimiŋndo wo a teleŋ kpeekpeiyo pɛ, kɔllo pila o naŋ ni.” Te waŋndo chandu naa pɛ a kɔllo kpou, nduyɛ mbo chɔm maa o naŋ kɔl le nyɛ naŋ tosa wo, miŋ sɔla kɔl dɛɛniaa.—Nuawɔ Maatiu 7:​12; tofa Diomnda Chɔɔlaalaŋ 27.

¹⁷ Te i wa pɛ kaa num le tofaa o kɛndɔɔ acheleŋnda o ŋdial, i wa tɛtɛlɛ le ma chandu nda a kɔllo kpou. Le taamaseliiyo, ma che waŋndo o kundaa niŋ, o cho lɔɔlɔɔ o bɛɛndiaŋ nyɛkɛndɛi le sɔɔŋ ndɔŋ yɔŋgoo a kindiŋndo le nyunalaŋ mulioo. Naapum mi feleŋgɔnɔɔ sim le tonyaa o sukuu ɔɔ mi bɛndu yuuwo wa teleŋ o teleŋ fulaa o wali pollo niŋ. Te a chandu nda pɛ, ma naŋ kɔl. I cho bɔɔ vɛlɛ suɛi sɔvɛ le mi pɔnɔɔ dimul laandɔ maa o kaala ndu nduyɛ maa o hini kɔl a ndu. (Pulɔwaa 31:​10, 28) Mɛɛ tɔlɔɔlaŋ la yeema paaleŋ a mɛŋndaŋ yɛ, lende koni waŋnda yeema chandɔɔ ni.  Hei cho tonya taama taama a chuaambuaa. Nuuviaa nɛilaŋ le ma chandu nda le suliŋnda ndala kɛndɛlaŋ a kindi kindiŋ nda cho wo. Chandɔɔ tosa ma simul kɔl nduyɛ mbo mala nda ma chɔɔlu pɛŋ kindiŋ le o kɛndɔɔ tosaa.

18, 19. Le yɛɛ naŋ nɔ yɛ miŋ kindiŋ o nɛi o nɛi niŋ le acheleŋnda kɔllo dɛɛniaa? Vɛɛ naŋ tosa yɛ hei?

¹⁸ Te ŋ dɛɛniaa pɛ acheleŋnda kɔltaŋ, mɛɛ taamasi Chɛhowaa naŋ cho koŋ tolɔɔ kɔɔli ni. O buulaŋ tau a “wanaa tusi nda pila toolo wa,” nduyɛ a wanaa tambu kɔlla. (Aisaya 57:​15) Chɛhowa yeema naa miŋ hiou lachi a “kɔltaŋ dɛɛniaŋndo vellaa velle” nduyɛ miŋ “dɛɛniaa” wanaa cho a kɔlta tambɛilaŋ nda kɔltaŋ.  (Tɛsaloniaŋ Tasoo 5:​11, 14) Te ŋ kindiŋ pɛ le hei tosaa, mbo che fafala naa, nduyɛ mbo naŋ kɔl.

¹⁹ Lepum ma che waŋndo o kundaa niŋ maa o cho a kɔl tambɛiyo. Yɛɛ ŋ nɔ yɛ ma dimul ndu le ndu kɔllo dɛɛniaa? Naapum a nɔla bahawɛi koŋ soli le, kɛ a nɔla ma chɔm wana koŋ maa a buulaŋ a ndu. Le taamaseliiyo, naapum a kɛɛsiaa le teleŋndo chuaa a ndu latulu. A nɔla ma nuel ndu bolle Baabuile dɛɛniaa ndu kɔllo leŋ nduyɛ pɛŋ, a piɛi a ndu latulu. (Sam 34:​18; Maatiu 10:​29-31) Dimul ndu maa puaapiliaa a ndepiliaa o kundaa niŋ kaala ndu. (Kɔliŋtiaŋ Tasoo 12:​12-26; Chemisi 5:​14, 15) Nduyɛ chɔm o suɛi numnde niŋ maa tonya kɛsɛ nyɛ ŋ cho dimioo wo cho ni.—Nuawɔ Pulɔwaa 12:​25.

20, 21. Yɛɛ tosa yɛ ndi tɛtɛlɛ le mi waŋnda chɛl silaa?

 ²⁰ Ŋ dɛɛniaa vɛlɛ acheleŋnda te ŋ ke nda pɛ sila kɛndɔɔ. Mɛɛ naŋ cho wanaa lahakiaa yɛ, naa kpou yeema silaa teleŋndaŋ lapum. Pulɔwaa 19:​20 dimi aa: “O bɛnda mi wana yaŋ nilaŋ o silaa, nduyɛ ma chua nyɛ nda dimul num ndo. Koŋ tosa ni, ma simnuŋ wana kɔl kalu o siɔdii lachioo niŋ.” O cho ko bɛnduaa kundaa le nɔ ma yɔŋgu silaa le. Kalaŋ chuauwa nɔ ma ke chuauwaa ndaa nɛi chɔmaa. (Ɛfisiaŋnda 6:​4) Nduyɛ, ndepilla nɔla ma keŋnaŋ silaa vellaa velle. (Taitɔɔ 2:​3-5) Le mɛɛ naŋ kaala puaapiliaa a ndepiliaa naa yɛ, ŋ nɔ miŋ kɛsiŋ o kɔl maa sila naa nɔ mbo dɛɛniaa nda kɔllo lɔɔlɔɔ. Yɛɛ mala yɛ naa le hei tosaa?

²¹ Naapum a loonuŋ teleŋ waŋndo ke nuŋ silaa o nɛi kɛndɔɔ choo wo. Nduyɛ mi hei tosa ma chɛl sila koŋ. Yɛɛ tosa yɛ ma chɛl sila koŋ? Kɛlɛŋgaa ma yiyaŋ maa wana koŋ o buulaŋ a num. Ɔɔ naapum, mbo chaa suɛi o numndo o nɛi kaalaa niŋ. (Kolosiaŋnda 4:​6) Kɛlɛŋgaa Baabuiyo o soliŋ kpeku ni le num silaa. (Timoti Diiŋ Ndɔɔ 3:​16) Ŋ kumbil bɛɛ waŋndo Baabuiyo le ndu silaa ɔɔ miŋ kumbi le, sila kɛ kɛ naŋ ke pɛ waŋndo, o nɔ mbo chɛŋ tum o Baabuiyo niŋ. Wana o wana nɔ mbo baŋ chaanda le ma chɛl yiyaŋ ndɔɔ le. O nɔ mbo soliŋ bolii Baabuiye kpeku o nɛi wɔɔŋndo choo le yiyaŋ ndɔɔ tooloo le. Te a yiyaŋ pɛ mɛɛ nda ke num silaa yɛ, koŋ mala num te a wa pɛ acheleŋnda silaa kioo.

22. Vɛɛ ŋ yeema yɛ ma soliŋ ke ŋ nɔ le suɛiyo kpeku?

²² Mɛlɛka ke naa dio ni le suɛi. Kaala naŋ nɔ le ndu wo nɔ mbo nyindu naa miŋ soliŋ kioo hoo kpeku nyɛkɛndɛi. Loonuŋ maa diomnda naŋ dimi laŋ la tɛɛmbuu waŋnda kɔltaŋ ɔɔ mi la mala nda. Lelaŋ, ŋ tosaŋ nyɛ o nyɛ naŋ nɔla le miŋ soliŋ diomnda naalaŋ kpeku le waŋnda kindioo a nda kɔltaŋ dɛɛniaa.